“Diqqət-diqqət, göstərir Bakı”!

Bakı:

22 °C

60 %

3 m/s

Əlaqə

AZ RU EN

Ana səhifə / Sosial / “Diqqət-diqqət, göstərir Bakı”!

“Diqqət-diqqət, göstərir Bakı”!

14.02.2024 [11:00]

AzTV-nin 68 yaşı tamam olur...

Televiziyanı ən böyük kəşflərdən biri adlandırsaq, yəqin ki yanılmarıq. Bu gün televiziyalar həyatımızın güzgüsü rolunu oynayaraq, həyatımızın ayrılmaz hissəsi kimi bizlər üçün bir çox imkanlar yaradır. Məsələn, izləyici olaraq fərqli kanal seçim imkanları həyatımızı daha əyləncəli və maraqlı edir. Eyni zamanda televiziyalar intellektual proqramların da əsas məkanlarından biri sayılır.

Şərqdə ilk televiziya...

1956-cı il fevralın 14-də Şərqdə ilk televiziya məhz Azərbaycanda fəaliyyətə başlayıb. İlk veriliş günü ekranda sonradan Azərbaycanın tanınmış sənətkarına çevriləcək, o dövrdə isə gənc aktrisa olan Nəcibə Məlikova görünüb. O, çıxışını “Diqqət-diqqət, göstərir Bakı” kəlməsi ilə başlayıb. Həmin gün ekranda “Bəxtiyar” bədii filmi nümayiş etdirilib.

68 illik yol...

Ötən 68 il ərzində Azərbaycan Televiziyası ölkə teleməkanının formalaşmasında böyük rol oynayıb. Bu, müstəqillik dövründə yaradılan bütün telekanalların fəaliyyətində özünü qabarıq göstərib. 1957-ci ildən Azərbaycan Televiziyası həftədə beş dəfə efirə çıxıb və yalnız 1962-ci ildə gündəlik yayıma başlayıb. İldən-ilə təkmilləşən milli televiziyamız 2005-ci ilin yanvarından 24 saatlıq fasiləsiz yayıma keçib.

1991-ci ildə AzTV rəhbərliyinin təşəbbüsü ilə ölkə teleməkanında ilk özəl studiya - “215 KL” adlı studiya yaradılıb. Sonrakı illərdə Azərbaycan teleradiosunda yetişən peşəkarlar özəl televiziya və radioların qurulması prosesində fəal iştirak ediblər.

Bu gün geniş tamaşaçı auditoriyasına malik AzTV-nin verilişləri peyk vasitəsilə dünyanın bir çox yerlərində yayımlanır. Bir sıra ölkələrdə onun müxbir məntəqələri fəaliyyət göstərir. Azərbaycan həqiqətlərinin dünyaya çatdırılmasında və təbliğində ilk milli televiziyamızın rolu danılmazdır. Avropaya yayımın texniki səviyyəsinə görə Azərbaycan Televiziyası 2007-ci ildə “Avropa keyfiyyəti” medalına layiq görülüb.

Ölkə teleməkanının “ağsaqqalı”...

Hazırda Azərbaycan Televiziyasının (AzTV) efirində ərsəyə gələn hər bir verilişdə, videosüjetdə böyük yaradıcı kollektivin əməyi var. Azərbaycan Televiziyasında müxtəlif mövzularda tok-şoular, portret və səyahət verilişləri, musiqili-əyləncəli proqramlar, televiziya tamaşaları, sənədli və bədii filmlər nümayiş etdirilir. Televiziyanın analitik proqramları da kifayət qədərdir. Azərbaycan Televiziyası ölkə teleməkanının mənbəyi və məbədidir. Həqiqətən də son vaxtlar ana televiziyanın siması tamamilə dəyişib. Efirə verilən proqramlar daha baxımlı, daha cəlbedicidir. AzTV süni peyklər vasitəsilə dünyanın demək olar ki, hər yerində yayımlanır. Hazırki telekanal bolluğunda ana televiziyamız yenə də öz tamaşaçı auditoriyasını saxlayır və getdikcə artırır.

Qeyd edək ki, 1970-ci ildə AzTV Dövlət Televiziya və Radio Verilişləri Komitəsi statusu alıb. 2005-ci ildən isə Prezident İlham Əliyevin sərəncamı ilə şirkət “Azərbaycan Televiziya və Radio Verilişləri” Qapalı Səhmdar Cəmiyyətinə çevrilib.

Cəsarətlə söyləmək olar ki, ölkə teleməkanının universiteti sayılan Azərbaycan Televiziyası özünün həm texniki, həm də intellektual-yaradıcı potensialı ilə vəzifəsinin öhdəsindən məharətlə gəlir...

Y.BAYRAMOVA

Paylaş:

Baxılıb: 634 dəfə