Baramaçılığın inkişafı əhalinin məşğulluğunun artırılmasına, sosial rifahın yüksəldilməsinə xidmət edir

Bakı:

27 °C

61 %

14 m/s

AZ RU EN

Ana səhifə / Sosial / Baramaçılığın inkişafı əhalinin məşğulluğunun artırılmasına, sosial rifahın yüksəldilməsinə xidmət edir

Baramaçılığın inkişafı əhalinin məşğulluğunun artırılmasına, sosial rifahın yüksəldilməsinə xidmət edir

13.01.2018 [01:10]

Prezident İlham Əliyevin tapşırığı ilə ənənəvi və ixracyönümlü təsərrüfat sahəsi olan baramaçılığın inkişaf etdirilməsi istiqamətində ardıcıl tədbirlər həyata keçirilir, ipəkçiliyin müasir infrastrukturu yaradılır, yeni tut bağları salınır. Bu sahəyə dövlət dəstəyinin nəticəsidir ki, respublikamızda barama istehsalı ildən-ilə artır.
Dövlətimizin başçısı Nazirlər Kabinetinin 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında deyib ki, 2015-ci ildə 200 kiloqram, 2016-cı ildə 70 ton, 2017-ci ildə 245 ton barama tədarük edilib. Bu da kümçülərin sosial vəziyyətinin yaxşılaşdırılmasına xidmət göstərir. Bu il bu rəqəm 450-500 tona çatmalıdır və ipəkçiliyin şöhrəti bərpa ediləcək.
Respublikamızın digər bölgələrində olduğu kimi, cəbhə bölgəsində yerləşən Ağdam rayonunda da baramaçılığın keçmiş şöhrətinin qaytarılması istiqamətində mühüm addımlar atılır. Ağdam rayon Kənd Təsərrüfatı İdarəsinin rəisi Teyyub Nəcəfov AZƏRTAC-ın bölgə müxbirinə bildirib ki, baramaçılıq vaxtilə Ağdam rayonunda xeyli inkişaf edən sahələrdən olub. 1980-ci illərdə hər il rayon üzrə 300 tondan artıq barama istehsal edilib, lakin 1992-ci ildən rayonda barama istehsalı dayanıb. Uzun fasilədən sonra 2016-cı ildə ənənəvi təsərrüfat sahələrindən olan baramaçılığın bərpa edilməsinə başlanılıb. Həmin il rayonda 2,4 ton, 2017-ci ildə 13 ton barama istehsal olunub. İpəkqurdunun yem bazasının bərpası məqsədilə 2016-2017-ci illərdə rayon ərazisində 100 min ədəddən çox, o cümlədən son iki ayda 65 min tut tingi əkilib.
Teyyub Nəcəfov qeyd edib ki, rayon ərazisindəki mövcud və yeni əkilən tut ağacları, əhalinin baramaçılıq sahəsindəki təcrübəsi, həmçinin bu sahənin gəlirli olması barama istehsalını dəfələrlə artırmağa imkan verir. “Baramaçılığın bərpa olunması regionlarda yaşayan əhalinin məşğulluğunun artırılmasına, onların sosial rifahının yüksəldilməsinə xidmət edir. Dövlətin baramaçılığın inkişafına diqqət göstərməsi, bir kiloqram baramanın qiymətinin subsidiya ilə birgə 9 manat olması rayon sakinlərinin bu sahəyə marağını artırıb. Çünki baramaçılığın inkişafı iş yerləri, əlavə qazanc və yaxşı güzəran deməkdir. 2018-ci ildə daha çox rayon sakininin bu gəlirli sahə ilə məşğul olacağını nəzərə alsaq, barama istehsalının da xeyli artacağını proqnozlaşdırmaq olar. Baramaçılığın inkişaf etdirilməsi vətəndaşların rifahının yaxşılaşmasına və ölkənin iqtisadi potensialının güclənməsinə mühüm töhfədir”, - deyə idarə rəisi bildirib.

Paylaş:

Baxılıb: 673 dəfə