Ermənistanda ümumxalq itaətsizlik aksiyasına başlanılacaq

Bakı:

25 °C

58 %

3 m/s

Əlaqə

AZ RU EN

Ana səhifə / Dünya / Ermənistanda ümumxalq itaətsizlik aksiyasına başlanılacaq

Ermənistanda ümumxalq itaətsizlik aksiyasına başlanılacaq

25.07.2015 [10:14]

Yerevanda start götürəcək aksiyaya Ermənistanın digər şəhərlərindən də dəstək veriləcəyi gözlənilir
Məlum olduğu kimi, hazırda Cənubi Qafqaz bölgəsinin təhlükəsizlik balansını pozan əsas amil ermənilərin işğalçı, separatçı əməlləri və Ermənistan-Azərbaycan, Dağlıq Qarabağ münaqişəsidir. Münaqişə bölgənin ümumi inkişafına mane olmaqla yanaşı, yeni əməkdaşlıq platformalarının da reallaşdırılmasını əngəlləyir. Amma işğalçılıq siyasəti Ermənistana heç bir uğur gətirməyib. Belə ki, bu ölkə sosial-iqtisadi problemlər içərisində boğulmaqdadır. Sarkisyan rejiminin həyata keçirdiyi siyasət artıq ölkə əhalisinin səbrini daşırıb. Məhz bu səbəbdəndir ki, Ermənistanda insanlar kütləvi etiraz aksiyalarına başlayıblar. Bu yaxınlarda paytaxt Yerevanda və digər bölgələrdə etiraz aksiyalarının böyük vüsət alması da deyilənləri təsdiqləyir.
Yeri gəlmişkən, Ermənistanda elektrik enerjisi tariflərinin bahalaşmasına etiraz məqsədi ilə yaradılan “Talana yox” təşəbbüs qrupu artıq siyasi təşkilata çevrilib. Bu haqda qrupun fəallarından Artur Köçəryan məlumat verib. Fəallar addım-addım irəliləyərək hökumətin istefasına nail olacaqlarına əmindirlər. Hərəkat bu məqsədlə təşkilatlanmağa başlayıb. Onu da qeyd edək ki, işğalçı ölkənin, iqtisadiyyatı tamamilə iflasa uğrayıb. Ermənistanın xarici borcları rekord həddə çatıb. Məhz bütün bunların fonunda hakimiyyətin dəyişikliyi ilə nəyə isə nail olacaqlarına ümid bəsləyən fəallar maneələrə rəğmən geri çəkilməyəcəklərini bəyan ediblər. Fəallar bütün Ermənistanı yeni yaradılan hərəkata dəstəyə çağırıblar. Hərəkatın koordinatoru Vardan Akopyan müxalifətin yardımı olmadan da qələbə qazanacaqlarını bildirib.
Bu arada yayılan məlumatlara görə, iyulun 27-də Ermənistanda ümumxalq itaətsizlik aksiyasına başlanılacaq. “Ayağa qalx, Ermənistan” hərəkatının fəalları belə bir bəyanatla çıxış ediblər. Bəyanatda bildirilir ki, etirazçılar iyulun 27-də Yerevandakı “Azadlıq” meydanında yenidən toplaşacaqlar. Bu dəfə mitinqin daha genişmiqyaslı olacağı gözlənilir. Kütləvi vətəndaş itaətsizliyinə Ermənistanın digər şəhərlərindən də dəstək gələcəyi gözlənilir. Bu haqda “Ayağa qalx, Ermənistan” hərəkatının fəalları keçirilən mətbuat konfransında bildiriblər. Hərəkatın üzvlərindən Andrias Qukasyan polisi onlara mane olmamağa çağırıb. Onun sözlərinə görə, mitinqin iştirakçıları hökumətdən xalqa hesabat verməyi tələb edəcəklər. “İrs” partiyasından olan fəal, David Sanasaryan isə bildirib ki, təşəbbüs qrupu ölkənin əyalətlərində vətəndaşlarla görüşüb. Fəallar özbaşınalıqlara son qoyulması üçün bütün Ermənistanın birləşməsini vacib hesab edirlər. Onların fikrincə, enerji tarifləri avqustun 1-dək dəyişdirilməzsə, Baqramyan prospektində aparılan mübarizə hədər gedəcək. Nəticədə hökumət qanun pozuntularını davam etdirəcək, xalq isə yenə də əzab çəkəcək. Ona görə də səylərin birləşdirilməsi vacibdir.
Beləliklə bütün bu baş verənlər Ermənistanın daxili vəziyyətinin daha da gərginləşdiyini göstərir. Daha doğrusu, görünən odur ki, Sarkisyan başda olmaqla hazırkı prezident komandası prosesləri nəzarətdə saxlaya bilmir.
Nardar BAYRAMLI

Paylaş:

Baxılıb: 1307 dəfə