Milli Mətbuat – Milli Şüurun və Dövlətçiliyin Güclü Dayağı

Bakı:

27 °C

48 %

2 m/s

Əlaqə

AZ RU EN

Ana səhifə / Arxiv / Milli Mətbuat – Milli Şüurun və Dövlətçiliyin Güclü Dayağı

Milli Mətbuat – Milli Şüurun və Dövlətçiliyin Güclü Dayağı

22.07.2026 [10:26]

Hər il iyulun 22-si Azərbaycanda Milli Mətbuat Günü kimi qeyd olunur. Bu əlamətdar tarix 1875-ci ildə görkəmli maarifçi Həsən bəy Zərdabinin nəşr etdirdiyi “Əkinçi” qəzeti ilə Azərbaycan milli mətbuatının əsasının qoyulması ilə bağlıdır. Cəmi iki il fəaliyyət göstərməsinə baxmayaraq, “Əkinçi” xalqın maariflənməsi, milli özünüdərkin formalaşması, ana dilinin inkişafı və ictimai fikrin oyanışında misilsiz rol oynamışdır.

“Əkinçi”nin yaratdığı ənənələr sonrakı illərdə “Ziya”, “Kəşkül”, “Şərqi-Rus”, “Həyat”, “Füyuzat”, “Molla Nəsrəddin”, “Açıq söz” və digər qəzet və jurnallar tərəfindən davam etdirilmiş, Azərbaycan milli mətbuatı xalqın azadlıq ideyalarının, maarifçilik hərəkatının və milli-mənəvi dəyərlərinin təbliğində mühüm missiya yerinə yetirmişdir.

Müstəqillik dövründə Ümummilli Lider Heydər Əliyevin rəhbərliyi ilə həyata keçirilən islahatlar Azərbaycan mediasının inkişafında yeni mərhələnin əsasını qoydu. Senzuranın ləğv edilməsi, söz və mətbuat azadlığının təmin olunması, müasir qanunvericilik bazasının formalaşdırılması və medianın iqtisadi müstəqilliyinin gücləndirilməsi istiqamətində atılan addımlar ölkədə azad və peşəkar media mühitinin inkişafına geniş imkanlar yaratdı.

Prezident İlham Əliyev tərəfindən media siyasəti ardıcıl şəkildə davam etdirilərək dövlət dəstəyi daha da gücləndirilmişdir. Medianın İnkişafı Agentliyinin yaradılması, “Media haqqında” Qanunun qəbul olunması, media subyektlərinə vergi güzəştlərinin tətbiqi, jurnalistlərin sosial müdafiəsinin yaxşılaşdırılması və milli mətbuatın yubileylərinin dövlət səviyyəsində qeyd olunması bu sahəyə göstərilən diqqətin bariz nümunəsidir. 2025-ci ildə Azərbaycan milli mətbuatının 150 illiyi münasibətilə yubiley medalının təsis edilməsi də milli jurnalistikaya verilən yüksək dəyərin ifadəsidir.

Müasir dövrdə Azərbaycan mediası rəqəmsal transformasiya mərhələsini yaşayır. İnternet jurnalistikasının inkişafı, informasiya texnologiyalarının geniş tətbiqi, süni intellekt imkanlarından istifadə və dezinformasiyaya qarşı mübarizə medianın qarşısında duran əsas vəzifələrdəndir. Bu istiqamətdə həyata keçirilən islahatlar ölkənin informasiya təhlükəsizliyinin möhkəmləndirilməsinə, peşəkar jurnalistikanın inkişafına və milli informasiya resurslarının gücləndirilməsinə xidmət edir.

Azərbaycan mediası Birinci və İkinci Qarabağ müharibələri dövründə də üzərinə düşən tarixi missiyanı layiqincə yerinə yetirmiş, ölkəmizin haqq səsinin dünya ictimaiyyətinə çatdırılmasında, düşmən təbliğatına qarşı informasiya mübarizəsində mühüm rol oynamışdır. Vətən müharibəsi dövründə jurnalistlərin peşəkarlığı, operativ fəaliyyəti və vətənpərvərliyi Azərbaycan mediasının nüfuzunu daha da artırmışdır.

Son illərdə Şuşada keçirilən Qlobal Media Forumları Azərbaycanı beynəlxalq media dialoqunun mühüm platformalarından birinə çevirib. Forumlarda dezinformasiyaya qarşı mübarizə, rəqəmsal media, süni intellekt, media etikası və sülh quruculuğunda medianın rolu kimi aktual mövzular geniş müzakirə olunur. Bu təşəbbüslər Azərbaycanın qlobal informasiya məkanında nüfuzunun daha da möhkəmlənməsinə töhfə verir.

Bu gün Azərbaycan milli mətbuatı zəngin tarixi ənənələrə söykənərək inkişafını davam etdirir. Peşəkarlıq, obyektivlik, operativlik, milli maraqların qorunması və cəmiyyətin düzgün məlumatlandırılması müasir jurnalistikanın əsas prinsipləri olaraq qalır. Milli mətbuatımız ötən 150 ildə olduğu kimi, bundan sonra da Azərbaycanın dövlətçilik maraqlarına, milli həmrəyliyin möhkəmlənməsinə və cəmiyyətin inkişafına xidmət edən mühüm ictimai institut kimi öz missiyasını uğurla davam etdirəcəkdir.

Aqil Abdulov

Siyəzən RİHB-nın Ərazi-təşkilat və icitmai siyasi məsələlər şöbəsinin Ərazi-təşkilat və ictimai-siyasi məsələlər şöbəsinin baş məsləhətçisi

Paylaş:

Baxılıb: 93 dəfə