Azərbaycan - Almaniya münasibətləri inkişafdadır

Bakı:

16 °C

82 %

1 m/s

Əlaqə

AZ RU EN

Ana səhifə / YAP xəbərləri / Azərbaycan - Almaniya münasibətləri inkişafdadır

Azərbaycan - Almaniya münasibətləri inkişafdadır

17.03.2023 [19:21]

Azərbaycanın Avropada etibarlı tərəfdaş kimi münasibətlərini ildən-ilə inkişaf etdirdiyi ölkələrdən biri də Almaniyadır. Almaniya Federativ Respublikası dünya iqtisadiyyatında və siyasətində mühüm rol oynayan ölkə olmaqla bərabər həm də, Azərbaycanla bütün sahələrdə əməkdaşlığın genişləndirilməsində maraqlıdır.

Azərbaycan Respublikasının Prezidenti cənab İlham Əliyevin Almaniyaya hələ 2004-cü ildə gerçəkləşmiş ilk rəsmi səfərinin yekunları iki ölkənin əməkdaşlığı üçün daha böyük potensialın olduğunu bir daha təsdiqləmişdir. Səfər çərçivəsində imzalanmış bir sıra sazişlər iqtisadi əməkdaşlıq baxımından geniş imkanlar açmışdır.

2007-ci ilin fevralında Prezident İlham Əliyevin Almaniya Federativ Respublikasına növbəti səfəri ikitərəfli əməkdaşlığın yeni mərhələyə qədəm qoyduğunu təsdiqləməklə yanaşı, bir sıra mühüm nəticələrlə də yadda qalmışdır. Əldə edilən nəticələr onu deməyə əsas verir ki, qloballaşan dünyanın mühüm güc və siyasət mərkəzlərindən biri kimi çıxış edən Almaniya əlverişli coğrafi mövqeyinə, zəngin təbii resurslarına və demokratik inkişaf səviyyəsinə görə Cənubi Qafqazın lider dövlətinə çevrilmiş Azərbaycanla əməkdaşlığın daha da dərinləşməsinə, respublikamızın avrostrukturlara daha dinamik inteqrasiyasına ciddi maraq göstərir. Rəsmi Berlin Bakı-Tbilisi-Ceyhan neft və Bakı-Tbilisi-Ərzurum qaz kəmərlərini reallaşdıran Azərbaycanın bütövlükdə Avropanın enerji təhlükəsizliyindəki mühüm rolunu yüksək qiymətləndirir. Almaniya gələcəkdə enerjiyə artan daxili tələbatlarını Azərbaycandan idxal edəcəyi neft və təbii qaz hesabına təmin etmək, beləliklə, həm də alternativ enerji mənbəyi qazanmaq niyyətindədir. Bundan başqa, respublikamızın Avropa İttifaqı ilə əməkdaşlıq əlaqələrinin genişləndirilməsi mühüm geosiyasi əhəmiyyət kəsb edən proses olaraq Almaniya üçün də vacib önəm daşıyır.

Azərbaycan Respublikasının Prezidenti cənab İlham Əliyev 2023-cü ilin 13-14 mart tarixində Almaniya Federativ Respublikasına işgüzar səfəri zamanı Almaniya Prezidenti Frank - Valter Ştaynmayerlə, Almaniya Federativ Respublikasının Kansleri Olaf Şolts ilə və Almaniyanın aparıcı şirkətlərinin rəhbərləri ilə görüşmüşdür. Cənab Prezident bu görüşlərdə bir çox məsələlrə münasibət bildirmiş və mühüm mesajlar vermişdir. İlham Əliyev cənabları Azərbaycanda iqtisadiyyatın mövcud vəziyyəti barədə məlumat verərkən bildirilmişdir ki, son 20 ildə iqtisadiyyatımız üç dəfədən çox artıb. Bu, dünya rekordu hesab oluna bilər. Eyni zamanda, birbaşa xarici borcun azalması strategiyasına əsaslanaraq, xarici borcumuzun azaldığı və 2023-cü il yanvarın 1-nə olan məlumata görə, ÜDM-in 10 faizindən aşağı olduğu bldirilmişdir. Azərbaycan - Ermənistan münasibətlərinə toxunan cənab Prezidentimiz qeyd etmişdir ki, Azərbaycan 30 ilə yaxın erməni işğalına məruz qalmışdır. Bu işğal və etnik təmizləmə nəticəsində torpaqlarımızın 20 faizə yaxını işğal edilmiş və bir milyon azərbaycanlı Ermənistan tərəfindən öz doğma torpaqlarından qovularaq qaçqın - köçkün vəziyyətinə düşmüşdü. Artıq münaqişə arxada qalmışdır, indi sülhün zamanı çatıbdır. Azərbaycan Ermənistana 5 prinsip əsasında sülh müqaviləsini təklif edib. Ermənistan bu şansı qaçırmamalıdır. Nəhayət, Cənubi Qafqazda sülh və əməkdaşlıq dövrü başlamalıdır.

Enerji sahəsi ilə bağlı Möhtərəm Prezidentimiz bildirdi ki, bərpaolunan enerji növlərinin birgə işlənməsi və istismarı istiqamətində çox gözəl imkanlar var. Təkcə Xəzər dənizinin külək enerji potensialı 157 qiqavata bərabərdir və artıq bir neçə kontrakt imzalanmışdır. Gələcəkdə Azərbaycan Avropaya təkcə təbii qaz yox, yaşıl enerjini də ixrac edən ölkəyə çevriləcəkdir. Almaniya iqtisadi inkişaf baxımından Avropa məkanında aparıcı rol oynayır və Avropada Ümumi Daxili Məhsulun həcminə görə dünyada dördüncü ən böyük iqtisadiyyata malikdir.

Əlbəttə ki, hazırkı səfər Azərbaycan - Almaniya münasibətlərinin daha da inkişaf etdirilməsinə xidmət edəcəkdir. Siyasi, iqtisadi, mədəni, humanitar istiqamətlərdə yeni əməkdaşlıq platformaların yaranma ehtimalı da yüksəkdir. Almaniya ilə Azərbaycanın hərtərəfli əməkdaşlığı hər iki tərəf üçün olduqca faydalıdır. Eyni zamanda, Qarabağda yenidənqurma və quruculuq işlərinin getdiyi bir vaxtda almaniyalı iş adamları və biznesmenlərilə Prezident İlham Əliyevin görüşü və işğaldan azad edilən bölgələrin turizm potensialı ilə bağlı təqdimatın keçirilməsi də vacib əhəmiyyətə malikdir. Bu, həm də bərpa - quruculuq işlərinə Alman şirkətlərinin cəlb edilməsi baxımından önəmlidir. Ümumilikdə Azərbaycan Respublikasının Prezidenti cənab İlham Əliyevin Almaniyaya səfəri Azərbaycan - Almaniya münasibətlərinin inkişafında yeni bir dövrün başlanmasından xəbər verir.

Çingiz Məmmədov

YAP Qazax rayon təşkilatının əməkdaşı

Paylaş:

Baxılıb: 547 dəfə