20 Sentyabr: Qarabağda Dövlətçiliyin Yenidən Doğuşu

Bakı:

19 °C

88 %

2 m/s

Əlaqə

AZ RU EN

Ana səhifə / YAP xəbərləri / 20 Sentyabr: Qarabağda Dövlətçiliyin Yenidən Doğuşu

20 Sentyabr: Qarabağda Dövlətçiliyin Yenidən Doğuşu

19.09.2025 [14:40]

2023-cü ilin 20 sentyabrı Azərbaycan tarixinə yalnız bir hərbi əməliyyatın tamamlanması kimi deyil, dövlət suverenliyinin və ərazi bütövlüyünün bərpası kimi daxil oldu. Bu tarix — Xankəndi, Xocalı, Xocavənd və Ağdərə şəhərlərinin tam şəkildə Azərbaycan dövlətinin nəzarətinə keçməsi ilə ölkəmizin milli təhlükəsizlik, strateji sabitlik və siyasi iradə baxımından yeni mərhələyə qədəm qoyduğu gündür.

Bu ərazilər uzun illər ərzində münaqişə və qeyri-qanuni rejimlərin təsiri altında qalmış, nəticədə yalnız fiziki deyil, həm də sosial, iqtisadi və mədəni baxımdan dağıntılara məruz qalmışdı. Lakin 2023-cü ilin payızında əldə olunan həlledici nəticə bu torpaqların tarixində dönüş nöqtəsi oldu. Artıq bu bölgələrdə silah səsləri yox, yenidənqurma texnikasının səsi eşidilir.

Tarixi qələbənin ən güclü simvollarından biri 2023-cü ilin 8 noyabrında – Xankəndidə keçirilən hərbi parad oldu. Bu parad təkcə silahlı qüvvələrin güc nümayişi deyildi. Eyni zamanda bu, Azərbaycanın beynəlxalq hüquqa əsaslanan mövqeyinin, siyasi yetkinliyinin və bölgədəki sabitlik çağırışının nümayişi idi. Azərbaycanın dövlət bayrağı Xankəndidə dalğalanmaqla təkcə bir şəhərin deyil, bütün bölgənin taleyində yeni səhifə açdı.

Qələbədən sonra atılan addımlar yalnız fiziki infrastrukturun yenilənməsi ilə kifayətlənmir. Qarabağ Universitetinin təsis edilməsi, bölgənin sosial və elmi potensialına verilən önəmin təzahürüdür. Bu universitet təkcə gənclərin təhsil ocağı deyil, həm də Qarabağın gələcək elmi, texnoloji və mədəni inkişafının dayağı kimi formalaşır.

Eyni zamanda Hadrut, Qırmızı Bazar, Azıx kimi yaşayış məntəqələrində həyata keçirilən layihələr – yeni məktəblər, inzibati binalar, enerji infrastrukturunun qurulması və dini-mədəni abidələrin bərpası – bu torpaqlarda həyatın bütün sahələrinin kompleks şəkildə canlandırıldığını sübut edir.

Prezident İlham Əliyevin mütəmadi olaraq azad edilmiş ərazilərə, xüsusilə Xocavənd rayonuna etdiyi səfərlər, dövlət səviyyəsində bölgəyə verilən önəmi əks etdirir. Onun Edilli, Tuğ, Düdükçü, Azıx kimi kəndlərə səfərləri zamanı tarixi və arxeoloji abidələrlə tanış olması, Azərbaycanın mədəni irsinə göstərdiyi diqqətin bir nümunəsidir. Azıx mağarası və alban məbədlərinin qorunması yönündə atılan addımlar isə bu ərazilərin tarixini yaşatmaqla yanaşı, turizm və mədəniyyət baxımından potensialını artırır.

Bu gün Qarabağda yüksələn məktəblər, salınan yollar, ucalan məscidlər və bərpa olunan kəndlər göstərir ki, bölgədə yalnız keçmişlə barış deyil, həm də gələcəklə bağlı ümidlər qurulur. Vətəndaşların bu ərazilərə qayıdışı, sosial rifah layihələrinin genişlənməsi və yeni iqtisadi imkanların yaradılması, Azərbaycanın hərtərəfli və balanslı siyasətinin nəticəsidir.

20 sentyabr artıq sadəcə bir tarix deyil. Bu gün – Azərbaycanın gələcək inkişafının, bölgədə sülhün, sabitliyin və milli birliyin təməl sütunlarından birinə çevrilib. Xankəndi, Xocalı, Xocavənd və Ağdərə Azərbaycanın dirçələn ruhunu, bərpa olunan ədalətini və davamlı inkişafını təcəssüm etdirir.

Nazilə Abbasova,

Yeni Azərbaycan Partiyası Laçın rayon təşkilatının fəal üzvü

Laçın Rayon İcra Hakimiyyəti Başçısı Aparatının məsul işçisi

Paylaş:

Baxılıb: 816 dəfə