Azərbaycanın nüfuzu durmadan artır

Bakı:

24 °C

88 %

3 m/s

Əlaqə

AZ RU EN

Ana səhifə / YAP xəbərləri / Azərbaycanın nüfuzu durmadan artır

Azərbaycanın nüfuzu durmadan artır

15.12.2023 [13:58]

Azərbaycan Respublikasının bugünkü inkişafının təməlində müstəqillik qazandıqdan sonra həyata keçirilən daxili və xarici siyasət strategiyası dayanır. Bu günə qədər qonşu və qonşu olmayan dövlətlərlə qarşılıqlı faydalı əməkdaşlığa əsaslanan münasibətlərin inkişafı sahəsində mühüm addımlar atılmışdır. Azərbaycan beynəlxalq əlaqələr sahəsində mühüm layihələr həyata keçirmiş və dünyanın aparıcı dövlətləri ilə qarşılıqlı əməkdaşlıqlar qurmuşdur.

Məlumdur ki, artıq Azərbaycan dünyada qaz ixrac edən ölkə kimi məşhurlaşıb. Bu, ondan irəli gəlir ki, xüsusən Avropa ölkələrinin Azərbaycan qazına olan tələbatı artmaqda davam edir. Cari ilin dekabr ayının 10-da Serbiyanın Niş şəhərində Serbiya-Bolqarıstan Qaz İnterkonnektorunun açılış mərasimində Azərbaycanla bağlı deyilən fikirlər bunu bir daha sübut edir. Prezident İlham Əliyev tədbirdə çıxış edərək Azərbaycanın qaz ixracı coğrafiyasının daha da genişləndiyini deyib: “Yəni deyə bilərəm ki, bugünkü mərasim dostluq mərasimidir, strateji tərəfdaşlıq mərasimidir. Əlbəttə ki, hər iki prezidenti bugünkü açılış münasibətilə ürəkdən təbrik etmək istəyirəm. Bu, Serbiya və Bolqarıstanın enerji təhlükəsizliyinə böyük töhfə verə biləcək layihədir. Eyni zamanda, Azərbaycan xalqını təbrik etmək istəyirəm. Çünki Azərbaycanın qaz ixracı coğrafiyası daha da genişlənir. Hazırda biz təbii qazımızı səkkiz ölkəyə ixrac edirik, Serbiya doqquzuncu ölkədir. Bu doqquz ölkənin yeddisi Avropa ölkəsidir və təbii ki, bugünkü mərasim - interkonnektorun fəaliyyətə başlaması Avropanın enerji təhlükəsizliyinə də önəmli töhfə verəcəkdir”.

Keçən il Avropa İttifaqı ilə Azərbaycan arasında enerji sahəsində strateji tərəfdaşlıq üzrə Anlaşma Memorandumu imzalanmışdır və bu memoranduma görə, Azərbaycan 2037- ci ilə qədər Avropaya göndərilən qazın həcmini iki dəfə artırmalıdır. 2021- ci ildə Avropa məkanına qaz ixracımız 8 milyard kubmetrdən bir qədər çox olmuşdursa, bu il bu, təxminən 12 milyard kubmetrə çatacaq. Azərbaycanın bütövlükdə enerji strategiyası uğurla icra edilir. Bizim tərəfimizdən irəli sürülmüş və icra edilmiş layihələr Avropanın və Asiyanın Avrasiyanın enerji xəritəsini böyük dərəcədə yenidən tərtib etmişdir. Bakı – Tbilisi – Ceyhan, Bakı – Supsa neft kəmərləri bu gün Azərbaycan neftini Aralıq dənizinin və Qara dənizin bazarlarına çatdırır. Cənub Qaz Dəhlizi uzunluğu 3500 kilometr olan nəhəng infrastruktur layihəsi Avropanın enerji təhlükəsizliyinə çox böyük töhfə verir. Ölkəmizin Bolqarıstana qaz təchizatı iki il bundan əvvəl başlamışdır. 2021 -ci ildə 270 milyon kubmetr qaz təchiz edilmişdir. Keçən il 500 milyon kubmetrdən bir qədər çox. Bu il isə bu rəqəm 1 milyard kubmetrə yaxın olacaqdır.

Bolqarıstanın Prezidenti Rumen Redevinin çıxışında Azərbaycanın etibarlı tərəfdaş olduğunu vurğulayaq bildirib ki, “Bu gün bizi yalnız təbii qaz deyil, ölkələrimizi ugurlu və faydalı əməkdaşlıq bağlayır. Bu gün ölkələrimiz arasındakı layihə Avropanın enerji xəritəsini dəyişir. Layihəmiz region üçün təhlükəsizliyə zəmanət verir. Burada nəhayət ki, Bolqarıstan Azərbaycan qazını qəbul edə bilir. Biz on il öncə nə Avropadan, nə də ki, Azərbaycandan qaz ala bilmirdik”. Bolqarıstan Prezidenti Rumen Redevi, Azərbaycan Prezidenti İlham Əliyevə təşəkkürünü bildirib. “Siz sübut etdiniz ki, Bakı bütün anlaşmalara ciddi yanaşır, və burdan bütün avropalı həmkarlara bildirirəm ki, Azərbaycan etibarlı tərəfdaşdır”. Onuda vurğulamaq lazımdır ki, Serbiya, Bolqarıstan və Şərqi Avropa qrupuna daxil olan digər ölkələrin Azərbaycanın namizədliyini dəstəkləyərək növbəti COP29 konfransının Azərbaycanda keçirilməsinə dəstək verməsi də dövlətlərarası dostluğumuzun bariz nümunəsinin göstəricisidir.

Varis Rüstəmov,

Yeni Azərbaycan Partiyası Sabirabad rayon təşkilatının sədri

Paylaş:

Baxılıb: 621 dəfə