Türkiyə ilə sərhədlərin açılmasına gedən yol

Bakı:

27 °C

52 %

9 m/s

Əlaqə

AZ RU EN

Ana səhifə / Xəbər lenti / Türkiyə ilə sərhədlərin açılmasına gedən yol

Türkiyə ilə sərhədlərin açılmasına gedən yol

31.10.2023 [11:00]

Azərbaycanla sülh müqaviləsini imzalamaqdan keçir...

Günel ABBAS

Rəsmi İrəvan Ermənistan və Türkiyənin münasibətlərinin normallaşması istiqamətində aparılan danışıqların müsbət nəticəsinə və əldə olunan razılaşmaların həyata keçirilməsinə ümid edir. Ermənistanın baş naziri Nikol Paşinyan oktyabrın 30-da parlamentin iclasında xatırladıb ki, sözügedən saziş üçüncü ölkə vətəndaşları və diplomatik pasport sahibləri üçün sərhədlərin açılmasını nəzərdə tutur: “Sərhəd infrastrukturu ilə bağlı mühüm işlər görülüb. Biz Marqara keçid məntəqəsini yenidən təchiz etmişik və artıq sərhəd keçidini təmin etməyə hazırıq. Ümid edək ki, bu razılaşmalar həyata keçiriləcək”.

Qeyd edək ki, 2021-ci ilin dekabrında Ermənistan və Türkiyə ikitərəfli münasibətlərin normallaşdırılması üzrə danışıqlar üçün xüsusi nümayəndələrini təyin ediblər. İrəvanın nümayəndəsi Ermənistan Parlamentinin vitse-spikeri Ruben Rubinyan, Ankaranın nümayəndəsi isə Türkiyənin ABŞ-dakı keçmiş səfiri Serdar Kılıçdır. Diplomatlar artıq dörd raund danışıqlar keçiriblər. Birinci görüş Moskvada, qalan üç görüş isə Vyanada baş tutub.

Bununla yanaşı, Ermənistanın baş naziri ilə Türkiyə Prezidenti arasında ilk telefon danışığı 2022-ci ilin iyulunda, onların ilk təkbətək görüşü isə həmin il oktyabrın 6-da keçirilib.

Milli Məclisin üzvü Elman Nəsirov “Yeni Azərbaycan”a açıqlamasında bildirib ki, Ermənistanın baş naziri Nikol Paşinyanın Tbilisidə keçirilən sayca Dördüncü İpək Yolu forumunda çıxışı zamanı səsləndirdiyi fikirlər Azərbaycanla sülh müqaviləsinin imzalanmasına olan ümidləri bir qədər artırıb: “Həmin forumda Paşinyan bir neçə ay ərzində Azərbaycanla sülh müqaviləsi imzalamaq niyyətində olduğunu bildirib. Düzdür, Paşinyan dəfələrlə oxşar mövqedən çıxış edib və eyni məharətlə də mövqeyini dəyişib. Ancaq indi vəziyyət tamamilə başqa və fərqlidir. Əvvəllər o, bu tip bəyanatlar verərkən hələ Azərbaycanın Qarabağ üzərində tam suverenliyi təmin edilməmişdi, orada separatçı rejim mövcud idi, lakin indiki reallıqlar tamamilə başqa mənzərəni diktə edir. Artıq nə separatçı rejim, nə də onun nümayəndələri var. Seperatçılar Azərbaycan təcridxanalarında istintaq altındadırlar.

Belə olan vəziyyətdə Ermənistan baş nazirinin səsləndirdiyi fikirlər müəyyən nikbinlik üçün əsas yaradır. Həmçinin sərhədlərlə bağlı məsələ də aktuallaşır. Azərbaycanla sərhədlərin delimitasiyası və demarkasiyası əsas gündəmə çevrilir. Türkiyə ilə bağlı da sərhədlərin açılması məsələsi də diqqət mərkəzindədir. Amma Türkiyə dövlətinin də bu məsələ ilə bağlı prinsipial mövqeyi var. Bu, ondan ibarətdir ki, Ermənistan-Azərbaycan münasibətlərinin normallaşdırılması və sülh müqaviləsinin imzalanması prosesi ilə paralel şəkildə Ermənistan-Türkiyə sərhədlərinin açılmasından söhbət gedə bilər. Yəni bu proseslər bir-birini qabaqlaya bilməz. İlin sonuna qədər Ermənistan-Azərbaycan münasibətlərinin normallaşması və paralel şəkildə Ermənistan-Türkiyə sərhədlərinin açılması istiqamətində həlledici addımların atılması gözlənilir”.

Paylaş:

Baxılıb: 575 dəfə