Muxtar respublikada fəaliyyət göstərən yerləşdirmə obyektlərinin və turizm şirkətlərinin rəhbərləri ilə görüş keçirilib

Bakı:

27 °C

59 %

8 m/s

AZ RU EN

Ana səhifə / Sosial / Muxtar respublikada fəaliyyət göstərən yerləşdirmə obyektlərinin və turizm şirkətlərinin rəhbərləri ilə görüş keçirilib

Muxtar respublikada fəaliyyət göstərən yerləşdirmə obyektlərinin və turizm şirkətlərinin rəhbərləri ilə görüş keçirilib

26.07.2017 [09:11]

İyulun 25-də Azərbaycan Respublikasının mədəniyyət və turizm naziri Əbülfəs Qarayevin rəhbərlik etdiyi nümayəndə heyəti ilə Naxçıvan Muxtar Respublikasında fəaliyyət göstərən yerləşdirmə obyektlərinin və turizm şirkətlərinin rəhbərlərinin görüşü keçirilib.
Görüşdən əvvəl qonaqlar Ümummilli lider Heydər Əliyevin Naxçıvan şəhərinin mərkəzində ucalan abidəsi önünə gələrək buraya gül dəstələri düzüb və Heydər Əliyev Muzeyini ziyarət ediblər.
Naxçıvan Dövlət Televiziyasına müsahibə verən Azərbaycan Respublikasının mədəniyyət və turizm naziri Əbülfəs Qarayev deyib: “İslam Əməkdaşlıq Təşkilatına üzv dövlətlərin mədəniyyət nazirlərinin 2009-cu ilin oktyabrında Bakı şəhərində keçirilmiş altıncı konfransında qəbul edilmiş qərarla Naxçıvan şəhəri 2018-ci il üçün İslam mədəniyyətinin paytaxtı elan olunub. Azərbaycan Respublikasının Prezidenti İlham Əliyevin 2016-cı il 2 iyun tarixli Sərəncamı ilə 2018-ci ildə İslam mədəniyyəti paytaxtı tədbirlərinin keçirilməsi ilə bağlı Təşkilat Komitəsi yaradılıb. Təşkilat komitəsinin sədri hörmətli Vasif Talıbovun rəhbərliyi ilə hazırlıq işləri yüksək səviyyədə həyata keçirilir. Təşkilat komitəsi üzvləri müxtəlif dövlət orqanlarını təmsil edən, Azərbaycan mədəniyyəti ilə sıx bağlı olan şəxslər, təşkilat rəhbərləridir. 2016-cı ilin noyabr ayında Naxçıvan Muxtar Respublikası Ali Məclisinin Sədri Vasif Talıbovun rəhbərliyi ilə təşkilat komitəsinin ilk iclas keçirilib, müvafiq qurumlar qarşısında vəzifələr müəyyənləşdirilib və icrasına başlanılıb. Bugünkü səfərimizin məqsədi həm mədəniyyət ocaqlarının, həm də turist xidmətlərinin bir araya gətirilməsi üçün ciddi koordinasiya işi təşkil etməkdən ibarətdir. Bundan sonra keçiriləcək görüşlərdə digər ölkələrin təqdimatlarının keçirilməsi, eləcə də Naxçıvana qastrol səfərlərinin təşkili nəzərdə tutulur.
Bugünkü tədbirdə çox dəyərli təkliflər irəli sürüldü. Turizm şirkətlərinin koordinasiya olunması qarşıda duran ən mühüm məsələlərdəndir. Biz istəyərdik ki, Naxçıvana müalicəvi turizm üçün gələnlər, həm də mədəniyyət ocaqlarının imkanlarından faydalansınlar. Bu gün Ali Məclisin Sədri ilə görüşdə də bu məsələlər müzakirə olunub. Mən tam əminəm ki, biz Naxçıvanı dünya ictimaiyyətinə, sözün əsl mənasında, İslam mədəniyyətinin paytaxtı kimi təqdim etməyə müvəffəq olacağıq. Görülən işlər buna əsas verir. Hörmətli Prezidentimiz tərəfindən bu ilin “İslam Həmrəyliyi İli” elan edilməsi bütün İslam dünyasının Azərbaycana marağının artmasına səbəb olub. Eyni zamanda, Bakıda İslam Həmrəyliyi Oyunlarının keçirilməsi, Naxçıvanın İslam mədəniyyətinin paytaxtı elan olunması və silsilə tədbirlərin təşkili İslam dünyasında Azərbaycanın nə qədər böyük bir mövqeyə sahib olduğunu təsdiq edir. Azərbaycan öz multikultural ənənələri ilə seçilən, mədəniyyətlər arasında körpü rolunu oynayan ölkədir. Bu imkanlardan səmərəli istifadə olunmalı, mövcud potensialı nümayiş etdirmək üçün silsilə tədbirlər keçirilməlidir”.
AZƏRTAC-ın Naxçıvan Muxtar
Respublikasındakı bürosu

Paylaş:

Baxılıb: 611 dəfə