Yeni reallıqların müəllifi Prezident İlham Əliyevdir

Bakı:

23 °C

40 %

8 m/s

Əlaqə

AZ RU EN

Ana səhifə / Xəbər lenti / Yeni reallıqların müəllifi Prezident İlham Əliyevdir

Yeni reallıqların müəllifi Prezident İlham Əliyevdir

25.01.2024 [12:07]

YAP Təftiş komissiyasının üzvü, Milli Məclisin deputatı Cavanşir Paşazadənin yap.org.az-a müsahibəsi

- Cavanşir müəllim, fevralın 7-də ölkəmizdə prezident seçkiləri keçiriləcək. Azərbaycan seçkilərə hansı reallıqlar fonunda gedir?

- Ümumiyyətlə, seçkilər ölkəmizin həyatında çox mühüm hadisədir. Azərbaycan öz ərazi bütövlüyünü və suverenliyini təmin etdikdən sonra yeni şərait yaranıb. Digər tərəfdən, bu seçkilər Prezident İlham Əliyevin 20 illik fəaliyyətinin hesabatıdır. Qarşıdan gələn seçkilər və onun nəticələri gələcək üçün nəzərdə tutulan məqsədlərə bir baxış olacaq.

Biz hansı sahəyə diqqət yetirsək, görərik ki, ötən 20 il ərzində Azərbaycan hər bir sahə üzrə inkişaf edib. Şübhəsiz ki, burada ən əsas məqam güclü ordumuzun yaradılması və milli birliyimizin təmin olunmasıdır. Xalqımız hər zaman Prezident İlham Əliyevin ətrafında sıx birləşib. Eyni zamanda, bu dövrdə yüksək vətənpərvərlik ruhunda gənc nəsil yetişdi. Ali Baş Komandan İlham Əliyev də dəfələrlə deyib ki, “mənim hakimiyyətim dövründə yetişən gənclər torpaqlarımızı işğaldan azad etdi”. Bu, həqiqətən də belədir. 44 günlük Vətən müharibəsində düşmən ordusunda fərarilik baş alıb gedirdi. Amma Azərbaycanda gənclərimiz könüllü surətdə döyüşlərə getmək üçün müraciət edirdilər, hətta ailəsindən gizlin olaraq döyüşə gedən oğullarımız var idi. Çünki onlar Vətən uğrunda döyüşə gedirdilər. Bütün bunlar Prezident İlham Əliyevin siyasətinin nəticəsidir.

Azərbaycanın müstəqilliyinin sarsılmaz təməllərini Ulu Öndər Heydər Əliyev atıb. 2003-cü ildə Ulu Öndərimiz xalqa müraciətində İlham Əliyevə özü qədər inandığını və axıra çatdıra bilmədiyi işləri İlham Əliyevin yerinə yetirəcəyini bildirdi. Heydər Əliyev həmişə deyirdi ki, bizim torpaqlarımız işğaldan azad olunacaq, bayrağımızı həmin torpaqlarda yüksəldəcəyik. Bu müqəddəs missiyanı Prezident, Müzəffər Ali Baş Komandan İlham Əliyev yerinə yetirdi.

Ötən 20 ildə əhalinin rifah halı da yüksəlib. Davamlı olaraq islahatlar həyata keçirilir. ASAN Xidmətin yaradılması bu islahatların mühüm bir nümunəsidir. Dünyanın bir sıra ölkələri bizim ASAN Xidmət modelindən nümunə kimi istifadə edirlər. Ötən 20 il ərzində regionlarımızda da möhtəşəm işlər həyata keçirilib. 2004-cü ildən Prezident İlham Əliyev tərəfindən təsdiq edilmiş regionların sosial-iqtisadi inkişafına dair Dövlət proqramları həyata keçirilir. Artıq mənzərə göz önündədir. Bütövlükdə, ötən 20 ildə digər bölgələrimiz də xeyli inkişaf edib. Prezident İlham Əliyev mütəmadi olaraq bölgələrə səfər edir, yeni təməllər atır və ya açılışlar edir. Xüsusilə sosial obyektlər, məktəblər, xəstəxanalar, müəssisələr istifadəyə verilir. Xalqımız bütün bu işləri görür və qiymətləndirir.

Bir sözlə, bütün nailiyyətlərimizin zirvəsində Prezident İlham Əliyevin həyata keçirdiyi düzgün siyasət görünür. Bu nailiyyətlər gələcək işlərimizin təməlini təşkil edir.

- Məhz bu nailiyyətlər fonunda qarşıdan gələn seçkilər Zəfər seçkisi adlandırılır...

- Əlbəttə ki, Azərbaycanın ərazi bütövlüyünün və suverenliyinin bərpa olunması müstəqillik tariximizin ən mühüm hadisəsidir. 44 günlük Vətən müharibəsində Prezident İlham Əliyev həm döyüş meydanında, həm də informasiya cəbhəsində mübarizə aparırdı. 44 gün ərzində dövlətimizin başçısı əcnəbi jurnalistlərə 30-dan çox müsahibə verdi. O bildirirdi ki, əgər Ermənistan xoşluqla torpaqlarımızdan çıxarsa, döyüşləri dərhal dayandırmağa hazırıq. Əslində, bu, dövlətimizin humanizmindən xəbər verirdi. Ötən ilin sentyabr ayında keçirilən antiterror tədbirləri nəticəsində isə Qarabağda erməni separatizminə son qoyuldu. Bu, uzun illər üzləşdiyimiz problemə birdəfəlik son qoydu. Bütün bunlara qəhrəman oğullarımızın, şəhidlərimizin canı-qanı hesabına nail olduq.

Bu Zəfərin dövlətçilik tariximizdə bənzəri yoxdur. Cənab İlham Əliyev bizim qürurumuzu qaytarıb, “məğlub xalq” sözünü üzərimizdən götürüb. Bu qürur xalqın dövlətə inamının ifadəsidir. Bu qürur Azərbaycan xalqını Prezident İlham Əliyevin ətrafında daha da sıx birləşdirir.

-Azərbaycan öz ərazi bütövlüyünü və suverenliyini təmin etdikdən sonra qarşıda yeni hədəflər dayanır. Bu hədəflər barədə fikirlərinizi bilmək istərdik...

-Bəli, qarşımızda yeni çağırışlar var. Azərbaycan öz ərazi bütövlüyünü və suverenliyini bərpa etməklə Cənubi Qafqazda yeni reallıqlar yaradıb. Bu reallıqların müəllifi Prezident İlham Əliyevdir. Bəzi ölkələr var ki, Azərbaycanın uğurlarına, qələbələrinə sevinmirlər. Onlar Ermənistanı silahlandırırlar. Eləcə də xaricdə müəyyən dairələr var ki, görülən işlərə qara yaxmağa çalışırlar. Daxilimizdə də belələri var. Onlar hər şeyi qara rəngdə görürlər. Amma bu cür “fəaliyyət”lə heç nəyə nail ola bilməzlər.

Digər tərəfdən, qarşımızda dayanan əsas çağırışlardan biri işğaldan azad olunmuş ərazilərimiz bərpa olunmasıdır. Bilirsiniz ki, həmin ərazilərdə böyük işlər gedir, “ağıllı” kənd və şəhərlər inşa olunur. Bu işlər ən müasir standartlar səviyyəsində aparılır. Dünyanın gözü Azərbaycandadır. Dövlətimizin bərpa-quruculuq işləri dünyanın diqqət mərkəzindədir. Görülən işlərə xarici ölkələr qibtə edirlər.

Bilirsiniz ki, Böyük Qayıdışın ilk müjdələri var. Fevralın 7-də keçmiş köçkünlərin bir hissəsi doğma yurdlarında səs verəcəklər.

Digər bir çağırışımız isə yaşıl enerjiyə keçidlə bağlıdır. Dövlətimizin başçısı işğaldan azad edilmiş əraziləri və Naxçıvan Muxtar Respublikasını “yaşıl enerji zonası” elan edib. Bu istiqamətdə böyük işlər görülür. Əvvəllər Bakıdan digər bölgələrə enerji ötürülürdü, indi isə bölgələrdə bu istiqamətdə böyük işlər görülür. Gələcəkdə xaricə böyük həcmdə alternativ enerji resurslarının ixracı nəzərdə tutulur. İnanırıq ki, Prezident İlham Əliyevin rəhbərliyi ilə yeni mərhələdə bu hədəflərə çatacağıq.

Azərbaycan xalqı bilir ki, hər bir nailiyyəti cənab İlham Əliyevin rəhbərliyi ilə əldə edə bilərik. Ona görə də xalq öz Liderinə sadiqdir. 7 fevralda düzgün seçim etməli, qalib Liderimizə səs verməliyik. Bu, bizi gələcəyə aparan yoldur. Mən bütün seçicilərimizi 7 fevralda fəal olmağa, öz seçki hüquqlarından istifadə etməyə çağırıram.

Əminəm ki, xalqımız cənab İlham Əliyevə səs verməklə öz xoşbəxt gələcəyinə, qarşı qoyulan hədəflərə səs verəcək! Prezidentimizin yeganə amalı xalqa və dövlətə xidmət etməkdir.

Paylaş:

Baxılıb: 594 dəfə