Azərbaycan–Türkmənistan münasibətlərində yeni mərhələ

Bakı:

24 °C

59 %

6 m/s

Əlaqə

AZ RU EN

Ana səhifə / YAP xəbərləri / Azərbaycan–Türkmənistan münasibətlərində yeni mərhələ

Azərbaycan–Türkmənistan münasibətlərində yeni mərhələ

24.06.2026 [11:47]

İyunun 22-də Azərbaycan Respublikasına rəsmi səfərə gələn Türkmənistan Prezidenti Sərdar Berdiməhəmmədov ilə keçirilən görüşlərdən sonra Azərbaycan Prezidenti İlham Əliyev mətbuata bəyanatla çıxış edib. Dövlət başçısı bəyanatında Azərbaycan–Türkmənistan əlaqələrinin yüksək səviyyədə inkişaf etdiyini vurğulayaraq, iki qardaş ölkə arasında əməkdaşlığın gələcək perspektivləri barədə mühüm fikirlər səsləndirib.
Prezident İlham Əliyev qeyd edib ki, Azərbaycan və Türkmənistan xalqları ortaq tarixə, milli-mənəvi dəyərlərə və qardaşlıq münasibətlərinə malikdirlər. Bu möhkəm təməl üzərində qurulan dövlətlərarası əlaqələr son illərdə siyasi, iqtisadi, nəqliyyat, enerji və humanitar sahələrdə yeni məzmun qazanıb. Görüşlər zamanı ikitərəfli münasibətlərin bütün istiqamətləri ətraflı müzakirə olunub və əməkdaşlığın daha da genişləndirilməsi ilə bağlı qarşılıqlı razılıq əldə edilib.

Prezident İlham Əliyev enerji sektorunun Azərbaycan–Türkmənistan əməkdaşlığının əsas istiqamətlərindən biri olduğunu vurğulayıb. Xəzər hövzəsinin zəngin enerji resurslarının beynəlxalq bazarlara çıxarılması sahəsində qarşılıqlı fəaliyyətin regional və qlobal enerji təhlükəsizliyinə mühüm töhfə verdiyi bildirilib. Eyni zamanda, nəqliyyat-logistika sahəsində əməkdaşlığın genişləndirilməsi, Orta Dəhlizin imkanlarından daha səmərəli istifadə olunması və yükdaşımaların artırılması məsələləri də diqqət mərkəzində olub.

Prezident İlham Əliyev çıxışında Türk dünyasında birliyin və həmrəyliyin möhkəmləndirilməsinin əhəmiyyətini xüsusi qeyd edib. Azərbaycanın və Türkmənistanın beynəlxalq təşkilatlar çərçivəsində uğurlu əməkdaşlıq həyata keçirdiyini bildirən dövlət başçısı iki ölkənin regional sabitliyə, sülhə və qarşılıqlı faydalı tərəfdaşlığa xidmət edən təşəbbüsləri dəstəklədiyini vurğulayıb.
Səfər çərçivəsində müxtəlif sahələri əhatə edən sənədlərin imzalanması da münasibətlərin inkişafında mühüm addım kimi qiymətləndirilib. Prezident İlham Əliyev əldə olunmuş razılaşmaların Azərbaycan–Türkmənistan əlaqələrinin gələcək inkişafına yeni impuls verəcəyini və əməkdaşlığın daha da dərinləşməsinə xidmət edəcəyini bildirib.

Prezidentin mətbuata bəyanatı bir daha göstərdi ki, Azərbaycan və Türkmənistan arasında strateji tərəfdaşlıq münasibətləri yüksələn xətt üzrə inkişaf edir. Qardaşlıq, qarşılıqlı hörmət və etimad prinsiplərinə əsaslanan bu əməkdaşlıq həm iki ölkənin milli maraqlarına, həm də bütövlükdə regionun sabitliyi və inkişafına mühüm töhfə verir.

Gündüz Alıkişiyev

YAP Tərtər rayon təşkilatının məsləhətçisi

Paylaş:

Baxılıb: 177 dəfə