Milli Mətbuatımızın təntənəsi və Dövlət qayğısı

Bakı:

27 °C

48 %

2 m/s

Əlaqə

AZ RU EN

Ana səhifə / Arxiv / Milli Mətbuatımızın təntənəsi və Dövlət qayğısı

Milli Mətbuatımızın təntənəsi və Dövlət qayğısı

22.07.2026 [11:31]

Hər il iyulun 22-si Azərbaycanda Milli Mətbuat Günü kimi böyük qürur və ehtiramla qeyd olunur. Bu əlamətdar gün xalqımızın azadlıq amalının, milli oyanışının və mədəni tərəqqisinin təmsilçisi olan “Əkinçi” qəzetinin nəşrə başlaması tarixi ilə sıx bağlıdır.

1875-ci il iyulun 22-də dahi maarifçi və publisist Həsən bəy Zərdabinin rəhbərliyi ilə nəşrə başlayan “Əkinçi” qəzeti Azərbaycan milli mətbuatının banisi olmuşdur. Çətin tarixi şəraitdə və böyük maneələr qarşısında işıq üzü görən bu nəşr xalqın maariflənməsində, ana dilində mətbuatın formalaşmasında və milli özünüdərkin inkişafında müstəsna rol oynamışdır. “Əkinçi” sadəcə bir qəzet deyil, bütöv bir xalqın intibah hərəkatının, azadlıq və tərəqqi arzularının carçısı idi.

Azərbaycan mətbuatının inkişafında, söz və məlumat azadlığının təmin olunmasında Ümummilli Lider Heydər Əliyevin misilsiz xidmətləri və tarixi qərarları vardır. Ulu Öndər hələ sovet hakimiyyəti illərində də milli-mənəvi dəyərlərimizin qorunmasına, ana dilimizin saflığına xüsusi həssaslıqla yanaşmış, ziyalıların və mətbuat nümayəndələrinin fəaliyyətinə hər zaman mənəvi dayaq olmuşdur.

1993-cü ildə xalqın təkidli tələbi ilə hakimiyyətə qayıdan Heydər Əliyev cəmiyyətdə demokratik prinsiplərin bərqərar olunmasında azad mətbuatın rolunu ön plana çəkdi. O, medianın cəmiyyətin güzgüsü olduğunu vurğulayaraq, jurnalistikanın inkişafı üçün mühüm dövlət sənədlərinə imza atdı. 1998-ci ildə məhz Ulu Öndərin birbaşa təşəbbüsü və iradəsi ilə Azərbaycanda senzura ləğv edildi. Bu tarixi addım ölkəmizdə söz, fikir və məlumat azadlığının təmin olunmasında, müstəqil medianın formalaşmasında əsl dönüş nöqtəsi oldu.

Ulu Öndər Heydər Əliyev hər zaman jurnalist əməyini yüksək qiymətləndirir, media işçilərinin sosial-məişət şəraitinin yaxşılaşdırılmasına xüsusi diqqət yetirirdi. Kütləvi informasiya vasitələrinin maddi-texniki bazasının möhkəmləndirilməsi, qəzetlərin borclarının silinməsi, jurnalistlərə fəxri adların verilməsi və dövlət tərəfindən mükafatlandırılması ənənəsi məhz onun adı ilə bağlıdır. Ulu Öndər Heydər Əliyevin fərmanı ilə 1998-ci ildən etibarən iyulun 22-si rəsmi olaraq 'Milli Mətbuat və Jurnalistika Günü' kimi qeyd olunmağa başlandı. Həmçinin, 2002-ci ildə Azərbaycan Jurnalistlərinin I Qurultayının keçirilməsi və dövlət başçısının həmin qurultayda mətbuatın problemlərindən və inkişaf yollarından geniş bəhs etməsi sahənin gələcək inkişaf vektorunu müəyyənləşdirdi.

Ulu Öndər Heydər Əliyevin mətbuat siyasəti bu gün də uğurla davam etdirilir. Müasir dövrdə Azərbaycan jurnalistikası qlobal rəqabət şəraitində operativlik, obyektivlik və peşəkarlıq prinsiplərinə əsaslanaraq inkişaf edir. Dövlət səviyyəsində mediaya göstərilən qayğı, jurnalistlərin mənzil-məişət şəraitinin yaxşılaşdırılması istiqamətində həyata keçirilən irimiqyaslı layihələr ölkəmizdə azad medianın inkişafına verilən dəyərin bariz nümunəsidir.

Bu gün Azərbaycan mətbuatı ölkəmizin haqq səsini dünyaya çatdırmaqda, milli maraqların qorunmasında və cəmiyyətin maarifləndirilməsində mühüm missiya həyata keçirir. Vətən müharibəsində və postmüharibə dövründə jurnalistlərimizin göstərdiyi peşəkarlıq və informasiya cəbhəsindəki fədakarlıqları milli mətbuatımızın tarixinə qızıl hərflərlə yazılmışdır.

Milli Mətbuat Günü münasibətilə xalqımızın maariflənməsində, dövlətçiliyimizin möhkəmlənməsində xidməti olan bütün media nümayəndələrini təbrik edir, onlara yaradıcılıq uğurları və peşə fəaliyyətlərində yeni nailiyyətlər arzulayırıq.

Turanə Atakişiyeva

YAP Naxçıvan şəhər təşkilatının ƏPT sədri,

Naxçıvan şəhər 5 saylı tam orta məktəbin müəllimi

Paylaş:

Baxılıb: 108 dəfə