Birgə Komissiyanın 10-cu iclası...

Bakı:

27 °C

58 %

2 m/s

Əlaqə

AZ RU EN

Ana səhifə / Xəbər lenti / Birgə Komissiyanın 10-cu iclası...

Birgə Komissiyanın 10-cu iclası...

26.04.2024 [10:37]

Macarıstan şirkətləri Qarabağın bərpasında iştirak edəcək

Nardar BAYRAMLI

Azərbaycanın xarici siyasətində Mərkəzi və Şərqi Avropa ölkələri, o cümlədən Macarıstanla əməkdaşlığın inkişafı vacib yer tutur. İkitərəfli münasibətlər dostluq, əməkdaşlıq və strateji tərəfdaşlıq ruhunda inkişaf edir. Macarıstan ilə əlaqələrin hərtərəfli inkişaf etdirilməsi ölkəmizin xarici siyasətinin mühüm istiqamətlərindəndir. Bu ölkə Azərbaycanın strateji tərəfdaşı və Avropa İttifaqında ən etibarlı tərəfdaşlarından biridir.

Qeyd edək ki, aprelin 25-də Bakıda Azərbaycan və Macarıstan hökumətləri arasında iqtisadi əməkdaşlıq üzrə Birgə Komissiyanın 10-cu iclası keçirilib. İclasda iştirak etmək üçün komissiyanın Macarıstan tərəfindən həmsədri, Macarıstanın xarici işlər və ticarət naziri Peter Siyartonun başçılıq etdiyi nümayəndə heyəti ölkəmizə səfər edib. Komissiyanın Azərbaycan tərəfindən həmsədri, əmək və əhalinin sosial müdafiəsi naziri Sahil Babayev və Peter Siyarto arasında keçirilən təkbətək görüşdə ölkələrimiz arasında əlaqələrin mövcud vəziyyəti və iclasın gündəliyindəki məsələlərə dair fikir mübadiləsi aparılıb.

Nümayəndə heyətlərinin geniş tərkibdə iştirakı ilə keçirilən Birgə Komissiyanın iclasında S.Babayev Azərbaycan və Macarıstan dövlət başçılarının siyasi iradəsi, səyləri ilə iki ölkə arasında əlaqələrin strateji tərəfdaşlıq səviyyəsinə yüksəldiyini vurğulayıb. Ötən il Azərbaycanla Macarıstan arasında genişləndirilmiş strateji tərəfdaşlıq haqqında Birgə Bəyannamənin, digər bir sıra əməkdaşlıq sənədlərinin imzalanmasının bu əlaqələrin ən yüksək səviyyəyə qalxaraq daha da inkişaf etməsinə imkan yaratdığı bildirilib. Hökumətlərarası Birgə Komissiyanın da əməkdaşlıq əlaqələrinin getdikcə genişlənməsinə xidmət etdiyi qeyd olunub.

S.Babayev ölkələrimiz arasında ticarət dövriyyəsində artım tempinin olduğu??, 2023-cü ilin müvafiq dövrü ilə müqayisədə 2024-cü ilin yanvar-fevral aylarında Macarıstan ilə ticarət dövriyyəsinin 40,49 faiz artdığını bildirib. Ötən dövrdə Bakı və Budapeştdə keçirilən biznes forumların, işgüzar görüşlərin, digər tədbirlərin əlaqələrin inkişafında önəmi diqqətə çatdırılıb.

P.Siyarto isə ölkəsi ilə Azərbaycan arasında əlaqələrin ildən-ilə inkişaf etməkdə olduğunu, göstərilən qarşılıqlı səylər nəticəsində əməkdaşlıq gündəliyinin genişlənməkdə olduğunu bildirib. Onun sözlərinə görə, Azərbaycan və Macarıstan uzun illərdir ki, dost və strateji tərəfdaşdır. Dostluğumuz təkcə maraqlara deyil, həm də ümumi dəyərlərə əsaslanır. Nazir qeyd edib ki, Azərbaycanla enerji sahəsində əməkdaşlıq Macarıstanın enerji təhlükəsizliyini artırır.

P.Siyarto həmçinin deyib ki, Macarıstan şirkətləri Qarabağın yenidən qurulmasında və bərpasında iştirak etməkdə maraqlıdır: “Bu ilin noyabrına qədər Macarıstan şirkətlərinin iştirak edə biləcəyi sektorlar müəyyənləşəcək. Gələn ilin sonuna qədər Macarıstan şirkətləri bölgənin rekonstruksiyasına töhfə verməyə başlayacaq. Macarıstan regionda sülhün və rifahın bərpası, Qarabağın minalardan təmizlənməsi üçün dəstək verməyə hazırdır”. Nazir əlavə edib ki, Azərbaycan və Ermənistan tərəfindən sərhəd xəttinin müəyyən olunması istiqamətində atılan son addımları alqışlayır.

İclasda daim genişlənən ikitərəfli münasibətlərin səviyyəsindən məmnunluq ifadə olunub. İki ölkənin enerji, yaşıl enerjinin inkişafı və ötürülməsi, ikitərəfli və tranzit yük axınlarının həcminin artırılması, qarşılıqlı investisiyaların təşviqi, habelə kənd təsərrüfatı, əmək, məşğulluq, sosial müdafiə, təhsil, mədəniyyət, turizm, səhiyyə və s. sahələrdə gələcək əməkdaşlıq istiqamətləri müzakirə olunub.

S.Babayev və P.Siyarto Azərbaycan və Macarıstan hökumətləri arasında iqtisadi əməkdaşlıq üzrə Birgə Komissiyanın 10-cu iclasının yekunlarına dair Protokolu imzalayıblar.

Birgə Komissiyanın həmsədrləri brifinq keçirib, iclasın yekunlarına dair məlumat veriblər. Onlar imzaladıqları sənəddə gələcək əməkdaşlıq istiqamətlərinin əks olunduğunu və Azərbaycan-Macarıstan əlaqələrinin qarşıdakı dövrdə də genişlənməkdə davam edəcəyinə əminliklərini ifadə ediblər.

Paylaş:

Baxılıb: 604 dəfə