Elan: 10 min manata kirayə ev verilir!

Bakı:

18 °C

88 %

4 m/s

Əlaqə

AZ RU EN

Ana səhifə / Sosial / Elan: 10 min manata kirayə ev verilir!

Elan: 10 min manata kirayə ev verilir!

02.08.2022 [11:06]

Kirayə bağ evləri niyə bahadır?

M.BAYRAMLI

Havalar isinən kimi kimisi bağ evinə, kimisi də bölgələrimizə üz tutur. Nə bağ evi, nə də kəndi-kəsəyi olanlar isə Bakı ətrafında yerləşən bağ evlərini kirayə tutmağa çalışırlar. Gəl gör ki, kirayə evlərinin qiyməti əl yandırır. Yay mövsümündə bağ evlərinə təlabatın kəskin artması qiymətlərə də öz təsirini göstərib. Hazırda Bakıda ən çox Novxanı, Mərdəkan, Bilgəh, Buzovna, Şüvəlan, Pirşağı və s. qəsəbələrdə bağ evlərinə maraq var. Əmlak bazarı üzrə ekspert Elnur Fərzəliyev qəzetimizə açıqlamasında bildirib ki, gündəlik bağ evlərinin qiyməti 50 manatdan 300-500 manata qədər dəyişir. Aylıq kirayəsi təxminən 500 manatdan 10 min manata qədər dəyişən bağ evləri də var. Onun sözlərinə görə, qiymətlər dənizə yaxınlığına görə tənzimlənir: “Əvvəlki illərdə dənizə yaxın ərazilərə tələbat çox idi. Çünki insanlar həmin bağ evində qalıb dənizə rahat gedib istirahət edə bilirdilər. Tikintilər o qədər sürətlə aparılıb ki, bir çox ərazilərdə artıq dənizlə məsafə uzaqlaşıb, hətta əlaqə kəsilib. Vətəndaşın dənizə çıxışına müəyyən məhdudiyyətlər yaranıb. Nəticədə Bakının Abşeron ərazisindəki bağ evlərinə təlabat aşağı düşüb”.

Bölgələrə axın qiymətlərin artmasına səbəb olur

Ekspert deyir ki, bu ilə nəzər salsaq, görərik ki, paytaxt ərazisində bağ evi kirayələmək əvvəlki kimi dəbdə deyil. Çünki qonaqlar daha çox bölgələrə üz tuturlar: “Həmin bölgələrdə də gündəlik bağ evlərinin qiyməti demək olar ki, paytaxt ilə eynidir. Bu axın bölgələrimizin inkişafına və iqtisadi vəziyyətin yaxşılaşmasına zəmin yaradır. Çünki oraya gedib insanlar tək bağ evi ilə kifayətlənmirlər. Kafe, restoran və digər iaşə obyektlərindən istifadə edib pul xərcləyirlər. Eləcə də torpaq sahələri, həyət evləri alırlar. Bu da bölgələrimizə pul kütləsinin axını deməkdir”.

Ev almaq kirayələməkdən daha ucuzdur!

Bəs, bölgələrə axın Bakıdakı fantastik dərəcədə baha olan qiymətlərə də təsiri oldumu? Təbii ki, yox: “Bu gün az və ortagəlirli bir vətəndaşın gedib bağ evi kirayələməsi çox çətindir. Söhbət günü 200-300 manata dəyişən bağ evlərindən gedir. İstər şərq ölkələrinin vətəndaşları, istərsə də Rusiyada yaşayan həmyerlilərimiz istirahət üçün buraya gələndə azı 10 gün qalmaq istəyirdilər. Bu da kirayə qiymətlərini rekord həddə çatdırırdı. Hazırkı vəziyyətdə sərhədlərin bağlı olması, eləcə də ümumi baş verən proseslər səbəbindən ölkəmizə turist axını zəifləyib. Buna baxmayaraq, bağ evlərinin kirayə qiymətlərində azalma müşahidə olunmur. Amma satış qiymətlərində ciddi enmələr var. Əvvəlki illərdə təxminən 400-500 min manata satılan bağ evləri hazırda 200-300 min manata təklif olunur, amma alıcısı çox azdır”.

Vergidən yayınan ev sahibləri cərimələnəcək

Gəlirli sahə iqtisadiyyatımızın inkişafına da zəmin yaradır. Buna baxmayaraq, vergidən yayınan insanlar az deyil. Ekspert deyir ki, gəlir əldə edən hər bir vətəndaş vergisini verməlidir. Əks təqdirdə... “Günlük və yaxud aylıq verilən kirayə evləri müqavilə əsasında olmalıdır. Oradan əldə edilən gəlirdən dövlətə vergi verilməlidir. Ortada rəsmi müqavilə olmadığına görə gələcəkdə hər iki tərəf problem yaşayacaq və məhkəmə belə onlara kömək edə bilməyəcək. Hətta ev sahibi məhkəməyə müraciət etdiyi zaman vergidən yayındığı üçün məsuliyyətə cəlb olunacaq və cərimələnəcək”.

Paylaş:

Baxılıb: 711 dəfə