Peşəkar kikboksinqçilər Milli Qəhrəman Çingiz Qurbanovun xatirəsinə həsr olunmuş turnirdə rinqə çıxıblar

Bakı:

21 °C

46 %

4 m/s

AZ RU EN

Ana səhifə / Sosial / Peşəkar kikboksinqçilər Milli Qəhrəman Çingiz Qurbanovun xatirəsinə həsr olunmuş turnirdə rinqə çıxıblar

Peşəkar kikboksinqçilər Milli Qəhrəman Çingiz Qurbanovun xatirəsinə həsr olunmuş turnirdə rinqə çıxıblar

13.04.2017 [08:55]

Aprelin 12-də Qusar Olimpiya İdman Kompleksində Milli Qəhrəman Çingiz Qurbanovun xatirəsinə həsr olunmuş kikboksinq üzrə peşəkarlar arasında turnir keçirilib. Gənclər və İdman Nazirliyinin dəstəyi, Dünya Kikboksinq Təşkilatları Assosiasiyası (WAKO), Kikboksinq Federasiyası və “Judo Club 2012” idman klubunun birgə təşkil etdiyi turnirdə ölkəmizin peşəkar kikboksinqçiləri qalib adı uğrunda 7 çəki dərəcəsində yarışıb.
AZƏRTAC xəbər verir ki, turnirin açılış mərasimindən əvvəl Ümummilli lider Heydər Əliyevin Qusar şəhərində ucaldılmış abidəsi və Şəhidlər xiyabanında Milli Qəhrəman Çingiz Qurbanovun məzarı ziyarət olunub.
Açılış mərasimində Qusar rayon İcra Hakimiyyətinin başçısı Şair Alxasov yarış iştirakçılarını salamlayaraq, onlara uğurlar diləyib.
Gənclər və idman nazirinin müavini İsmayıl İsmayılov regionun lider dövlətinə, bir çox nüfuzlu beynəlxalq tədbirlərin məkanına çevrilən Azərbaycanın dünyada idman ölkəsi kimi tanındığını qeyd edib. Bildirilib ki, bu, ölkəmizdə idmana, idmançılara dövlət səviyyəsində göstərilən qayğının nəticəsidir.
Azərbaycan Kikboksinq Federasiyasının prezidenti, Milli Məclisin deputatı Adil Əliyev bildirib ki, Milli Qəhrəman Çingiz Qurbanov rəşadəti ilə bugünkü gənclərimizə əsl örnəkdir. Gənc nəsil onun kimi oğullardan nümunə götürməli, Ç.Qurbanovun xatirəsi əbədi yaşadılmalıdır. Peşəkar idmançıların güclərini sınayacağı kikboksinq yarışı da bu amala xidmət edir. Milli Qəhrəman Çingiz Qurbanov da vaxtilə kikboksinq idmanı ilə məşğul olub.
A.Əliyev peşəkarlar arasında bölgədə keçirilən bu yarışın vətənpərvərlik təbliğatı ilə yanaşı, regionda idmana marağın daha da artmasına xidmət edəcəyini deyib.
Federasiya prezidenti Ç.Qurbanovun valideynlərinə vətənpərvər oğul böyütdükləri üçün təşəkkür edib, bütün Azərbaycan xalqının onunla fəxr etdiyini diqqətə çatdırıb.
Açılış mərasimində Milli Qəhrəmanının xatirəsi bir dəqiqəlik sükutla yad edilib.
Azərbaycanın Dövlət himni səsləndirildikdən sonra yarışlara start verilib.
İlk döyüşdən əvvəl Milli Qəhrəmanın atası Salman Qurbanova Çingiz Qurbanovun idman ustası vəsiqəsi təqdim olunub. Bir sıra məşqçi və idmançılar, eləcə də Qarabağ döyüşlərinin qaziləri isə fəxri fərman və diplomlarla təltif edilib.
Yeniyetmə kikboksinqçilər Elmir Pirverdi və Hüseyn Hacıyev arasında keçirilən ilk döyüşdə heç-heçə qeydə alınıb.
Daha sonra 57 kiloqram çəkidə Elşad Ələsgərov və Qiyas Şahmərdanov rinqə çıxıb. Rəqibindən üstün olan Elşad qalib adını qazanıb. 64 kiloqramda isə Ruslan Əliyevi məğlub edən Elşən Qəniyev çempion tituluna yiyələnib. Arzuman Qədimovla (67 kq) Turan Qafarov arasındakı gərgin qarşılaşmada isə ikinci daha üstün olub. 71 kiloqram çəkidəki döyüşdə Rəhim Əliyev rəqibi Cavidan Rəcəblini məğlub edib. Alişan Aslanlı (81 kq) isə Gülhüseyn Ağazadə ilə mübarizədə üstün olub. 75 kiloqram çəkidə Altay Atakişiyevlə Emil Mövsümzadə arasındakı görüş də yaddaqalan keçib. E.Mövsümzadə bu qarşılaşmadan vaxtından əvvəl qalib gəlməyi bacarıb. Son döyüşdə isə Bəhram Rəcəbzadə və Sərxan Cabbarov üz-üzə gəlib. 91 kiloqram çəkidə keçirilən döyüşdə B.Rəcabzadə rəqibindən üstün olub.
Turnirin qaliblərinə müvafiq diplom və pul mükafatı təqdim edilib.
Xatırladaq ki, Azərbaycan Silahlı Qüvvələrinin əsgəri Çingiz Qurbanov 2016-cı il dekabrın 29-da Ermənistan silahlı qüvvələrinin kəşfiyyat qrupunun təxribat-pozuculuq fəaliyyətinin qarşısını alarkən şəhid olub. Bu il fevralın 7-də Prezident İlham Əliyev Azərbaycanın ərazi bütövlüyünün qorunub saxlanılmasında xüsusi xidmətlərinə və döyüş tapşırığını yerinə yetirərkən göstərdiyi şəxsi igidliyə görə əsgər Çingiz Qurbanova ölümündən sonra “Azərbaycanın Milli Qəhrəmanı” adının verilməsi barədə Sərəncam imzalayıb.

Paylaş:

Baxılıb: 584 dəfə