Bizim çox etibarlı tərəfdaş olduğumuza dair etibarlı portfelimiz var

Bakı:

13 °C

88 %

7 m/s

Əlaqə

AZ RU EN

Ana səhifə / Arxiv / Bizim çox etibarlı tərəfdaş olduğumuza dair etibarlı portfelimiz var

Bizim çox etibarlı tərəfdaş olduğumuza dair etibarlı portfelimiz var

28.09.2026 [11:48]

Şamo Qasımov

YAP Laçın rayon təşkilatının sədr müavini

Dünya iqtisadiyyatında investisiya qərarlarının qəbul edilməsinə təsir göstərən əsas amillər sırasında maliyyə imkanları ilə yanaşı, siyasi və iqtisadi sabitlik, hüquqi öhdəliklərə sadiqlik, təhlükəsizlik, proqnozlaşdırıla bilən biznes mühiti və uzunmüddətli tərəfdaşlıq imkanları xüsusi əhəmiyyət daşıyır. Bu baxımdan Azərbaycanın son onilliklər ərzində formalaşdırdığı investisiya siyasəti və beynəlxalq iqtisadi münasibətlər sistemi ölkənin etibarlı tərəfdaş imicinin möhkəmlənməsinə xidmət edən mühüm institusional baza yaradıb. Prezident İlham Əliyevin II Azərbaycan Beynəlxalq İnvestisiya Forumu çərçivəsində keçirilən tədbirdə səsləndirdiyi fikirlər də məhz bu reallığın müxtəlif aspektlərini əhatə edir.

Dövlət başçısının çıxışında diqqət çəkən əsas məqamlardan biri Azərbaycanın beynəlxalq investorlarla münasibətlərində etimad və öhdəliklərə sadiqlik prinsipinin önə çəkilməsidir. Prezidentin qeyd etdiyi kimi, təxminən 30 il əvvəl neft-qaz sektorunun inkişafı ilə bağlı imzalanmış müqavilələrin əsas parametrlərinə toxunulmaması investorlar üçün mühüm siqnal formalaşdırıb. Burada söhbət yalnız ayrı-ayrı müqavilələrin icrasından getmir. Məsələnin mahiyyətində dövlətin uzunmüddətli iqtisadi münasibətlərdə üzərinə götürdüyü öhdəliklərə münasibəti dayanır. Belə yanaşma investisiya mühitində etimadın formalaşması baxımından mühüm institusional amil kimi çıxış edir.

Azərbaycanın etibarlı tərəfdaş kimi mövqeyinin formalaşmasında enerji layihələrinin xüsusi rolu vardır. 1990-cı illərin ortalarından etibarən həyata keçirilən enerji strategiyası ölkənin beynəlxalq iqtisadi sistemə daha fəal inteqrasiyasına, xarici kapitalın cəlb edilməsinə və iri transmilli şirkətlərlə uzunmüddətli əməkdaşlığın qurulmasına imkan yaradıb. Bu əməkdaşlıq sonrakı mərhələdə yalnız enerji sektorunun inkişafı ilə məhdudlaşmayaraq nəqliyyat, logistika, infrastruktur, maliyyə və digər sahələrdə iqtisadi əlaqələrin genişlənməsi üçün də zəmin yaradıb.

Prezidentin çıxışında investisiya mühitinin digər mühüm komponentləri kimi siyasi və iqtisadi sabitlik, maliyyə dayanıqlılığı və əlverişli biznes mühiti də qeyd olunub. Rəsmi məlumatlara əsasən, Azərbaycanın dövlət borcunun ÜDM-ə nisbəti 20 faiz, xarici borcun ÜDM-ə nisbəti isə 5,6 faiz təşkil edir. Həmçinin ölkənin valyuta ehtiyatlarının xarici borcu əhəmiyyətli dərəcədə üstələdiyi vurğulanıb. Bu göstəricilər investisiya mühitinin makroiqtisadi əsaslarını xarakterizə edən mühüm parametrlər kimi təqdim edilir.

Digər tərəfdən, Azərbaycanın investisiya siyasətində yeni mərhələnin əsas xüsusiyyəti iqtisadiyyatın şaxələndirilməsi ilə bağlıdır. Ölkənin uzunmüddətli iqtisadi inkişaf perspektivində neft-qaz sektorunun mövcud imkanları qorunmaqla yanaşı, qeyri-neft sektorunun inkişaf etdirilməsi, insan kapitalına, infrastruktura, rəqəmsal texnologiyalara və süni intellektə investisiyaların artırılması strateji əhəmiyyət kəsb edir. II Azərbaycan Beynəlxalq İnvestisiya Forumunun gündəliyində Orta Dəhliz, enerji və yaşıl keçid, süni intellekt və rəqəmsal transformasiya, infrastruktur, sənaye, aqrobiznes, maliyyə əməkdaşlığı, kiçik və orta biznes, turizm və insan kapitalına investisiyalar kimi istiqamətlərin müzakirə olunması da bu transformasiyanın çoxşaxəli xarakterini göstərir.

Azərbaycanın coğrafi mövqeyi də yeni investisiya imkanlarının formalaşmasında mühüm üstünlük yaradır. Şərq-Qərb və Şimal-Cənub nəqliyyat istiqamətlərinin kəsişməsində yerləşən ölkə regional bağlantıların inkişafında fəal iştirak edir. Nəqliyyat və logistika infrastrukturu genişləndikcə Azərbaycanın yalnız enerji ixracatçısı deyil, həm də mühüm tranzit və logistika mərkəzi kimi mövqeyi möhkəmlənir. Bu isə istehsal, logistika, rəqəmsal infrastruktur və xidmət sektorlarına yeni investisiyaların cəlb edilməsi üçün əlavə imkanlar yaradır.

İnvestisiya mühitində təhlükəsizlik amilinin xüsusi çəkisi də müasir geoiqtisadi reallıqlar fonunda daha aydın görünür. Qlobal iqtisadiyyatda qeyri-müəyyənliyin artdığı bir şəraitdə investor üçün kapitalın təhlükəsizliyi, fəaliyyətin davamlılığı və biznes proseslərinin proqnozlaşdırılması fundamental əhəmiyyət daşıyır. Prezident İlham Əliyevin çıxışında Azərbaycanın təhlükəsizlik məsələsində sabit mühitə malik ölkə kimi təqdim olunması da məhz bu kontekstdə qiymətləndirilə bilər.

Azərbaycanın investisiya cəlbediciliyinin digər elementi ölkənin sosial-mədəni potensialıdır. Prezident çıxışında Azərbaycanın iqlim müxtəlifliyi, mətbəxi, qonaqpərvərliyi və beynəlxalq tədbirlərə ev sahibliyi etməsi kimi amilləri də qeyd edib. Bu xüsusiyyətlər birbaşa iqtisadi göstərici olmasa da, ölkənin beynəlxalq biznes mühitinin formalaşmasında “yumşaq güc” elementləri kimi çıxış edə bilər. Formula 1 və digər beynəlxalq tədbirlərin keçirilməsi Azərbaycanın qlobal auditoriyaya açıq olduğunu nümayiş etdirən platformalar yaradır.

Bütün bunların fonunda Prezidentin “Bizim çox etibarlı tərəfdaş olduğumuza dair etibarlı portfelimiz var” fikri Azərbaycanın investisiya siyasətinin mahiyyətini ifadə edən konseptual yanaşma kimi diqqəti cəlb edir. Burada “etibarlı tərəfdaş” anlayışı yalnız iqtisadi göstəricilərlə deyil, uzunmüddətli əməkdaşlıq təcrübəsi, müqavilə öhdəliklərinə münasibət, sabitlik və qarşılıqlı etimadla əlaqələndirilir. Etimad kapitalı bir anda formalaşmır; onun yaranması ardıcıl siyasət, konkret layihələr və zaman tələb edir.

Azərbaycanın qarşısında duran əsas vəzifələrdən biri formalaşmış etimad kapitalını yeni iqtisadi inkişaf mərhələsinin resursuna çevirməkdir. Bunun üçün xarici investisiyaların həcmi ilə yanaşı, onların texnologiya transferinə, innovasiyalara, insan kapitalının inkişafına və yüksək əlavə dəyər yaradan sahələrin genişlənməsinə təsiri də mühüm göstərici olacaqdır. Prezidentin çıxışında süni intellekt, insan kapitalı, infrastruktur və iqtisadiyyatın digər sahələrinə investisiya imkanlarının xüsusi qeyd edilməsi Azərbaycanın gələcək iqtisadi strategiyasının məhz bu istiqamətlərdə genişləndirilməsinin nəzərdə tutulduğunu göstərir.

Beləliklə, etibarlı tərəfdaşlıq Azərbaycanın beynəlxalq iqtisadi münasibətlərində yalnız keçmiş təcrübənin nəticəsi deyil, həm də gələcək inkişaf üçün mühüm strateji kapitaldır. İnvestorların ölkəyə gəlib onun iqtisadi, sosial və infrastruktur imkanlarını birbaşa müşahidə etməsi isə investisiya qərarlarının daha obyektiv əsaslarla formalaşmasına şərait yaradır. II Azərbaycan Beynəlxalq İnvestisiya Forumunun əhəmiyyəti də məhz bundan ibarətdir: Azərbaycan öz imkanlarını yalnız təqdim etmir, həm də beynəlxalq biznes ictimaiyyətini bu imkanları yerində qiymətləndirməyə dəvət edir. Bu yanaşma etimadın möhkəmləndirilməsi, yeni tərəfdaşlıqların qurulması və ölkənin şaxələndirilmiş iqtisadi inkişafına əlavə investisiyaların cəlb edilməsi baxımından mühüm platforma yaradır.

Paylaş:

Baxılıb: 117 dəfə