Bakı Forumu dünyanın ən nüfuzlu platformaları sırasındadır

Bakı:

26 °C

61 %

6 m/s

Əlaqə

AZ RU EN

Ana səhifə / YAP xəbərləri / Bakı Forumu dünyanın ən nüfuzlu platformaları sırasındadır

Bakı Forumu dünyanın ən nüfuzlu platformaları sırasındadır

06.05.2024 [10:32]

Ölkəmizdə olan sabitlik imkan verir ki, Azərbaycan qlobal əhəmiyyət daşıyan tədbirlərə ev sahibliyi etsin

2008-ci ildə “Mədəniyyətlərarası dialoqun təşviqinə dair “Bakı Bəyannaməsi” ilə başlayan “Bakı Prosesi” Prezident İlham Əliyevin dəstəyi ilə qlobal hərəkata çevrilməyə başladı. İlk dəfə dövlətimizin başçısı 2010-cu ilin 23 sentyabr tarixində BMT-nin Baş Assambleyasının 65-ci sessiyasında Bakıda Ümumdünya Mədəniyyətlərarası Dialoq Forumunun keçiriləcəyini elan etdi.

1-3 may 2024-cü il tarixində isə 4 beynəlxalq təşkilatın tərəfdaşlığı, 100-dən artıq ölkədən 700-dən çox qonağın iştirakı ilə 4 konfrans, 4 plenar və 12 paneldən ibarət “Sülh və qlobal təhlükəsizlik naminə dialoq” mövzusunda VI Ümumdünya Mədəniyyətlərarası Dialoq Forumu baş tutdu. Prezident İlham Əliyev Forumun açılış mərasimində dərin məzmunlu nitq söyləyərək rəsmi Bakının dünyada haqq və ədalətin tərəfdarı olduğunu bir daha nümayiş etdirdi.

Bakı bir sıra beynəlxalq təşkilatların forumlarının, konfranslarının və digər tədbirlərinin keçirilməsinin həm təşəbbüsçüsüdür, həm də mərkəzinə çevrilib. Hazırda bütün dünyada Azərbaycanla hesablaşırlar. Bu da ölkəmizin nüfuzunun, reytinqinin qalxması və regionda kifayət qədər güclü bir dövlətə çevrilməsi deməkdir. Dünya birliyi Azərbaycanın maraqlarına hörmətlə yanaşır. Paytaxtımızda VI Ümumdünya Mədəniyyətlərarası Dialoq Forumunun keçirilməsi də bunun bariz sübutudur. Artıq Bakı Forumu geniş humanitar əməkdaşlıq məsələlərinin müzakirə edildiyi nüfuzlu bir tədbirə çevrilib.

Bakı COP29 Sammitinə ev sahibliyi edəcəyi vaxtda Azərbaycan iqlim dəyişmələrinin yaratdığı çətinliyi aradan qaldırmaq üçün millətlərin bir araya gələcəyi dünyanı formalaşdırmaq istəyir. İqlim dəyişmələrinə aid olan məsələlərə gəldikdə, bizə maliyyə vəsaiti lazımdır. Maliyyə məsələsi öz növbəsində COP29-un əsas mövzusu olacaq. Lakin dünya birliyi naminə həmrəylik və qarşılıqlı etimad lazımdır.

VI Ümumdünya Mədəniyyətlərarası Dialoq Forumu Azərbaycanda mütəmadi olaraq keçirilən tədbirlərdən biridir. Məlumdur ki, ölkəmiz son 20 ildə təkcə siyasi sahədə deyil, iqtisadiyyat, mədəniyyət və sosial sahələrdə də bir çox beynəlxalq tədbirlərə ev sahibliyi edib. Ümumiyyətlə, bu tip tədbirlərin hansı ölkədə keçirilməsinə qərar verilərkən oradakı siyasi-iqtisadi sabitlik əsas götürülür. Ölkəmizdə olan sabitlik imkan verir ki, Azərbaycan dünya üçün əhəmiyyətli olan tədbirlərə ev sahibliyi etsin. Bütün dünya ölkələrinin təmsilçiləri Bakı Forumunda iştirak etməkdə maraqlıdır. Dünyanın nüfuzlu siyasi xadimləri, rəsmi şəxslər VI Ümumdünya Mədəniyyətlərarası Dialoq Forumunda iştirak etdilər. Forumun panellərində müzakirəyə çıxarılan bütün məsələlər dünya üçün olduqca aktualdır. Bu Forumun Bakıda keçirilməsi Azərbaycan həqiqətlərinin beynəlxalq ictimaiyyətə çatdırılması, eyni zamanda, ölkəmizdə mövcud olan tolerant dəyərlərin dünyaya aşılanması baxımından böyük əhəmiyyət kəsb edir. Paytaxtımızda keçirilən VI Ümumdünya Mədəniyyətlərarası Dialoq Forumu daha məhsuldar və pozitiv məqamlarla yadda qaldı.

Əsrlər boyu tolerant dəyərlər diyarı olan Azərbaycan din, dil və etnik mənsubiyyət fərqi olmadan bütün xalqların xoşbəxt yaşadığı ölkə olub. Bakı Forumu XXI əsrdə bəşəriyyətin qarşısında duran qlobal çağırışlara cavab axtarmaq, humanitar əməkdaşlıqla bağlı mühüm məsələlərə dair dialoqlar, fikir mübadilələri aparmaq üçün nüfuzlu elmi-siyasi platformadır. Artıq altıncı dəfə keçirilən Forum gözəl ənənəyə çevrilib. Forum çərçivəsində aparılan müzakirələr humanitar əməkdaşlığın daha da dərinləşməsinə xidmət edəcək. Əsrlər boyu Azərbaycanda çoxkonfessiyalı cəmiyyət formalaşıb, müstəqillik illərində bu müsbət meyillər daha da güclənib. İslam Əməkdaşlıq Təşkilatının üzvü olan dövlətimiz humanitar sahəyə hər zaman öz töhfəsini verib və bu sahədə səylərini bundan sonra da davam etdirəcək.

İndiyədək ölkəmizdə keçirilən mədəniyyətlərarası dialoq forumlarında kifayət qədər nüfuzlu şəxslər, siyasətçilər, alimlər, Nobel mükafatçıları, beynəlxalq təşkilatların nümayəndələri, dövlət və hökumət rəsmiləri iştirak ediblər. Budəfəki Forumda da həmin ənənə davam etdirilib. Onlar Azərbaycanın timsalında inkişafı, təhlükəsizliyi təmin etmək, insana qayğı göstərmək təcrübəsini də görürlər. Eyni zamanda, Azərbaycanla əməkdaşlığın bütün dünya üçün açıq olmasını, bu kiçik bir ölkənin dünyanın daha yaxşı olmasına öz töhfəsini verməsini də müşahidə edirlər. Bütün bunlar əlbəttə ki, Prezident İlham Əliyevin yorulmaz fəaliyyəti sayəsində mümkün olur. Onun düşünülmüş daxili və xarici siyasəti Azərbaycanın problemlərinin həll edilməsinə, dünyaya inteqrasiya edilərək daha yüksək nüfuz qazanmasına səbəb olur. Dövlət başçımızın təşəbbüsü ilə keçirilən Bakı Forumu bu gün dünya siyasətinin çox vacib gündəliyindən birinə çevrilib.

Meydanəli Yolçiyev,

YAP Daşkəsən rayon təşkilatının sədri

Paylaş:

Baxılıb: 634 dəfə