Azərbaycan hökuməti üçün ən böyük sərvət bu ölkənin vətəndaşlarıdır

Bakı:

24 °C

59 %

2 m/s

Əlaqə

AZ RU EN

Ana səhifə / YAP xəbərləri / Azərbaycan hökuməti üçün ən böyük sərvət bu ölkənin vətəndaşlarıdır

Azərbaycan hökuməti üçün ən böyük sərvət bu ölkənin vətəndaşlarıdır

05.11.2010 [09:33]

YAP Sədrinin müavini-İcra katibi, partiyanın 19 saylı Nərimanov birinci seçki dairəsi üzrə deputatlığa namizədi Əli Əhmədov dünən “Bakı Şərab-2” ATSC-də seçicilərlə görüşüb
Yeni Azərbaycan Partiyası (YAP) Sədrinin müavini-İcra katibi, partiyanın 19 saylı Nərimanov birinci seçki dairəsi üzrə deputatlığa namizədi Əli Əhmədov dünən Nərimanov rayonunda yerləşən “Bakı Şərab-2” ATSC-də seçicilərlə görüş keçirib. Noyabrın 7-də Azərbaycanda növbəti parlament seçkilərinin keçiriləcəyini deyən Əli Əhmədov məhz, 5 il əvvəl seçicilərin dəstəyi ilə millət vəkili seçildiyini xatırladıb. YAP Sədrinin müavini bu müddətdə həm qanunvericilik çərçivəsində parlamentdə fəaliyyət göstərdiyini, həm də seçicilərin problemləri ilə məşğul olduğunu qeyd edib. Onun sözlərinə görə, ötən beş il ərzində insanların müraciətləri diqqətlə araşdırılıb və qaldırılan problemlərin həlli istiqamətində tədbirlər görülüb: “ötən 5 il ərzində mənə göstərdiyiniz dəstəyi və etimadı doğrultmağa çalışmışam. İmkanım daxilində 19-cu dairə ərazisində yaşayan sakinlərin qaldırdıqları problemlərin həll olunmasına çalışmışam. Bu problemlərin əksəriyyətini həll edə bilmişik. Bu mənə göstərdiyiniz etimad qarşısında üzərimə götürdüyüm vəzifədir. Qarşıdan gələn seçkilərdə də mən YAP-ın namizədi olaraq iştirak edirəm. Əgər mənə yenidən etimad göstərsəniz, sizinlə bağlı olan problemlərin həll olunmasına bundan sonra da köməkliyimi göstərməyə çalışacam, insanların hüquqlarının qorunması istiqamətində fəaliyyətimi davam etdirəcəm”.
Deputatlığa namizəd ölkəmizin inkişafı ilə bağlı da seçicilərə ətraflı məlumat verib. Əli Əhmədovun sözlərinə görə, 2005-ci ildən indiyə qədər Azərbaycan böyük inkişaf yolu keçib. “Bu müddət ərzində ölkəmiz əhəmiyyətli dərəcədə dəyişib. Azərbaycanın dəyişməsi hər şeydən əvvəl, hər bir vətəndaşın yaşayışının və həyat tərzinin dəyişməsini, daha da yaxşılaşmasını nəzərdə tutur. 5 il ərzində Azərbaycan iqtisadiyyatı sürətlə inkişaf edib, yüksəlib. ötən 5 il ərzində Azərbaycan iqtisadiyyatı iki dəfədən çox, dövlət büdcəsi beş dəfədən çox artıb. O yerdə ki, 5 il əvvəl problem hiss edirdinizsə, onların əksəriyyəti aradan qaldırılıb. İnsanların 5 il əvvəlki yaşayışı ilə indiki yaşayış səviyyəsi xeyli yaxşılaşıb. Azərbaycandakı bu inkişaf bütün dünyada etiraf olunur. ümumiyyətlə, görülən işlərin arxasında insan faktoru dayanır. İnsanın rifahının yaxşılaşdırılmasının yolu iqtisadiyyatın gücləndirilməsindən keçir. Ona görə də, Azərbaycan hökuməti bu istiqamətdə fəaliyyətini davam etdirir”.
YAP Sədrinin müavini qeyd edib ki, görülən işlərlə yanaşı, qarşıda duran vəzifələrin həlli də nəzərdə tutulur: “Görülən işlərin hamısı insanların rifahının yüksəlməsinə xidmət edir. Hökumət qarşıda duran məsələləri də tədricən həll etməkdədir. Bütün işləri dərhal həll etmək mümkün deyil. Yaxın tariximizə nəzər salsaq deyə bilərik ki, 10 il əvvəl sosial məsələlər ciddi idi, indi bu problemlərin çoxu həll olunub. Demək istəyirəm ki, hökumət ötən 5 il ərzində hər bir vətəndaşın həyatının yaxşılaşdırılmasından ötrü çox iş görüb. Səmimi şəkildə deyirəm ki, Azərbaycan hökuməti üçün bu ölkənin vətəndaşlarından yüksək sərvət yoxdur. Ona görə də, görülən işlərin hamısı insanların həyat şəraitinin daha da yüksəlməsinə xidmət edir”. Namizəd qeyd edib ki, iqtisadi inkişaf artdıqca əhalinin rifahı da yüksələcək və Prezident İlham Əliyevin həyata keçirdiyi siyasət nəticəsində gələcəkdə iqtisadiyyatımız daha da gücləndiriləcək.
Başqa ölkələrdə baş verən problemləri, qanlı hadisələri xatırlayan YAP Sədrinin müavini Azərbaycanda sabitliyin təmin olduğunu da vurğulayıb. Təbii ki, Azərbaycan vətəndaşları bu sabitliyin, rahatlığın, əmin-amanlığın tərəfdarıdır.
Əli Əhmədovun sözlərinə görə, bəzi deputatlığa namizədlər seçicilərə mümkün olmayan vədlər verirlər: “Bəziləri iddia edirlər ki, əməkhaqlarını, təqaüdləri 3-4 dəfə artırmaq mümkündür. Bu, real deyil. çünki neft gəlirlərinin hamısı indi insanlara əməkhaqları, təqaüdlər halında paylansa, onda ölkəmizin gələcəyi üçün problemlər ola bilər. Bu fikirləri deyənlər 1990-cı illərin əvvəllərində hakimiyyətdə olublar. Onlar hakimiyyətə gələcəkləri təqdirdə yolları qızıldan edəcəklərini vəd etsələr də, əksinə bütün yolları dağıtdılar. Amma bu gün hökumətimiz Azərbaycanın gələcəyini düşünərək düzgün siyasət həyata keçirir. Heç bir seçkidə YAP vətəndaşların səsini qazanmaq naminə həyata keçirilməsi mümkün olmayan vədlər vermir. Biz fəaliyyətimizdə reallığı üstün tuturuq. Bu siyasət uğurludur, insanlara fayda verir və onlara xidmət edir. Bundan sonra da belə olacaq”.
“Bakı Şərab-2” ATSC-nin rəhbəri Rabil Hüseynov çıxışında bildirib ki, müəssisənin kollektivi parlament seçkilərində iştirak edəcək. O, müəssisənin vaxtilə Ulu öndər Heydər Əliyev tətərfindən yaradıldığını xatırladaraq, kollektivin hər zaman Prezident İlham Əliyevin həyata keçirdiyi siyasəti dəstəklədiyini vurğulayıb: “Bu müəssisədə çalışanlar Nərimanov rayonu ərazisində yaşayırlar, Əli Əhmədovun seçicisidirlər. Biz Əli Əhmədovu yaxşı tanıyırıq və fəaliyyətinə yaxından bələdik. Heydər Əliyev siyasətinə sadiq olan bir şəxs kimi o, dövlət quruculuğu prosesində yaxından iştirak edib, bu gün isə ölkəmizin nüfuzlu siyasi xadimlərindən biri, həmçinin gözəl ziyalıdır. Ona görə də, biz 7 noyabrda məhz Əli müəllimə səs verəcəyik. Onu da bildirim ki, müəssisəmizdə çalışanların 95 faizi YAP-ın üzvləridirlər, çünki bu partiya dövlətçiliyimizə xalqımıza xidmət edir”.
Tədbirdə çıxış edən digər seçicilər də səsvermə günü YAP Sədrinin müavini Əli Əhmədova səs verəcəklərini bildiriblər.
Nardar BAYRAMLI

Paylaş:

Baxılıb: 1340 dəfə