Qarşılıqlı tərəfdaşlıq, müttəfiqlik səviyyəsi

Bakı:

26 °C

57 %

4 m/s

Əlaqə

AZ RU EN

Ana səhifə / YAP xəbərləri / Qarşılıqlı tərəfdaşlıq, müttəfiqlik səviyyəsi

Qarşılıqlı tərəfdaşlıq, müttəfiqlik səviyyəsi

10.07.2023 [12:36]

Dünya siyasi arenasında yerini və çəkisini möhkəmləndirən Azərbaycan beynəlxalq münasibətlərini inkişaf etdirən ölkələrdən birinə çevrilmişdir. Tam müstəqil xarici siyasət həyata keçirən Prezident İlham Əliyevin uğurlu diplomatiyası ilə Azərbaycan əksər dövlətlərin Cənubi Qafqaz regionundakı ən etibarlı tərəfdaşına çevrilib. Bir çox dövlətlərlə strateji tərəfdaşlıq, səmimi dostluq münasibətlərinin mövcudluğu və getdikcə inkişaf etməsi bunu deməyə əsas verir. Azərbaycan həmçinin Mərkəzi avropa dövlətləri ilə fəal əməkdaşlıq kursunu davam etdirir. Onlardan biri də Albaniyadır. Bu ölkə ilə çoxtərəfli əməkdaşlığın inkişafı Azərbaycanın xarici siyasətinin vacib istiqamətlərindən biridir.

Qeyd edək ki, Azərbaycan ilə Albaniya arasında diplomatik münasibətlər 1993-cü ilin sentyabrın 23-də qurulub. Bu münasibətlərin 30-cu ildönümü ilə əlaqədar gələn il Albaniyada “Azərbaycan Həftə”sinin təşkil olunması planlaşdırılır. İki ölkə arasında siyasi dialoq daim yüksək səviyyədə olub. Albaniya prezidentləri ölkəmizə 5 işgüzar səfər, Baş nazirləri isə 2 rəsmi və 2 işgüzar səfər ediblər. 2022-ci il aprelin 14-də Azərbaycana rəsmi səfər edən Albaniyanın Baş naziri Edi Rama Bakıda olarkən deyib: “Albaniya ATƏT-in sədri və hazırda BMT Təhlükəsizlik Şurasının qeyri-daimi üzvü kimi hər zaman Azərbaycanı, həqiqəti və ölkənizin tarixi hüquqlarını dəstəkləyir və bunu etməyə davam edəcək”. Baş nazir, həmçinin əlavə edib: “Biz sizin qonşunuz Ermənistanla sülhə və uzunmüddətli əməkdaşlığa yönəlmiş olduqca nümunəvi səylərinizi alqışlayırıq”.

Onu da qeyd edək ki, keçən il Albaniyanın Baş naziri iki dəfə, Prezident Bayram Beqay bu ilin martında Azərbaycana işçi səfərə gəlmişdi. Təkcə bu səfərlər Azərbaycan-Albaniya əlaqələrinin nə qədər sıx olduğunu nümayiş etdirir.

İyulun 7-də keçirilən görüşdən sonra Azərbaycan Respublikasının Prezidenti İlham Əliyev və Albaniya Respublikasının Prezidenti Bayram Beqay mətbuata bəyanatlarla çıxış ediblər. Hər iki dövlət başçısı 30 illik dostluq münasibətlərinin artıq tərəfdaşlıq, müttəfiqlik səviyyəsinə qədər inkişafından məmnununluq ifadə edərək bundan sonra da qarşılıqlı əməkdaşlığın inkişafında maraqlı olduqlarını ifadə etmişlər.

Cənab Prezident İlham Əliyev qeyd etmişdir ki, ölkələrimiz arasında dostluq və qarşılıqlı dəstəyə əsaslanan ikitərəfli əlaqələrdə çox xüsusi dinamika yaranmışdır. Azərbaycan və Albaniya beynəlxalq təşkilatlarda fəal çalışır, ilk növbədə Birləşmiş Millətlər Təşkilatında və İslam Əməkdaşlıq Təşkilatında bir-birimizə dəstək veririk. Eyni zamanda, Azərbaycanın olmadığı təşkilatlarda Albaniyaya ölkəmizi daim dəstəkləyir: “Ötən ilki Frankofoniya Sammitində Azərbaycana verdiyi dəstəyə görə mən cənab Prezidentə və Albaniya hökumətinə artıq öz minnətdarlığımı bildirdim. O vaxt Frankofoniya təşkilatının üzv dövlətlərindən biri yekun sənədə bir bəndi əlavə etmək və qəbul etdirməyə cəhd göstərdi. Bu, anti-Azərbaycan mahiyyəti olan bənd idi. Albaniya həmin bəndi bloklayan ölkə oldu. Həmin addım dostluğun, eləcə də ölkələrin ərazi bütövlüyü və suverenliyi kimi beynəlxalq hüququn əsas prinsiplərinə qəti sadiqliyin təzahürü oldu. Hətta Azərbaycan özünü müdafiə etmək fürsətinə malik olmadığı təşkilatlarda belə, bizim Albaniya kimi qardaş ölkəmiz var və o, bu dəstəyi verdi. Buna görə biz çox minnətdarıq.”

Qeyd edək ki, Azərbaycan və Albaniyanın TAP layihəsinin üzvləri olduğunu və Cənub Qaz Dəhlizinin icrasında ölkələrimizin çox önəmli rol oynadıqlarını vurğuladı. Azərbaycanın və Avropa İttifaqının sədrliyi ilə bu günə qədər keçirilmiş Cənub Qaz Dəhlizi Məşvərət Şurasının bir çox toplantılarında Albaniya nümayəndələri həmişə çox fəal iştirak etmişlər.

Cənab Prezident mətbuata Bəyanatında qeyd etmişdir ki, bu vaxta qədər əməkdaşlığımızın əsas meyarı enerji sektoruna aid olub. Həmin əməkdaşlıq nəinki ölkələrimiz, o cümlədən böyük sayda digər ölkələr, xüsusən də Cənub Qaz Dəhlizinin hissəsi olan TAP üçün əhəmiyyətlidir. Həmin boru kəməri Albaniyanın ərazisindən keçir. Hazırda o, enerji təhlükəsizliyinin mənbəyidir, Azərbaycan və Avropa İttifaqının qaz təchizatı sahəsində fəal işini, eləcə də Avropa İttifaqı ilə Azərbaycan arasında imzalanmış Enerji sahəsində Strateji Tərəfdaşlıq sənədini nəzərə alsaq, bütün bunlar, təbii ki, ölkələrimiz arasında sıx əməkdaşlıq üçün mühüm meyarlardır. Çünki bir çox Avropa ölkələri üçün enerji təhlükəsizliyi, həmçinin Cənub Qaz Dəhlizi vasitəsilə təmin edilir. Həmin ölkələrin sayı artır. Avropa İttifaqı bazarına Azərbaycanın təbii qaz ixracı artır. Həcmlər artır və onun coğrafiyası genişlənir.”

Albaniyanın qazlaşdırılması layihəsinin uğurlu gedişini qeyd edən ölkəmizin başçısı bildirmişdir ki ilin sonuna qədər layihənin texniki əsaslandırılması başa çatacaqdır. Qazpaylayıcı şəbəkəsinin quraşdırılmasından sonra isə bu ölkəyə Azərbaycan sərmayəsi daxil olacaq və ölkəmiz üzərinə götürdüyü öhdəliyi laqincə sona çatdıracaqdır.

Eyni zamanda Tiranada və Bakıda hər iki ölkənin səfirliklərinin fəaliyyətə başlamasını qeyd edən cənab Prezident bundan sonra da ölkələrimiz arasında fəal siyasi dialoqun, qarşılıqlı əməkdaşlığın inkişafı sahəsində səylərin artırılacağını vurğulamışdır.

Natiq Quluzadə,

YAP Zəngilan rayon təşkilatının sədri

Paylaş:

Baxılıb: 605 dəfə