Seymur Orucov: Ümidvarıq ki, səhvlərini dərk edən gənclər bundan sonrakı fəaliyyətlərini ölkəmizin inkişafı istiqamətində quracaqlar

Bakı:

25 °C

55 %

3 m/s

AZ RU EN

Ana səhifə / Daxili siyasət / Seymur Orucov: Ümidvarıq ki, səhvlərini dərk edən gənclər bundan sonrakı fəaliyyətlərini ölkəmizin inkişafı istiqamətində quracaqlar

Seymur Orucov: Ümidvarıq ki, səhvlərini dərk edən gənclər bundan sonrakı fəaliyyətlərini ölkəmizin inkişafı istiqamətində quracaqlar

01.11.2014 [12:42]

“Azərbaycan gənc dövlət olaraq, hər bir vətəndaşının hüquq və azadlıqlarının qorunub, təmin edilməsində maraqlıdır. Vətənini sevən hər bir gəncimiz də bizim üçün əzizdir. Lakin, əfsuslar olsun ki, bu gün ölkədaxili antimilli fəaliyyətlə məşğul olan bəzi şəxslər öz çirkin məqsədlərinə nail olmaq üçün ölkəmizin sabahı olan gəncləri riyakar siyasətlərinin qurbanına çevirərək, onlardan istifadə edirlər”. Bu fikirləri Yeni Azərbaycan Partiyası (YAP) Gənclər Birliyinin sədri, partiyanın Siyasi Şurasının üzvü Seymur Orucov deyib.
S.Orucov bildirib ki, xaricdən siyasi sifariş almış bu kimi dairələrin təsiri altına düşən gənclərin sayı çox deyil. Bununla belə, o hesab edir ki, ümumiyyətlə, heç bir Azərbaycan gənci bu kimi - xaricdən ölkəmizi istəməyən qüvvələr tərəfindən maliyyələşən təşkilatlara qoşulmamalıdır. YAP Gənclər Birliyinin sədrinin fikrincə, bu, həm Azərbaycanın dövlətçilik prinsiplərinə ziddir, həm də həmin gənclərin gələcək inkişafı üçün maneədir: “Ölkəmizdə geniş vüsət alan gənclər siyasəti hər bir gəncimizi əhatə etməklə, bütün dünyaya nümunə ola biləcək bir modeldir. Bunu dünyanın aparıcı dövlətlərinin gənclik qurumları da təsdiq edir. Ona görə də, Azərbaycan gəncləri ölkəmizdə gənclər üçün yaradılan bu şəraiti lazımınca qiymətləndirməli, onlara göstərilən inam və etimadı doğrultmalıdırlar. Prezident İlham Əliyevin imzaladığı əfv Sərəncamı ölkə başçısının humanizm siyasətinin göstəricisidir. Müxtəlif dırnaqarası təşkilatların təsiri altına düşüb, fəaliyyət göstərən gənclərin bəziləri səhvlərini dərk ediblər. Və bunun nəticəsidir ki, artıq “Nida” adlanan təşkilatın əfv olunmuş gənclərindən biri Yeni Azərbaycan Partiyasına üzv olmaq üçün müraciət edib. Həmin gənclərin səhvlərini başa düşərək, bu tip addımlar atması onun nəticəsidir ki, bir vaxtlar onların özlərinin belə inkar etdiyi ölkəmizdəki inkişaf, tərəqqi artıq həmin gənclər tərəfindən də etiraf edilməyə başlanıb. Və biz ümidvarıq ki, azadlığa çıxan bu gənclər kimi, onların digər yoldaşları da səhv yolda olduqlarını anlayıb, bundan sonrakı fəaliyyətlərini ölkəmizin inkişafı istiqamətində quracaqlar”, - deyə S.Orucov vurğulayıb.

Paylaş:

Baxılıb: 1654 dəfə