Samirə Quliyeva: Biz haqq işimizi Xocalı soyqırımını törədən cinayətkarların ədalət məhkəməsində cavab verəcəyi günə qədər davam etdirməliyik

Bakı:

10 °C

93 %

5 m/s

AZ RU EN

Ana səhifə / Sosial / Samirə Quliyeva: Biz haqq işimizi Xocalı soyqırımını törədən cinayətkarların ədalət məhkəməsində cavab verəcəyi günə qədər davam etdirməliyik

Samirə Quliyeva: Biz haqq işimizi Xocalı soyqırımını törədən cinayətkarların ədalət məhkəməsində cavab verəcəyi günə qədər davam etdirməliyik

24.02.2017 [09:37]

“XX əsrin ən böyük faciəsi, bəşəriyyətə, insanlığa qarşı törədilmiş qətliam olan Xocalı soyqırımının 25-ci ildönümü ilə bağlı hazırda həm ölkəmizdə, həm də xarici ölkələrdə tədbirlər keçirilir. Bu gün bu faciə haqqında danışmaq çox çətindir. Çünki həmin faciənin qurbanlarının -xüsusi qəddarlıqla, amansızlıqla qətlə yetirilənlərin, bətni yarılaraq körpəsi qətlə yetirilənlərin, övladı göz açmamış vəhşicəsinə öldürülən anaların, tanınmaz vəziyyətə salınan ağsaqqalların, ağbirçəklərin faciəsinin şahidi olmuşuq. İnsanların diri-diri yandırılması, tankların tırtılları ilə əzilməsi qan yaddaşımıza köçüb. Azərbaycan xalqına qarşı zaman-zaman belə qətliamlar törədilib. XX əsrin sonunda, sivil bir dünya düzənində belə tükürpədici qətliamın, insanın qanını donduran soyqırımının baş verməsi ağlasığmazdır”. Bu fikirləri YAP Gənclər Birliyinin sədr müavini, partiyanın Siyasi Şurasının üzvü Samirə Quliyeva deyib.
S.Quliyeva bildirib ki, 1992-ci il fevralın 26-da baş verən Xocalı faciəsi bəşər tarixinin ən qanlı səhifələrindən biridir. Onun sözlərinə görə, Azərbaycan dövləti, eləcə də cəmiyyətimizin ayrı-ayrı nümayəndələri, diaspor təşkilatlarımız Xocalı soyqırımının dünyada tanıdılması istiqamətində sistemli tədbirlər həyata keçirir.
“Xocalı soyqırımına ilk hüquqi-siyasi qiymət Ümummilli liderimiz Heydər Əliyev tərəfindən verilib. Hazırda Prezident İlham Əliyevin rəhbərliyi ilə dövlətimiz Xocalı soyqırımının dünyada tanıdılması istiqamətində ardıcıl tədbirlər həyata keçirir. Xüsusilə, Heydər Əliyev Fondunun təşəbbüsləri təqdirəlayiqdir. Fondun vitse-prezidenti Leyla xanım Əliyevanın təşəbbüsü ilə reallaşdırılan “Xocalıya ədalət!” kampaniyasının dünyada geniş əks-sədası var. Dünyanın bütün qitələrində bu hərəkat geniş vüsət alıb. Bu kampaniya vasitəsilə beynəlxalq təşkilatlarda, dövlətlərdə keçirilən tədbirə qatılan insanlar Xocalı faciəsi haqqında həqiqətlərlə tanış ola bilirlər. Artıq aparılan təbliğat işləri müsbət nəticələrini verməkdədir. Belə ki, bir sıra dövlətlər və təşkilatlar Xocalı soyqırımını tanıyıblar. Təbii ki, bundan sonra da bu yöndə işlər davam etdiriləcək və məqsədimizə nail olacağıq. Azərbaycan dövləti bu istiqamətdə öz siyasətini davam etdirir. Düşünürəm ki, biz gələcəkdə daha çox ölkələrin bu faciəni soyqırımı kimi tanımasının şahidi olacağıq. Amma bu məsələ ümumxalq işi olduğu üçün hər birimiz, o cümlədən də gənclərimiz daim fəal olmalıdır. Nəzərə alaq ki, bu gün İKT geniş imkanlar yaradır və biz bu imkan vasitəsilə, sosial şəbəkələr vasitəsilə Azərbaycanın həqiqətlərini dünyaya çatdırmalıyıq. Yeni Azərbaycan Partiyasının gəncləri də Xocalı soyqırımının dünya ictimaiyyətinə çatdırılması məqsədilə hər il müxtəlif layihələr həyata keçirir, sosial şəbəkələrdən, internet resurslarından səmərəli şəkildə istifadə edir. Biz bu haqq işimizi Xocalı soyqırımını törədən cinayətkarların ədalət məhkəməsində cavab verəcəyi günə qədər davam etdirməliyik”, - deyə S.Quliyeva vurğulayıb.

Paylaş:

Baxılıb: 539 dəfə