Prezident seçkilərini 72 beynəlxalq müşahidəçi izləyəcək

Bakı:

25 °C

36 %

6 m/s

Əlaqə

AZ RU EN

Ana səhifə / Xəbər lenti / Prezident seçkilərini 72 beynəlxalq müşahidəçi izləyəcək

Prezident seçkilərini 72 beynəlxalq müşahidəçi izləyəcək

08.01.2024 [11:30]

Azərbaycanın xaricdə olan nümayəndəliklərində seçki məntəqələri yaradılıb

N.BAYRAMLI

Azərbaycanda demokratik seçki sistemi mövcuddur. 2003-cü ildə qəbul olunmuş Seçki Məcəlləsi beynəlxalq standartlara tam uyğundur. Amma həmin dövrdən indiyədək məcəlləyə bir sıra dəyişikliklər edilərək daha da təkmilləşdirilib. Beynəlxalq ekspertlərin birmənalı rəyinə əsasən, Seçki Məcəlləsi seçkilər sahəsində bütün qanunvericilik normalarını özündə əks etdirir. Sənəd ölkədə prezident, parlament və bələdiyyə seçkilərinin, həmçinin referendumun keçirilmə qaydalarını müəyyənləşdirir.

Seçki Məcəlləsi, eyni zamanda, Mərkəzi Seçki Komissiyasının, eləcə də dairə və məntəqə seçki komissiyalarının təsisi və fəaliyyəti prinsiplərini də özündə əks etdirir. Əvvəlki qanunlarla müqayisədə Seçki Məcəlləsi şəffaf və demokratik seçkilərin keçirilməsi üçün daha möhkəm hüquqi bazanın yaradılması, namizədlərin qeydiyyatı, seçkilərə hazırlıq və seçki komissiyalarının formalaşdırılması, fəaliyyətinin təşkili prinsip və mexanizmlərinin təkmilləşdirilməsinə imkan verir. 2003-cü ildən etibarən ölkəmizdə bütün seçkilər Seçki Məcəlləsinin tələblərinə uyğun keçirilib. Ötən dövrün təcrübəsi ölkəmizdə seçki qanunvericiliyinin mütərəqqi və təkmil olduğunu tam təsdiqləyib.

Fevralın 7-də də ölkəmizdə prezident seçkilərinin mövcud qanunvericilik əsasında azad və şəffaf keçiriləcəyi şübhəsizdir. Mərkəzi Seçki Komissiyası (MSK) qarşıdan gələn prezident seçkiləri ilə əlaqədar müvafiq tədbirlər həyata keçirir. Qurumun yanvarın 6-da keçirilən iclasında bildirilib ki, Azərbaycanın xaricdə olan 37 nümayəndəliyində 49 seçki məntəqəsi yaradılıb. Həmin məntəqələrdə xaricdə yaşayan soydaşlarımız səs verə biləcəklər.

Bundan əlavə, indiyə qədər seçkiləri müşahidə etmək üçün 19 ölkədən 72 beynəlxalq müşahidəçi Mərkəzi Seçki Komissiyasına müraciət edib. Komissiyanın sədri Məzahir Pənahov müraciətlərin hamısının müsbət qarşılandığını qeyd edib.

Mərkəzi Seçki Komissiyası (MSK) 2024-cü il fevralın 7-nə təyin edilmiş prezident seçkiləri ilə əlaqədar müxtəlif statuslu seçki subyektlərinin maarifləndirilməsi proqramı çərçivəsində “Müşahidəçilər üçün yaddaş” kitabçası da hazırlayıb. MSK Katibliyinin Media və kommunikasiya şöbəsindən bildirilib ki, layihənin həyata keçirilməsində və nəşrin hazırlanmasında başlıca məqsəd qarşıdan gələn prezident seçkilərini izləyəcək müşahidəçiləri məlumatlandırmaq, onlara metodiki kömək göstərməkdən ibarətdir.

Nəşrdə seçkilərə dair bir sıra əsas anlayışların izahı verilib, müşahidə aparılmasının prinsipləri əks olunub, habelə müşahidəçilərin hüquq və vəzifələri aydın şəkildə göstərilib. Yaddaş kitabçası Seçki Məcəlləsinin müddəaları və Mərkəzi Seçki Komissiyasının təsdiq etdiyi təlimat, izah, qayda və digər normativ xarakterli sənədlər əsasında tərtib olunub.

Üç dildə - Azərbaycan, ingilis və rus dillərində hazırlanan “Müşahidəçilər üçün yaddaş” kitabçasını aşağı seçki komissiyalarından, eləcə də Mərkəzi Seçki Komissiyasının rəsmi internet səhifəsindən (www.msk.gov.az) əldə etmək mümkündür.

Onu da qeyd edək ki, siyasi partiyalar da seçkilərdə fəal iştirak edir. Seçki Məcəlləsinə əsasən, bütün namizədlər bərabər hüquqa malikdirlər və bərabər öhdəliklər daşıyırlar, namizədlərin hamısına seçkiqabağı fəaliyyət üçün bərabər şərait təmin edilir. Nəzərə alınmalıdır ki, növbədənkənar seçkilərin keçirilməsinə dair qərar ölkədə siyasi partiyaların dövlət qeydiyyatına alınması prosesinin tamamlanmasından sonra qəbul olunub. Bununla da seçkilərdə iştirak etmək üçün dövlət qeydiyyatına alınmış bütün siyasi partiyalara imkan yaradılıb. Eyni zamanda, müstəqil şəxslər də fərdi qaydada namizədliyini irəli sürür. Bütün bunlar ölkədə ədalətli rəqabət mühitinin təmin edildiyinin bariz nümunəsidir.

Paylaş:

Baxılıb: 557 dəfə