Məktəbli formaları dəyişir

Bakı:

26 °C

49 %

2 m/s

Əlaqə

AZ RU EN

Ana səhifə / Sosial / Məktəbli formaları dəyişir

Məktəbli formaları dəyişir

24.05.2023 [11:24]

Narazılıqlar da var…

Yeganə BAYRAMOVA

Ötən il alınan məktəbli formalarından növbəti - 2023-2024-cü tədris ilində istifadə olunmayacaq. Üstəlik, bu il təkcə ibtidai siniflər yox, bütün məktəblilər forma almalıdırlar.

Qeyd edək ki, bəzi sosial şəbəkələrdə yayılan bu xəbər cari mövsümdə övladına məktəbli forması alan valideynləri ciddi narahat edib. Təbii ki, haqsız da sayılmazlar. Keçən ilin sentyabrında məktəbli formalarının satıldığı obyektlərdəki izdihamı yəqin ki, xatırlayırsız.

Bu il problem olmayacaq

“Bakı Tikiş Evi” (BTE) ASC-nin satış üzrə müdiri Etibar Əzimov “Yeni Azərbaycan”a açıqlamasında bildirib ki, formalar boz ətək, şalvar, jaket və mavi köynəkdən, 2-ci komplekt isə göy şalvar, jaket və ağ köynəkdən ibarət olacaq:

“2023-2024-cü tədris ilindən başlayaraq yalnız yeni məktəbli formalarından istifadə olunacaq. Artıq istehsala da start verilib. Ötən il valideynlər narazılıq etdilər ki, ölçüləri tapa bilmirik. Ona görə də bu ilin əvvəlindən bütün parçaları sifariş etdik. Parçalar Türkiyə və Belarusdan gəlir. Artıq tikib anbarlara yığırıq. Bu il formalarla bağlı problem olmayacaq”.

Yeni qiymətlər

E.Əzimov növbəti tədris ili üçün yenilənən məktəbli formalarının satış qiymətlərindən də danışıb: “Ətək və şalvarlar yun tərkibli parçalardan ibarətdir və qiyməti 25 manatdır. Köynəklər qısaqol və uzunqol 15 manatdır. Yerli istehsal olan jaketlər 25, Türkiyədən aldıqlarımız isə 30 manatdır”.

Yeni forma tələbi bizi maddi çətinliyə salır

Valideyn Günel Osmanova məktəbli formalarının tez-tez yenilənməsinin düzgün olmadığını düşünür: “Bir neçə müddətdir ki, növbəti dərs ilində yeni formaların istifadə olunacağı ilə bağlı xəbərlərə rast gəlirik. Halbuki məktəbli formalarını yeni almışdıq. Ötən il satış obyektlərinin qarşısındakı sıxlıq bizi çox çətin vəziyyətə saldı, forma tapa bilmirdik, ya ölçüsü uyğun gəlmirdi, ya da ümumiyyətlə, formalar bitmişdi. Formaların dəyişdirilməsi maddi baxımdan da bizə uyğun deyil”.

Formanı yeni almışdıq…

Valideyn Rəqsanə Amilova da mövcud durumdan narazıdır: “Qızım bu ilin senytabr ayında 7-ci sinfə gedəcək. Halbuki ona 2022-ci ilin senyabrında yeni forma almışdıq. İndi isə deyirlər ki, bu formalar lazım olmayacaq və yenilənən formalardan almalıyıq. Məncə məktəbli formaları ilə bağlı tez-tez belə qərarların verilməsi düzgün deyil. Bütün bunlar valideynləri maddi olaraq çətinliyə salır”.

Elm və Təhsil Nazirliyindən verilən məlumata görə, ötən il məktəbli forması alanlar yeni tədris ilində də həmin geyimlərdən istifadə edə bilərlər.

Xatırladaq ki, ötən ilin mart ayında Baş nazir Əli Əsədov “Dövlət ümumi təhsil müəssisəsi təhsilalanlarının geyim formalarının təsvirlərinin təsdiq edilməsi” haqqında qərar imzalayıb. Qərara əsasən, dövlət ümumi təhsil müəssisəsi təhsil alanlarının geyim formalarının təsvirləri təsdiq edilib. Bu Qərar 2022/2023-cü tədris ilindən tətbiq edilir. Nazirlər Kabinetinin qərarında da bildirilib ki, ötən il istifadə olunan geyim növbəti il üçün tətbiq edilməyəcək.

Paylaş:

Baxılıb: 1446 dəfə