Binəqədidə sanitar təmizliklə bağlı nöqsanlara görə vəzifəli şəxslər cəzalandırılıb

Bakı:

24 °C

56 %

3 m/s

Əlaqə

AZ RU EN

Ana səhifə / Sosial / Binəqədidə sanitar təmizliklə bağlı nöqsanlara görə vəzifəli şəxslər cəzalandırılıb

Binəqədidə sanitar təmizliklə bağlı nöqsanlara görə vəzifəli şəxslər cəzalandırılıb

28.08.2020 [08:55]

Bakı Şəhər İcra Hakimiyyəti (BŞİH) tərəfindən paytaxtda sanitar-təmizlik tədbirlərinə diqqət artırılır, görülən işlərə nəzarət etmək üçün monitorinqlər keçirilir. Aparılan monitorinqlərin nəticələri göstərir ki, şəhərin mərkəzi və əksər rayonlarda sanitar təmizlik məsələləri qənaətbəxş olsa da, bu işlərlə yerli bələdiyyə və qəsəbə nümayəndəliklərinin məşğul olduğu bəzi kənar ərazilərdə, qəsəbələrdə müəyyən problemlər qalmaqdadır.
BŞİH-in mətbuat xidmətindən AZƏRTAC-a bildiriblər ki, Binəqədi rayonunun qəsəbələrinin sanitar vəziyyəti, əhalini narahat edən problemlər və məişət tullantılarının vaxtında daşınması məsələlərinin araşdırılması məqsədilə Bakı Şəhər İcra Hakimiyyəti tərəfindən monitorinq keçirilib. Bakı Şəhər İcra Hakimiyyətinin başçısı Eldar Əzizov rayondakı problemlərlə yerində tanış olub. Keçirilən yoxlama nəticəsində Binəqədi rayonunun Xocasən, Binəqədi və 28 May qəsəbələrində sanitar təmizlik sahəsində nöqsanların olduğu aşkarlanıb.
Aşkar edilən çatışmazlıqlar yerində müzakirə edilərək Binəqədi Rayon İcra Hakimiyyəti başçısının birinci müavini İlqar Süleymanova, rayon təsərrüfatı şöbəsinin müdiri Azər Kərimova və Xocasən qəsəbəsi üzrə nümayəndəsi Əlikram Haqverdiyevə töhmət verilib, bir sıra məsul işçilərə xəbərdarlıqlar edilib və qısa müddət ərzində yol verilən nöqsanların aradan qaldırılması tapşırılıb.
Eldar Əzizov bildirib ki, Prezident İlham Əliyev və Birinci vitse-prezident xanım Mehriban Əliyevanın dəstəyi nəticəsində bu gün şəhər kommunal strukturlarında maddi-texniki təminat baxımından heç bir problem yoxdur. Əsas məsələ insan amili və mövcud imkanlardan düzgün istifadə etməkdir. Hər bir rəhbər işçi nöqsanlardan nəticə çıxarmalı, öz vəzifə borcunu məsuliyyətlə yerinə yetirməli və fəaliyyətini günün tələblərinə uyğun qurmalıdır.
Qeyd olunub ki, rayon strukturlarının işçilərindən əlavə, Xocasən qəsəbəsində sanitar təmizlik və abadlıq işlərinə 58 sosial işçi cəlb olunub. Bu qədər işçi ilə nəinki Xocasən, həm də qonşu qəsəbədə normal təmizlik yaratmaq olar. Ona görə də bu qədər işçinin nə ilə məşğul olması sual doğurur. Həmçinin qeyd edilib ki, rayonda bəzi hallarda problemləri həll etmək əvəzinə, onların həllinin nə üçün mümkün olmamasını əsaslandırmaq vərdişi yaranıb.
Mənzil-Kommunal Təsərrüfatı Departamentinə və şəhərin digər strukturlarına Binəqədi rayonunda aparılan sanitar-təmizlik işlərində yaxından kömək etmək tapşırılıb.
Bildirilib ki, paytaxtın qəsəbələrində sanitar vəziyyətlə bağlı araşdırmalar davam etdiriləcək.

Paylaş:

Baxılıb: 490 dəfə