Azərbaycan dili: qloballaşan dünyada milli kimliyimizi yaşadan əsas dəyər

Bakı:

28 °C

48 %

7 m/s

Əlaqə

AZ RU EN

Ana səhifə / Xəbər lenti / Azərbaycan dili: qloballaşan dünyada milli kimliyimizi yaşadan əsas dəyər

Azərbaycan dili: qloballaşan dünyada milli kimliyimizi yaşadan əsas dəyər

31.07.2026 [12:45]

XXI əsr bəşəriyyətə yeni imkanlar qazandırmaqla yanaşı, xalqlar qarşısında ciddi çağırışlar da formalaşdırıb. İnformasiya texnologiyalarının sürətli inkişafı, rəqəmsal platformaların geniş yayılması və qloballaşmanın təsiri milli dillərin qorunması məsələsini dövlət siyasətinin mühüm istiqamətlərindən birinə çevirib. Belə bir dövrdə Azərbaycan dövlətinin ana dilimizin inkişafına və saflığının qorunmasına xüsusi diqqət yetirməsi milli maraqların müdafiəsinin ən vacib tərkib hissələrindən biridir.

Hər il avqustun 1-də qeyd olunan Azərbaycan əlifbası və Azərbaycan dili Günü bizə bir daha xatırladır ki, dil təkcə ünsiyyət vasitəsi deyil. Dil xalqın milli yaddaşı, mədəni sərvəti, dövlətçilik ənənələri və gələcək inkişafının əsas dayaqlarındandır. Azərbaycan dili bu gün müstəqil dövlətimizin mühüm atributlarından biri olmaqla yanaşı, dünya azərbaycanlılarını vahid milli kimlik ətrafında birləşdirən ən güclü mənəvi bağdır.

Azərbaycan dilinin bu günkü yüksək statusa çatması təsadüfi deyil. Bunun əsasında Ümummilli Lider Heydər Əliyevin müəyyən etdiyi ardıcıl dövlət dil siyasəti dayanır. Məhz onun siyasi uzaqgörənliyi nəticəsində Azərbaycan dili dövlət idarəçiliyinin, təhsil sisteminin, elm və mədəniyyətin bütün sahələrində öz layiqli mövqeyini möhkəmləndirdi.

Bu siyasi xətt bu gün Prezident İlham Əliyev tərəfindən uğurla davam etdirilir. Dövlət başçısı dəfələrlə vurğulayıb ki, Azərbaycan dilinin saflığının qorunması milli təhlükəsizlik və milli kimlik məsələsidir. Onun fikrincə, xalq öz dilinə sahib çıxmadıqda, zaman keçdikcə milli-mənəvi dəyərlər də zəifləyə bilər. Bu baxımdan Azərbaycan dilinin inkişafı istiqamətində qəbul olunan fərman və sərəncamlar strateji əhəmiyyət daşıyır.

Son illərdə Azərbaycan dilinin elektron məkanda daha geniş istifadəsinin təmin olunması, latın qrafikalı nəşrlərin artırılması, elektron lüğətlərin hazırlanması, rəqəmsal resursların zənginləşdirilməsi və dövlət dilinə nəzarət mexanizmlərinin gücləndirilməsi istiqamətində mühüm addımlar atılmışdır. Bu tədbirlər müasir dövrün tələblərinə cavab verən milli dil siyasətinin uğurla həyata keçirildiyini göstərir.

Rəqəmsal dünya yeni imkanlar yaratmaqla yanaşı, müəyyən risklər də meydana çıxarır. Sosial şəbəkələrdə və internet platformalarında yad sözlərin həddindən artıq işlədilməsi, xarici dillərin təsiri altında yaranan yanlış ifadələr, ədəbi dil normalarının pozulması halları Azərbaycan dilinin saflığının qorunmasını daha da aktuallaşdırır. Bu səbəbdən hər bir vətəndaş internet məkanında da ana dilinə məsuliyyətlə yanaşmalıdır.

Bu gün süni intellekt, rəqəmsal xidmətlər və elektron idarəetmə sistemləri sürətlə inkişaf edir. Belə şəraitdə Azərbaycan dilinin bu texnologiyalarda tam və keyfiyyətli şəkildə tətbiqi strateji əhəmiyyət daşıyır. Ana dilimizin müasir texnologiyalara inteqrasiyası onun gələcək inkişafının vacib istiqamətlərindən biridir. Dil nə qədər rəqəmsal mühitdə geniş istifadə olunarsa, onun gələcək nəsillər üçün yaşaması da bir o qədər etibarlı olar.

Prezident İlham Əliyevin rəhbərliyi ilə qəbul olunan dövlət proqramları məhz bu məqsədə xidmət edir. Azərbaycan dilinin qloballaşma şəraitində inkişafına dair Dövlət Proqramı, elektron məkanda istifadənin genişləndirilməsi ilə bağlı qəbul edilən sənədlər və dil normalarına nəzarətin gücləndirilməsi istiqamətində həyata keçirilən tədbirlər gələcəyə hesablanmış mühüm strateji addımlardır.

Balabəy Balabəyov

Siyəzən Rayon Ağsaqqallar şurasının üzvü

Paylaş:

Baxılıb: 106 dəfə