Qürur anları

Bakı:

25 °C

57 %

3 m/s

Əlaqə

AZ RU EN

Ana səhifə / YAP xəbərləri / Qürur anları

Qürur anları

28.09.2023 [13:04]

Çoxdan gözlənilən tarixi gün gəlib çatdı. Sentyabrın 25-də Naxçıvana gələn Tükiyə Cümhurbaşqanı, Türk dünyasının önəmli dövlət başçısı və Azərbaycan Respublikasının Prezidenti, müzəffər Ali Baş Komandan Naxçıvanda İğdır-Naxçıvan qaz kəmərinin təməlqoyma mərasimində iştirak etdilər.

Bir sıra sənədlər imzalayan dövlət başçılarımız mətbuata bəyanatla çıxış edərək mövcud siyasi və iqtisadi vəziyyəti bir daha dəyərləndirdilər.

Ölkəmizin başçısı cənab İlham Əliyev öz çıxışında qeyd etdi ki, Naxçıvan məlum təcavüz hadisələrindən sonra faktiki blokada şəraitində 15 il qazsız, işıqsız qaldı. Azərbaycanın əsas hissəsi ilə əlaqəsi tam kəsilmiş Naxçıvanın 90-cı illərdə işğal təhlükəsi vardı və bu təhlükəni yalnız Ümummilli lider Heydər Əliyev sovuşdura bildi və Naxçıvanı erməni təcavüzündən qorudu. Yalnız 2005-ci ildə İrandan mübadilə yolu ilə qaz alınması sayəsində Naxçıvana qaz verilmişdir.

Cənab Prezident qeyd etdi ki, “İğdır-Naxçıvan qaz kəmərinin çəkilişi isə ikinci xətt vasitəsilə Naxçıvana təbii qazın verilməsinə şərait yaradacaq.”

Bu layihənin reallaşması Türkiyə-Azərbaycan münasibətlərinin əlaqələrinin daha da inkişaf etməsinə imkan verməklə yanaşı, Naxçıvanın enerji təhlükəsizliyi üçün böyük əhəmiyyətə malikdir.

Ölkəmizin enerji imkanlarından və potensialından söz açan cənab Prezident qeyd etdi: “Bir neçə gündən sonra, daha doğrusu, üç gündən sonra Naxçıvanda Türkiyə və Azərbaycanın vəzifəli şəxslərinin, beynəlxalq təşkilatların iştirakı ilə Türkiyə-Azərbaycan III Enerji Forumu keçiriləcəkdir və əminəm ki, bu forumun nəticələri uğurlu olacaq. Naxçıvanın qazı, nefti olmasa da, günəşi var və Naxçıvanda günəş elektrik stansiyalarının inşası ilə bağlı bizim böyük planlarımız var. Bu planlar gerçəkləşərsə, Naxçıvan yaşıl enerji zonasına çevrilə bilər. Çünki burada həm günəş, həm külək, eyni zamanda, su elektrik stansiyalarının inşası üçün böyük potensial var və gələcəkdə Naxçıvandan Türkiyəyə ən azı 1000 meqavat həcmində yaşıl enerji ixracı da mümkün olacaqdır.”

Azərbaycanın son günlərdə həyata keçirdiyi antiterror əməliyyatına toxunan ölkə başçısı bildirdi ki, Azərbaycan 5 gün bundan əvvəl öz ərazi bütövlüyünü tam ölçüdə bərpa etmiş, Ermənistan Ordusunu 24 saat ərzində darmadağın edərək təslim olmağa məcbur etmişdir.

Qarabağda yaşayan erməniəsili vətəndaşların Azərbaycan cəmiyyətinə inteqrasiyasının uğurlu olacağına əmin olduğunu bildirən dövlətimizin başçısı dedi: “Əziz qardaşım, bu hadisə baş verəndə Siz Amerikada, Nyu-Yorkda idiniz, Birləşmiş Millətlər Təşkilatının Baş Assambleyasında iştirak etmişdiniz və orada dünyanın ən ali kürsüsündən Azərbaycan dövlətinin maraqlarını ifadə edən bəyanatlar vermişdiniz, ədalətli bəyanatlar vermişdiniz, tamamilə beynəlxalq hüquqa əsaslanmış bəyanatlar vermişdiniz: Qarabağ Azərbaycan torpağıdır. Bu, həm həqiqətdir, eyni zamanda, beynəlxalq hüquqa tam uyğundur. Eyni zamanda, Türkiyə tərəfindən göstərilən növbəti qardaşlıq addımıdır. İkinci Qarabağ müharibəsi zamanı Siz və bütün Türkiyə xalqı bizim yanımızda idi. Müharibənin ilk saatlarında “Azərbaycan yalnız deyil, Türkiyə Azərbaycanın yanındadır” deməyiniz bir çoxları üçün ciddi siqnal idi, mesaj idi. Azərbaycan xalqı bu siyasi və mənəvi dəstəyi heç vaxt unutmur və unutmayacaq.”

Bəli, qardaş Türkiyənin mənəvi və siyasi yardımı daim Azərbaycan üçün mühüm əhəmiyyət kəsb etmişdir. Bunu Azərbaycan xalqı da, onun Müzəffər Lideri də yükəsk qiymətləndirir.

Bakı-Tbilisi-Qars dəmiryolunun logistika imkanlarından danışan cənab Preizdent bildirmişdir: “... yaxın aylarda bu yolun imkanları 1 milyon tondan 5 milyon tona qədər artırılacaq. Azərbaycanı Naxçıvan və Türkiyə ilə birləşdirən dəmir yolunun inşası da uğurla gedir. Azərbaycan ərazisində işlər böyük ehtimalla gələn ilin sonunda başa çatmalıdır. Yəni, bütün bu tarixi layihələr bir daha onu göstərir ki, bizim dövlətlərimiz nə qədər bir-birinə bağlıdır, bir-birinə yaxındır. Biz bir-birimizə dəstək verməklə, eyni zamanda, regional məsələləri də düz istiqamətə yönəldirik. Yəni, bizim müştərək maraqlarımız ondan ibarətdir ki, bölgədə sülh olsun, əmin-amanlıq olsun, müharibələr olmasın, ölkələrin ərazi bütövlüyü təmin edilsin. Azərbaycana göstərdiyiniz dəstək həm İkinci Qarabağ müharibəsi zamanı, həm ondan əvvəl, həm də ondan sonra məhz bu məqsədə çatmaq üçün önəmli amildir.”

Cənab Prezidentin söylədiyi kimi, bu günlərdə sözün həqiqi mənasında tarixi anlar yaşayırıq. Ərazi bütövlüyümüzün bərpası, yeni layihələrə start verilməsi, Türkiyə-Azərbaycan əlaqələrinin ən yüksək səviyyədə inkişafı bizə qürur duymaq imkan bəxş etmişdir. Təbii ki, bu anların yaşanmasında böyük rolu olan cənab Prezident İlham Əliyevin və sayın Cümhurbaşqanı Rəcəb Tayyip Ərdoğanın tarixi xidmətlərini xalqlarımız heç vaxt unutmayacaqdır.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 598 dəfə