Heydər Əliyev və milli mətbuat: azad sözün inkişaf strategiyası

Bakı:

28 °C

47 %

2 m/s

Əlaqə

AZ RU EN

Ana səhifə / Xəbər lenti / Heydər Əliyev və milli mətbuat: azad sözün inkişaf strategiyası

Heydər Əliyev və milli mətbuat: azad sözün inkişaf strategiyası

22.07.2026 [08:42]

Azərbaycan milli mətbuatı 151 illik şərəfli inkişaf yolunda müxtəlif tarixi mərhələlərdən keçmiş, hər dövrün ictimai-siyasi hadisələrini öz səhifələrində əks etdirmişdir. Həsən bəy Zərdabinin əsasını qoyduğu milli mətbuat ənənələri zaman keçdikcə zənginləşmiş, müstəqillik illərində isə yeni inkişaf mərhələsinə qədəm qoymuşdur. Bu inkişafın mühüm memarlarından biri, heç şübhəsiz, Azərbaycan xalqının Ümummilli Lideri Heydər Əliyev olmuşdur.

Tarix göstərir ki, demokratik dövlətin möhkəmlənməsində azad və məsuliyyətli mətbuatın rolu əvəzsizdir. Mətbuat cəmiyyətin informasiya təminatını həyata keçirməklə yanaşı, ictimai rəyin formalaşmasına, milli-mənəvi dəyərlərin qorunmasına və dövlət-vətəndaş münasibətlərinin sağlam əsaslar üzərində qurulmasına xidmət edir. Heydər Əliyev də məhz bu baxışdan çıxış edərək mətbuatı dövlət quruculuğunun mühüm sütunlarından biri hesab edirdi.

1991-ci ildə dövlət müstəqilliyini bərpa edən Azərbaycan ağır sınaqlarla üz-üzə qalmışdı. Siyasi qeyri-sabitlik, iqtisadi böhran, Ermənistanın hərbi təcavüzü və informasiya sahəsindəki nizamsızlıq mətbuatın da normal fəaliyyətinə ciddi maneələr yaradırdı. Bir çox qəzet və informasiya vasitələri çətin maliyyə şəraitində çalışır, hüquqi baza isə müasir tələblərə cavab vermirdi.

1993-cü ildə xalqın təkidli tələbi ilə hakimiyyətə qayıdan Heydər Əliyev ölkədə sabitliyi bərpa etməklə yanaşı, demokratik institutların inkişafını da dövlət siyasətinin əsas istiqamətlərindən biri kimi müəyyənləşdirdi. Bu siyasətin mühüm tərkib hissəsini isə söz və mətbuat azadlığının təmin edilməsi təşkil edirdi.

Ulu Öndər dəfələrlə vurğulayırdı ki, "Mətbuat cəmiyyətin güzgüsüdür." Bu fikir təkcə jurnalistikanın mahiyyətini ifadə etmirdi. O, mətbuatın xalqın düşüncəsini, dövlətin inkişafını və cəmiyyətin problemlərini obyektiv əks etdirməli olduğunu bildirirdi. Onun yanaşmasına görə, azad mətbuat tənqid etmək hüququna malik olmaqla yanaşı, yüksək peşəkarlıq, məsuliyyət və dövlətçilik mövqeyi nümayiş etdirməlidir.

Heydər Əliyevin rəhbərliyi ilə media sahəsində həyata keçirilən islahatlar Azərbaycan jurnalistikasının inkişaf tarixində yeni səhifə açdı. Bu istiqamətdə ən mühüm hadisələrdən biri 1998-ci il 6 avqust tarixində imzalanmış "Azərbaycan Respublikasında söz, fikir və mətbuat azadlığının təmin edilməsi sahəsində tədbirlər haqqında" Fərman oldu. Həmin fərmanla ölkədə dövlət senzurası ləğv edildi. Bu addım Azərbaycanın demokratik inkişaf tarixində mühüm dönüş nöqtəsi kimi qiymətləndirilir.

Senzuranın ləğvi yalnız hüquqi qərar deyildi. Bu, dövlətin cəmiyyətə, jurnalistlərə və azad sözə olan etimadının ifadəsi idi. Həmin qərardan sonra Azərbaycan mediası daha sərbəst fəaliyyət göstərmək imkanı qazandı, fikir plüralizmi genişləndi, informasiya mühitində yeni imkanlar yarandı. Bu gün də həmin fərman milli mətbuat tariximizin ən mühüm hüquqi sənədlərindən biri hesab olunur.

Heydər Əliyev jurnalistlərlə daim açıq dialoqa üstünlük verirdi. O, mətbuat nümayəndələri ilə görüşlərində onların suallarını cavablandırır, media ilə dövlət arasında qarşılıqlı etimadın formalaşmasına xüsusi diqqət yetirirdi. Onun fikrincə, jurnalist cəmiyyət qarşısında böyük məsuliyyət daşıyır və yazdığı hər bir söz milli maraqlara, obyektivliyə və həqiqətə xidmət etməlidir. Azərbaycan milli mətbuatının bugünkü inkişaf səviyyəsi təsadüfi deyil. Bu inkişafın təməlində Ümummilli Lider Heydər Əliyevin müəyyən etdiyi demokratik media siyasəti, söz və fikir azadlığının təmin olunması istiqamətində atdığı qətiyyətli addımlar dayanır. 1998-ci ildə senzuranın ləğvi, media sahəsində hüquqi islahatların həyata keçirilməsi və jurnalistikanın inkişafına göstərilən dövlət qayğısı müasir Azərbaycan mediasının formalaşmasında həlledici rol oynamışdır.

Bu gün Prezident İlham Əliyevin rəhbərliyi ilə həmin siyasi kurs müasir dövrün tələblərinə uyğun şəkildə uğurla davam etdirilir. Rəqəmsal medianın inkişafı, informasiya təhlükəsizliyinin möhkəmləndirilməsi, jurnalistlərin peşəkarlığının artırılması və beynəlxalq media əməkdaşlığının genişləndirilməsi milli mətbuatımızın yeni mərhələyə qədəm qoyduğunu göstərir.

151 illik tarixi olan Azərbaycan milli mətbuatı dünənin şərəfli irsini qorumaqla yanaşı, gələcəyə də inamla addımlayır. Bu yolun əsas dayaqları isə həqiqətə sədaqət, dövlətçilik mövqeyi, milli maraqların qorunması və peşəkar jurnalistika prinsipləridir. Ümummilli Lider Heydər Əliyevin formalaşdırdığı media siyasəti Azərbaycan mətbuatının inkişaf salnaməsində əbədi yaşayacaq və gələcək nəsil jurnalistlər üçün etibarlı yol göstəricisi olaraq qalacaq.

Ruhiyyə Hacıyeva

Siyəzən RİH başçısının müavini-Ərazi-təşkilat və ictimai-siyasi məsələlər şöbəsinin müdiri

Paylaş:

Baxılıb: 86 dəfə