Qurtuluşdan Zəfərə aparan yol

Bakı:

28 °C

46 %

3 m/s

Əlaqə

AZ RU EN

Ana səhifə / Arxiv / Qurtuluşdan Zəfərə aparan yol

Qurtuluşdan Zəfərə aparan yol

14.06.2026 [08:24]

Sunay Heydərova

YAP Şərur rayon təşkilatının fəal üzvü

15 İyun – Milli Qurtuluş Günü Azərbaycanın müstəqilliyinin qorunub saxlanılmasında, dövlətçiliyimizin möhkəmləndirilməsində və ölkəmizin inkişaf yoluna çıxmasında mühüm rol oynayıb.

Azərbaycan dövlət müstəqilliyini bərpa etsə də, ölkədə siyasi sabitlik tam təmin olunmamışdı. Dövlət idarəçiliyində ciddi problemlər mövcud idi, iqtisadi vəziyyət ağırlaşmış, Ermənistanın Azərbaycana qarşı hərbi təcavüzü nəticəsində torpaqlarımız işğal olunmuşdu. Hakimiyyət uğrunda mübarizə, daxili qarşıdurmalar və xaos ölkəni vətəndaş müharibəsi təhlükəsi ilə üz-üzə qoymuşdu. Belə bir mürəkkəb şəraitdə Azərbaycan dövlətçiliyinin taleyi ciddi təhlükə altında idi.

Xalq çıxış yolunu görkəmli dövlət xadimi, ümummilli lider Heydər Əliyevin hakimiyyətə qayıdışında görürdü. Azərbaycan xalqının təkidli tələbi ilə Heydər Əliyev Bakıya dəvət olundu və 15 iyun 1993-cü ildə Azərbaycan Respublikası Ali Sovetinin Sədri seçildi. Məhz bu tarix ölkəmizin siyasi həyatında yeni mərhələnin başlanğıcı oldu və sonradan Milli Qurtuluş Günü kimi tarixə düşdü.

Ulu Öndər Heydər Əliyevin hakimiyyətə qayıdışı ilə ölkədə sabitliyin təmin olunması istiqamətində mühüm addımlar atıldı. Dövlət çevrilişi cəhdlərinin qarşısı alındı, ictimai-siyasi sabitlik bərpa edildi və dövlət idarəçiliyi möhkəmləndirildi. Azərbaycan parçalanmaq və müstəqilliyini itirmək təhlükəsindən xilas oldu. Milli həmrəylik gücləndirildi, dövlətçiliyin əsasları daha da möhkəmləndirildi.

Ölkədə hüquqi və demokratik dövlət quruculuğu istiqamətində mühüm islahatlar həyata keçirildi. Xarici siyasətdə balanslaşdırılmış kurs formalaşdırıldı, Azərbaycan beynəlxalq aləmdə etibarlı tərəfdaş kimi tanınmağa başladı. 1994-cü ildə imzalanan “Əsrin müqaviləsi” ölkəmizin iqtisadi inkişafında yeni mərhələnin əsasını qoydu və Azərbaycanın dünya iqtisadiyyatına inteqrasiyasını sürətləndirdi.

Sonrakı illərdə əldə olunan bütün uğurların təməlində məhz Milli Qurtuluş dayanır. Bu gün Azərbaycan regionun ən güclü dövlətlərindən birinə çevrilib. Ordumuzun qüdrəti artıb, iqtisadiyyatımız güclənib, beynəlxalq nüfuzumuz yüksəlib. Xüsusilə də 2020-ci ildə əldə edilən tarixi Zəfər dövlətçilik siyasətinin və milli birliyin uğurlu nəticəsi kimi qiymətləndirilir.

Milli Qurtuluş Günü yalnız keçmişə nəzər salmaq deyil, həm də gələcəyə inamla baxmaq üçün mühüm fürsətdir. Bu gün bizə xatırladır ki, dövlətin gücü xalqın birliyində, milli həmrəylikdə və güclü liderlikdədir. Azərbaycan xalqı 15 İyun hadisələrindən mühüm dərslər çıxarmış, dövlətçiliyin qorunmasının hər bir vətəndaşın müqəddəs borcu olduğunu dərk etmişdir.

Bu günə baxsaq 15 İyun – Milli Qurtuluş Günü Azərbaycan tarixində sadəcə bir tarix deyil, xalqımızın xilası, dövlətçiliyimizin qorunması və müasir inkişaf yolunun başlanğıcıdır.

Paylaş:

Baxılıb: 107 dəfə