Müasir medianın inkişaf yolu

Bakı:

27 °C

48 %

2 m/s

Əlaqə

AZ RU EN

Ana səhifə / Arxiv / Müasir medianın inkişaf yolu

Müasir medianın inkişaf yolu

22.07.2026 [09:23]

Azərbaycan milli mətbuatı 151 illik inkişaf yolu ərzində müxtəlif tarixi mərhələlərdən keçərək bu gün müasir informasiya cəmiyyətinin mühüm institutlarından birinə çevrilmişdir. Qloballaşma, rəqəmsal texnologiyaların sürətli inkişafı və informasiya təhlükəsizliyinin dövlətlərin milli maraqlarının ayrılmaz hissəsinə çevrildiyi bir dövrdə medianın üzərinə daha böyük məsuliyyət düşür. Prezident İlham Əliyevin rəhbərliyi ilə həyata keçirilən ardıcıl islahatlar nəticəsində Azərbaycan mediası yeni inkişaf mərhələsinə qədəm qoymuş, milli maraqların müdafiəsində və həqiqətlərin beynəlxalq ictimaiyyətə çatdırılmasında daha fəal mövqe tutmuşdur.

Ümummilli Lider Heydər Əliyevin müəyyən etdiyi media siyasəti bu gün Prezident İlham Əliyev tərəfindən uğurla davam etdirilir və müasir dövrün tələblərinə uyğun şəkildə zənginləşdirilir. İnformasiya texnologiyalarının sürətlə inkişaf etdiyi, sosial şəbəkələrin ictimai rəyə ciddi təsir göstərdiyi şəraitdə media siyasətinin yenilənməsi zərurətə çevrilmişdir. Dövlət başçısının təşəbbüsü ilə həyata keçirilən islahatlar da məhz bu çağırışlara cavab verməyə xidmət edir.

Bu istiqamətdə mühüm addımlardan biri Medianın İnkişafı Agentliyinin yaradılması oldu. Agentliyin fəaliyyəti media mühitinin sağlamlaşdırılmasına, jurnalistlərin peşəkarlığının artırılmasına, informasiya resurslarının dayanıqlı inkişafına və müasir jurnalistikanın beynəlxalq standartlara uyğun formalaşmasına yeni imkanlar yaratdı. Eyni zamanda, "Media haqqında" Qanunun qəbul edilməsi media sahəsində hüquqi münasibətlərin daha müasir əsaslarla tənzimlənməsinə xidmət etdi.

Prezident İlham Əliyev dəfələrlə vurğulamışdır ki, "Biz fəxr edə bilərik ki, milli mətbuatımızın böyük tarixi var." Bu fikir yalnız keçmişə verilən qiymət deyil, həm də gələcəyə ünvanlanan mühüm çağırışdır. Çünki zəngin tarixə malik olan milli mətbuatın qarşısında müasir dövrdə daha məsuliyyətli vəzifələr dayanır.

2020-ci ilin Vətən müharibəsi Azərbaycan mediasının peşəkarlığını və vətənpərvərlik mövqeyini bütün dünyaya nümayiş etdirdi. Döyüş meydanında Azərbaycan Ordusu qəhrəmanlıq salnaməsi yazdığı kimi, informasiya cəbhəsində də jurnalistlər böyük fədakarlıq göstərdilər. Operativ, dəqiq və etibarlı məlumatların ictimaiyyətə çatdırılması, dezinformasiyaların ifşa olunması və Azərbaycanın haqq səsinin beynəlxalq auditoriyaya çatdırılması media nümayəndələrinin üzərinə düşən məsuliyyətin nə qədər böyük olduğunu göstərdi.

Müharibədən sonrakı dövrdə işğaldan azad olunmuş ərazilərdə aparılan bərpa və quruculuq işləri də medianın diqqət mərkəzindədir. Qarabağ və Şərqi Zəngəzurda həyata keçirilən genişmiqyaslı layihələr, "Böyük Qayıdış" proqramı, yeni şəhər və kəndlərin qurulması barədə hazırlanmış reportajlar Azərbaycan həqiqətlərinin dünya ictimaiyyətinə çatdırılmasında mühüm rol oynayır.

Prezident İlham Əliyevin təşəbbüsü ilə keçirilən Şuşa Qlobal Media Forumu artıq beynəlxalq informasiya dialoqu üçün nüfuzlu platformaya çevrilmişdir. Müxtəlif ölkələrdən media rəhbərlərinin, jurnalistlərin və ekspertlərin iştirak etdiyi bu forum Azərbaycanın qlobal informasiya məkanında artan rolunun göstəricisidir. Forum çərçivəsində medianın gələcəyi, süni intellekt, dezinformasiya ilə mübarizə və peşəkar jurnalistikanın inkişaf perspektivləri ətrafında aparılan müzakirələr ölkəmizin bu sahədə beynəlxalq əməkdaşlığa verdiyi önəmi nümayiş etdirir.

Rəqəmsal dövr yeni imkanlarla yanaşı, yeni təhlükələr də yaradır. Yalan xəbərlər, informasiya manipulyasiyası və kiberhücumlar medianın qarşısında duran əsas çağırışlardandır. Belə şəraitdə jurnalistin əsas silahı operativlikdən əvvəl obyektivlik, peşəkarlıq və məsuliyyət olmalıdır. Həqiqətə söykənən informasiya cəmiyyətin dövlətə inamını möhkəmləndirən ən vacib amillərdən biridir.

Azərbaycan mediası bu gün zəngin tarixi ənənələrə söykənərək müasir dünyanın çağırışlarına inamla cavab verir. Prezident İlham Əliyevin rəhbərliyi ilə həyata keçirilən ardıcıl media siyasəti milli mətbuatın inkişafına yeni imkanlar açmış, onun beynəlxalq nüfuzunu daha da artırmışdır. İnanırıq ki, Azərbaycan jurnalistikası bundan sonra da milli maraqların qorunmasına, həqiqətlərin dünyaya çatdırılmasına və dövlətçiliyimizin möhkəmlənməsinə layiqincə xidmət edəcəkdir.

Aydan Ramazanzadə

Siyəzən RİHB aparatının Ərazi-təşkilat və ictimai-siyasi məsələlər şöbəsinin İctimai-siyasi və humanitar məsələlər sektorunun baş məsələhətçisi

Paylaş:

Baxılıb: 89 dəfə