Azərbaycanın qlobal enerji siyasətində artan rolu

Bakı:

27 °C

51 %

8 m/s

Əlaqə

AZ RU EN

Ana səhifə / Arxiv / Azərbaycanın qlobal enerji siyasətində artan rolu

Azərbaycanın qlobal enerji siyasətində artan rolu

03.06.2026 [12:11]

İyunun 1-də Bakıda keçirilən və dünyanın enerji sektorunun aparıcı nümayəndələrini bir araya gətirən Bakı Enerji Həftəsinin rəsmi açılış mərasimi baş tutub. Azərbaycan Respublikasının Prezidenti İlham Əliyev Bakı Ekspo Mərkəzində təşkil olunan 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum”un açılışında iştirak edərək çıxış edib. Dövlət başçısı çıxışında Azərbaycanın enerji sahəsində qazandığı uğurlardan, beynəlxalq əməkdaşlığın genişləndirilməsi istiqamətində görülən işlərdən və ölkəmizin etibarlı tərəfdaş kimi qazandığı nüfuzdan bəhs edib.

Prezident İlham Əliyev bildirib ki, Azərbaycanın zəngin enerji resurslarından səmərəli istifadə olunması nəticəsində ölkəmiz regionun və Avropanın enerji təhlükəsizliyində mühüm rol oynayır. Son illərdə həyata keçirilən nəhəng enerji layihələri Azərbaycanın dünya enerji bazarındakı mövqeyini daha da möhkəmləndirib. Xüsusilə Cənub Qaz Dəhlizi layihəsinin uğurla reallaşdırılması ölkəmizin beynəlxalq enerji əməkdaşlığında əhəmiyyətini artırıb və yeni tərəfdaşlıqlar üçün geniş imkanlar yaradıb.

Dövlətimizin başçısı çıxışında ənənəvi enerji mənbələri ilə yanaşı, bərpaolunan enerji sahəsinin inkişafına da xüsusi diqqət yetirildiyini vurğulayıb. Azərbaycanın yaşıl enerji gündəliyinin artıq qlobal miqyasda maraq doğurduğunu qeyd edən Prezident İlham Əliyev ölkəmizin günəş və külək enerjisi potensialından istifadə istiqamətində mühüm layihələr həyata keçirdiyini bildirib. Bu sahədə xarici investorlarla əməkdaşlığın genişləndirilməsi Azərbaycanın enerji strategiyasının əsas istiqamətlərindən biri kimi qiymətləndirilib.

Prezident İlham Əliyev vurğulayıb ki, Azərbaycan enerji siyasətini yalnız iqtisadi maraqlar üzərində deyil, həm də etibarlılıq, qarşılıqlı faydalı əməkdaşlıq və uzunmüddətli tərəfdaşlıq prinsipləri əsasında qurur. Məhz bunun nəticəsidir ki, ölkəmiz bu gün bir çox dövlətlər üçün etibarlı enerji təchizatçısı kimi tanınır. Azərbaycanın təşəbbüsü və iştirakı ilə həyata keçirilən beynəlxalq layihələr regional əməkdaşlığın möhkəmlənməsinə və enerji təhlükəsizliyinin təmin olunmasına mühüm töhfələr verir.

Bakı Enerji Həftəsi artıq uzun illərdir ki, enerji sahəsində ən nüfuzlu beynəlxalq platformalardan biri kimi tanınır. Bu tədbir enerji sektorunda fəaliyyət göstərən şirkətlər, investorlar və ekspertlər üçün yeni əməkdaşlıq imkanları yaradır, innovativ həllərin müzakirəsinə şərait formalaşdırır. Bakı Enerji Həftəsinə marağın ildən-ilə artması Azərbaycanın enerji mərkəzi kimi mövqeyinin daha da gücləndiyini göstərir.

Bu gün Prezident İlham Əliyevin rəhbərliyi ilə həyata keçirilən uğurlu enerji siyasəti ölkəmizin iqtisadi inkişafını təmin etməklə yanaşı, beynəlxalq nüfuzunun artmasına da xidmət edir. Azərbaycanın həm ənənəvi enerji resursları, həm də yaşıl enerji sahəsində həyata keçirdiyi layihələr ölkəmizin gələcək inkişafının möhkəm əsaslar üzərində qurulduğunu nümayiş etdirir. Bakı Enerji Həftəsi çərçivəsində verilən mesajlar da bir daha göstərdi ki, Azərbaycan qlobal enerji təhlükəsizliyinin təmin olunmasında mühüm aktorlardan biri olaraq öz mövqeyini daha da gücləndirir.

Sahib Şükürov

YAP Göyçay rayon təşkilatının sədri

Paylaş:

Baxılıb: 456 dəfə