Azərbaycan–İtaliya münasibətləri qarşılıqlı hörmət və etimada əsaslanır

Bakı:

16 °C

94 %

2 m/s

Əlaqə

AZ RU EN

Ana səhifə / Arxiv / Azərbaycan–İtaliya münasibətləri qarşılıqlı hörmət və etimada əsaslanır

Azərbaycan–İtaliya münasibətləri qarşılıqlı hörmət və etimada əsaslanır

08.05.2026 [17:50]

Mayın 4-də İtaliya Respublikası Nazirlər Şurasının sədri Ciorcia Meloninin Azərbaycana rəsmi səfəri və Prezident İlham Əliyev ilə keçirdiyi görüşlər iki ölkə arasında strateji tərəfdaşlığın yeni mərhələyə qədəm qoyduğunu nümayiş etdirdi. Səfər çərçivəsində səsləndirilən bəyanatlar yalnız ikitərəfli münasibətlərin inkişafını deyil, həm də Avropanın enerji təhlükəsizliyi, regional sabitlik və yeni geosiyasi reallıqlar fonunda Azərbaycanın artan beynəlxalq rolunu bir daha ortaya qoydu.

Prezident İlham Əliyev mətbuata bəyanatında Azərbaycan və İtaliya arasında münasibətlərin strateji tərəfdaşlıq səviyyəsində inkişaf etdiyini xüsusi vurğulayaraq qeyd etdi ki, 2014 və 2020-ci illərdə imzalanmış strateji tərəfdaşlıq bəyannamələri bu gün real siyasi və iqtisadi nəticələrlə müşayiət olunur. Dövlət başçısı iki ölkə arasında qarşılıqlı etimadın və siyasi dialoqun yüksək səviyyədə olduğunu diqqətə çatdırdı.

İtaliya bu gün Azərbaycanın ən böyük ticarət tərəfdaşlarından biri olmaqla yanaşı, Avropada Azərbaycan qazının əsas alıcılarından biri kimi çıxış edir. Xüsusilə Cənub Qaz Dəhlizi və TAP layihəsi fonunda Bakı ilə Roma arasında enerji əməkdaşlığı strateji xarakter daşıyır. Prezident İlham Əliyevin bəyanatında enerji təhlükəsizliyi məsələsinə xüsusi yer ayrılması Azərbaycanın Avropa üçün etibarlı tərəfdaş statusunun daha da möhkəmləndiyini göstərir. Bu baxımdan Ciorcia Meloninin Bakıya səfəri Avropa İttifaqının enerji siyasətində Azərbaycanın artan rolunun təsdiqi kimi qiymətləndirilə bilər.

Səfərin diqqətçəkən məqamlarından biri də İtaliya Baş nazirinin regiona səfəri çərçivəsində Azərbaycana xüsusi önəm verməsi oldu. Prezident İlham Əliyev geniş tərkibdə görüş zamanı Meloninin Ermənistandan sonra Azərbaycana gəlməsini “rəmzi məna daşıyan addım” kimi dəyərləndirdi və bunun Azərbaycana dost münasibətin göstəricisi olduğunu bildirdi. Bu yanaşma Azərbaycanın Cənubi Qafqazda formalaşdırdığı yeni siyasi reallıqların beynəlxalq səviyyədə qəbul edilməsinin növbəti nümunəsi kimi qiymətləndirilə bilər.

Azərbaycan–İtaliya münasibətlərinin inkişafında iqtisadi amillərlə yanaşı humanitar və mədəni əlaqələr də mühüm rol oynayır. Son illər İtaliya şirkətlərinin Azərbaycanda infrastruktur, sənaye, energetika və bərpaolunan enerji layihələrində fəal iştirakı tərəflər arasında iqtisadi inteqrasiyanın dərinləşdiyini göstərir. Prezident İlham Əliyev də çıxışında İtaliya şirkətlərinin Azərbaycandakı fəaliyyətini yüksək qiymətləndirərək bu əməkdaşlığın qarşılıqlı faydalı xarakter daşıdığını qeyd etdi.

Mövcud beynəlxalq şəraitdə Azərbaycan ilə İtaliya arasında münasibətlərin inkişafı yalnız iki dövlətin maraqları ilə məhdudlaşmır. Bu əməkdaşlıq Avropa ilə Cənubi Qafqaz arasında siyasi və iqtisadi körpünün möhkəmləndirilməsi baxımından da mühüm əhəmiyyət daşıyır. Azərbaycanın etibarlı tərəfdaş kimi artan nüfuzu, həyata keçirdiyi balanslaşdırılmış xarici siyasət və regional təşəbbüslərdə oynadığı rol beynəlxalq aktorların Bakıya marağını daha da artırır.

Ciorcia Meloninin Azərbaycana səfəri və Prezident İlham Əliyevlə keçirilən görüşlər bir daha göstərdi ki, Bakı–Roma münasibətləri yalnız diplomatik əməkdaşlıq çərçivəsində deyil, həm də strateji geosiyasi əməkdaşlıq platforması kimi inkişaf edir. Bu səfər Azərbaycan diplomatiyasının uğuru, ölkəmizin beynəlxalq nüfuzunun göstəricisi və Avropa ilə münasibətlərdə yeni imkanların təzahürü kimi tarixə düşür.

Fidan Hüseynova

YAP Quba rayon təşkilatının sədri

Paylaş:

Baxılıb: 163 dəfə