Azərbaycan gəncləri ölkənin ictimai-siyasi həyatında böyük rol oynayır

Bakı:

10 °C

93 %

6 m/s

Əlaqə

AZ RU EN

Ana səhifə / Sosial / Azərbaycan gəncləri ölkənin ictimai-siyasi həyatında böyük rol oynayır

Azərbaycan gəncləri ölkənin ictimai-siyasi həyatında böyük rol oynayır

18.06.2016 [11:15]

İyunun 17-də Quba şəhərində Gənclər və İdman Nazirliyi tərəfindən “Gənclik və dövlət müstəqilliyi: gələcəyə baxış” mövzusunda regional forum keçirilib.
AZƏRTAC xəbər verir ki, forumda Quba-Xaçmaz iqtisadi rayonuna daxil olan rayonların (Quba, Qusar, Xaçmaz, Xızı, Şabran, Siyəzən) gənclər və idman idarələrinin əməkdaşları, gənclər təşkilatlarının nümayəndələri və fəal gənclər iştirak edib.
Forum iştirakçıları əvvəlcə Ümummilli lider Heydər Əliyevin abidəsini ziyarət ediblər. Sonra istedadlı və yaradıcı gənclərin əl işlərindən ibarət sərgiyə baxış keçirilib.
Tədbirdə rayon İcra Hakimiyyəti başçısının müavini Rəxşəndə Bayramova çıxış edərək ölkəmizin hər yerində olduğu kimi, Quba rayonunda da dövlət gənclər siyasətinin uğurla həyata keçirildiyini diqqətə çatdırıb. Bildirilib ki, gənclərin məşğulluğunun təmin edilməsi, təhsili, hərtərəfli inkişafı, vətənpərvər ruhda tərbiyəsi istiqamətində ardıcıl iş görülür.
Gənclər və idman nazirinin müavini İntiqam Babayev çıxışında ölkəmizdə gənclərə göstərilən diqqət və qayğıdan, əsası Ulu öndər Heydər Əliyev tərəfindən qoyulan və Prezident İlham Əliyev tərəfindən uğurla davam etdirilən dövlət gənclər siyasətindən, azərbaycançılıq ideyasından danışıb.
“Həyata keçirilən məqsədyönlü siyasətin nəticəsidir ki, bu gün Azərbaycanda yüksək intellektual səviyyəyə, vətənpərvərlik hissinə, milli düşüncəyə malik gənclər formalaşır. Azərbaycan gəncləri gündən-günə ölkənin ictimai-siyasi həyatında daha böyük rol oynayır. Hazırda respublikada mövcud olan yüzlərlə qeyri-hökumət və gənclər təşkilatlarının aktiv fəaliyyəti dövlətin yaratdığı şərait sayəsində mümkün olub”, - deyən İntiqam Babayev bildirib ki, iyunun 17-də Bakıda “Formula-1” üzrə Avropa Qran-pri yarışlarına start verilməsi ilə dünyanın diqqəti yenidən Azərbaycana yönəlib. Ölkəmizin yüksək səviyyəli idman yarışlarına ev sahibliyi etməsi artıq ənənə halını alıb.
Sonra forum işini panel müzakirələri ilə davam etdirib. Ekspertlərin iştirakı ilə keçirilən müzakirələrdə “Gənclər arasında vətənpərvərlik, azərbaycançılıq, dövlətçilik, dünyəvilik ideyalarının təbliği” və “Vətəndaş cəmiyyətinin formalaşmasında gənclərin iştirakı” mövzularında, habelə qarşıda duran mühüm məsələlərlə bağlı fikir mübadiləsi aparılıb.
Panel müzakirələrə Azərbaycan Tələbə Gənclər Təşkilatları İttifaqının (ATGTİ) sədri, Milli Məclisin deputatı Şahin İsmayılov, Prezident Administrasiyasının sektor müdiri Vüsal Quliyev, Yeni Azərbaycan Partiyası Gənclər Birliyinin sədri Seymur Orucov və başqa ekspertlər qatılıb.
Regional forumda dövlət gənclər siyasətinin həyata keçirilməsində fəallıq göstərən bir qrup gəncə fəxri fərmanlar təqdim edilib.

Paylaş:

Baxılıb: 679 dəfə