Mətbuat cəmiyyətin aynası, ictimai fikrin formalaşmasında mühüm vasitə, dövlətlə vətəndaş arasında etibarlı informasiya körpüsüdür

Bakı:

22 °C

83 %

3 m/s

AZ RU EN

Ana səhifə / YAP xəbərləri / Mətbuat cəmiyyətin aynası, ictimai fikrin formalaşmasında mühüm vasitə, dövlətlə vətəndaş arasında etibarlı informasiya körpüsüdür

Mətbuat cəmiyyətin aynası, ictimai fikrin formalaşmasında mühüm vasitə, dövlətlə vətəndaş arasında etibarlı informasiya körpüsüdür

20.07.2026 [22:54]

İntiqam Quliyev

YAP Ağdam rayon təşkilatının sədr müavini

Hər bir xalqın inkişaf tarixində onun milli mətbuatı xüsusi yer tutur. Mətbuat cəmiyyətin aynası, ictimai fikrin formalaşmasında mühüm vasitə, dövlətlə vətəndaş arasında etibarlı informasiya körpüsüdür. Azərbaycanda hər il 22 iyul tarixinin Milli Mətbuat Günü kimi qeyd olunması da milli jurnalistikamızın zəngin tarixinə, maarifçilik ənənələrinə və söz azadlığının inkişafına verilən yüksək dəyərin göstəricisidir. Azərbaycan milli mətbuatının əsası 1875-ci il iyulun 22-də böyük ziyalı, maarifçi və publisist Həsən bəy Zərdabi tərəfindən nəşr olunan “Əkinçi” qəzeti ilə qoyulmuşdur. “Əkinçi” cəmi iki il fəaliyyət göstərsə də, xalqın maariflənməsi, elm və təhsilin təbliği, milli özünüdərkin formalaşdırılması və ana dilinin inkişafı istiqamətində misilsiz xidmətlər göstərmişdir. Bu qəzet Azərbaycan mətbuatının bünövrəsini qoyaraq sonrakı nəsil jurnalistlər üçün peşəkarlıq məktəbinə çevrilmişdir. Azərbaycan mətbuatı ötən 151 il ərzində müxtəlif tarixi mərhələlərdən keçmiş, çətin sınaqlarla üzləşmiş, lakin öz missiyasına sadiq qalaraq xalqın maraqlarını müdafiə etmişdir. Müstəqillik illərində isə milli mətbuat yeni inkişaf mərhələsinə qədəm qoymuş, demokratik cəmiyyətin qurulması, vətəndaş cəmiyyətinin inkişafı və ictimai nəzarətin təmin edilməsində mühüm rol oynamışdır. Ümummilli Lider Heydər Əliyevin rəhbərliyi dövründə Azərbaycanda mətbuatın inkişafı istiqamətində mühüm islahatlar həyata keçirilmişdir. 1998-ci ildə senzuranın ləğv edilməsi ölkədə söz və mətbuat azadlığının təmin olunması baxımından tarixi addım oldu. Bu qərar Azərbaycan jurnalistikasının müasir inkişafının əsasını təşkil edən mühüm dönüş nöqtələrindən biri kimi tarixə düşdü.

Bu gün Prezident İlham Əliyevin rəhbərliyi ilə media sahəsində aparılan islahatlar milli mətbuatın daha da güclənməsinə xidmət edir. İnformasiya təhlükəsizliyinin möhkəmləndirilməsi, media institutlarının inkişafı, jurnalistlərin sosial müdafiəsinin gücləndirilməsi və peşəkar medianın dəstəklənməsi dövlət siyasətinin prioritet istiqamətlərindəndir. Medianın İnkişafı Agentliyinin fəaliyyəti, jurnalistlərin peşə hazırlığının artırılması və müasir informasiya texnologiyalarının tətbiqi bu sahədə əldə olunan mühüm nailiyyətlərdəndir.

Prezident İlham Əliyev mətbuatın cəmiyyətin həyatındakı rolunu yüksək qiymətləndirərək bildirib: “Əlbəttə ki, mətbuatın fəaliyyəti hər bir insanı maraqlandırır. İnsanlar bütün məlumatı mətbuatdan alırlar. Ona görə, hər bir ölkədə, o cümlədən Azərbaycanda mətbuat qərəzsiz olmalıdır, çevik, operativ fəaliyyət göstərməlidir, insanları məlumatlarla tam şəkildə təmin etməlidir. Hesab edirəm ki, biz bunu Azərbaycanda görürük. Çünki bu gün Azərbaycan mətbuatı artıq yüksək səviyyəyə qalxıbdır. Mən həm operativlik, həm milli maraqların müdafiə edilməsi sahəsində mətbuatın fəaliyyətini yüksək qiymətləndirirəm.”

Milli Mətbuat Günü yalnız jurnalistlərin peşə bayramı deyil, həm də azad sözün, obyektiv informasiyanın, maarifçiliyin və milli dəyərlərin təntənəsidir. Bu gün biz milli mətbuatımızın inkişafına böyük töhfələr vermiş Həsən bəy Zərdabini və bütün görkəmli qələm sahiblərini dərin ehtiramla yad edir, onların ideyalarının bu gün də yaşadığını qürur hissi ilə qeyd edirik.

Əminliklə demək olar ki, Azərbaycan mətbuatı zəngin tarixi ənənələrinə söykənərək gələcəkdə də dövlətimizin milli maraqlarının qorunmasına, cəmiyyətin düzgün məlumatlandırılmasına və ölkəmizin beynəlxalq nüfuzunun daha da yüksəlməsinə mühüm töhfələr verəcəkdir.

Paylaş:

Baxılıb: 344 dəfə