İsmayıl Axundov: Müzəffər Ali Baş Komandanın rəhbərliyi ilə qazanılmış Zəfər humanitar problemlərin də həllini təmin etdi

Bakı:

22 °C

60 %

4 m/s

AZ RU EN

Ana səhifə / Sosial / İsmayıl Axundov: Müzəffər Ali Baş Komandanın rəhbərliyi ilə qazanılmış Zəfər humanitar problemlərin də həllini təmin etdi

İsmayıl Axundov: Müzəffər Ali Baş Komandanın rəhbərliyi ilə qazanılmış Zəfər humanitar problemlərin də həllini təmin etdi

06.01.2021 [09:29]

Bu il sentyabrın 27-də Ermənistan ordusunun hərbi təxribatlarına cavab olaraq Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə Ordumuzun başladığı əks-hücum əməliyyatı nəticəsində düşmənə sarsıdıcı zərbə vurulub. Həyata keçirilmiş “Dəmir yumruq” əməliyyatı zamanı Rəşadətli Ordumuz otuz ilə yaxın müddətdə işğal altında qalan müqəddəs Vətən torpaqlarını azad edib. Beləliklə, şəhidlərimizin qanı yerdə qalmayıb, onların qisası alınıb.
Müzəffər Ali Baş Komandanın rəhbərliyi ilə 44 gün ərzində qazanılmış bu böyük Zəfər, eyni zamanda, Ermənistan tərəfinin daim siyasi təsir vasitəsi kimi istifadə etməyə çalışdığı humanitar problemləri də həll etdi.
AZƏRTAC xəbər verir ki, bu fikri Əsir və itkin düşmüş, girov götürülmüş vətəndaşlarla əlaqədar Dövlət Komissiyasının katibi, İşçi qrupunun rəhbəri İsmayıl Axundov yanvarın 5-də Beynəlxalq Münasibətlərin Təhlili Mərkəzində keçirilən mətbuat konfransında deyib.
İsmayıl Axundov bildirib ki, Azərbaycan Respublikasının Prezidenti, Rusiya Federasiyasının Prezidenti və Ermənistan Respublikasının baş nazirinin imzaladıqları 2020-ci il 10 noyabr tarixli üçtərəfli Bəyanatın 8-ci bəndində hərbi əsirlərin, girovların və digər saxlanılan şəxslərin, habelə cəsədlərin mübadiləsinin həyata keçirilməsi əksini tapıb. Prezident İlham Əliyevin tapşırığı ilə Dövlət Komissiyası humanizm prinsiplərindən çıxış edərək Azərbaycan Respublikası Müdafiə Nazirliyinin iştirakı, ATƏT-in və Beynəlxalq Qızıl Xaç Komitəsinin (BQXK) vasitəçiliyi ilə birtərəfli qaydada bu il oktyabrın 29-da, dekabrın 2-də, 9-da, 11-də erməni milliyyətindən olan doqquz nəfəri, həmçinin 30 hərbçini və iki mülki şəxsin meyitini qarşı tərəfə təhvil verib.
İşçi qrupunun rəhbəri vurğulayıb ki, üçtərəfli Bəyanata uyğun olaraq, Rusiya sülhməramlı qüvvələrinin vasitəçiliyi ilə “hamının-hamıya” prinsipi əsasında əsir və girovların azad edilməsi prosesi ilk dəfə dekabrın 14-də həyata keçirilib. Dövlətimizin başçısı İlham Əliyevin göstərişi ilə Əsir və itkin düşmüş, girov götürülmüş vətəndaşlarla əlaqədar Dövlət Komissiyası tərəfindən görülmüş tədbirlər nəticəsində dekabrın 14-də 12-si hərbçi və 2-si mülki şəxs olmaqla, Azərbaycan Respublikasının 14 vətəndaşı erməni əsirliyindən və girovluğundan azad edilərək Vətənə gətirilib. Həmin proses zamanı 30-u hərbçi və 15-i mülki şəxs olmaqla 45 erməni qarşı tərəfə təhvil verilib.
Üçtərəfli Bəyanata uyğun olaraq, sonuncu proses dekabrın 28-də həyata keçirilib. Beləliklə, bu günədək qarşı tərəfdə saxlanılan 14 Azərbaycan vətəndaşı və Azərbaycanda saxlanılan 33 hərbçi və 25 mülki şəxs olmaqla 58 nəfər erməni milliyyətindən olan şəxs azad edilib. Hazırda qarşı tərəfdə BQXK-nın baş çəkdiyi 2 nəfər mülki vətəndaşımız saxlanılır. Azərbaycanda isə 5 erməni əsilli şəxs saxlanılır. Onlardan 2-si hərbçi, 3-ü isə mülki şəxsdir. Həmin şəxslər barədə BQXK-ya məlumat verilib.
İsmayıl Axundov qeyd edib ki, üçtərəfli Bəyanatdan irəli gələn vəzifələrdən biri də döyüş bölgəsində qalmış hərbçilərin meyitlərinin ərazilərdən götürülməsidir. Bu istiqamətdə işlər Rusiya Federasiyasının sülhməramlı qüvvələrinin və Beynəlxalq Qızıl Xaç Komitəsinin vasitəçiliyi ilə həyata keçirilir. Proses başlayandan bu günədək döyüş bölgəsindən Azərbaycanın 334, Ermənistanın isə 988 hərbçisinin meyiti çıxarılıb.
Mətbuat konfransında erməni əsirliyindən azad edilmiş ordumuzun hərbçiləri iştirak ediblər. Erməni əsirliyindən azad edilmiş hərbi qulluqçularımız əsirlikdə olarkən hərbçilər, xüsusilə tibb işçiləri tərəfindən məruz qaldıqları işgəncələr, qeyri-insani davranışlar barədə məlumat veriblər. Hərbi qulluqçularımız əsirlikdən azad olunaraq doğma Vətənə, ailələrinin yanına qayıtdıqları üçün Prezident, Müzəffər Ali Baş Komandan İlham Əliyevə dərin minnətdarlıqlarını bildiriblər.
Sonda jurnalistlərin sualları cavablandırılıb.

Paylaş:

Baxılıb: 665 dəfə