Ermənistan iqtisadiyyatında tənəzzül davam edir

Bakı:

13 °C

88 %

5 m/s

Əlaqə

AZ RU EN

Ana səhifə / Dünya / Ermənistan iqtisadiyyatında tənəzzül davam edir

Ermənistan iqtisadiyyatında tənəzzül davam edir

28.07.2009 [11:31]

Ekspertlərin fikrincə, ilin sonunadək işğalçı ölkədə iqtisadi geriləmə ikirəqəmli göstəricilərlə ölçüləcək
Dünyaya özünü işğalçı dövlət kimi tanıtmış Ermənistan hökumətinin rəsmiləri ölkə iqtisadiyyatının “çiçəklənməsi”, “yüksəlişi” barədə ağızdolusu danışmağa vərdiş ediblər. Onlar ölkə iqtisadiyyatına dair pafoslu çıxışları ilə artıq aclıq və səfalətə düçar olmuş xalqı hər vəchlə “işıqlı gələcəyə” inandırmaqla “cidanı çuvalda gizlətməyə” səy edirlər. Həyat şəraiti gündən-günə pisləşən, yoxsulluğun son həddində yaşayan erməni xalqı rəhbərlərinin ölkə iqtisadiyyatının inkişafı barədəki alovlu nitqlərinə birmənalı yanaşmır, iqtisadiyyatın tənəzzülə uğraması səbəbindən yaşayış səviyyəsinin getdikcə pisləşdiyini yaxşı başa düşürlər.
Parisdə nəşr olunan “Les Nouvelles d’Armenie” (“Ermənistan xəbərləri”) qəzetinin 24 iyul tarixli nömrəsində dərc edilmiş “Ermənistan iqtisadiyyatının tənəzzülü davam edir” sərlövhəli yazı Ermənistan iqtisadiyyatının acınacaqlı vəziyyətini tam təfərrüatı ilə əks etdirir.
Məqalənin əvvəlində heç də ermənilərə yaraşmayan xüsusiyyət nümayiş etdirilərək, bu ilin altı ayı ərzində Ermənistan iqtisadiyyatının tənəzzülünün davam etdiyi etiraf olunur. Rəqəmlər sübut edir ki, ilin birinci yarısında ölkənin ümum daxili məhsulunun həcmi 16,3 faizə düşüb. 2009-cu ilin yanvarından mayınadək olan dövrdə ölkə iqtisadiyyatı 15,7 faiz azalıb.
ölkə iqtisadiyyatının acınacaqlı vəziyyəti daha çox tikinti sektorunda hiss edilməkdədir. 2008-ci ilin müvafiq dövrü ilə müqayisədə yanvar-iyun aylarında bu sahədə 54,5 faiz azalma qeydə alınıb.
ölkənin tanınmış iqtisadçıları ilin sonunadək iqtisadiyyatda daha 20 faiz azalmanın müşahidə ediləcəyini bildiriblər. Ermənistan Mərkəzi Bankının keçmiş prezidenti iqtisadiyyatın tənəzzülə uğramasını hökumətin səmərəsiz fəaliyyəti ilə əlaqələndirib.
İqtisadiyyatın tənəzzülü Ermənistanda idxalın ixracı beş dəfədən artıq üstələməsinə gətirib çıxarıb. Nəticədə ticarət balansında 1 milyard dollardan artıq kəsir yaranıb. ölkənin xarici borcunun 3-4 dəfə artacağı gözlənilir. Elə bu səbəbdən də ölkədə təhlükəli vəziyyətin yaranmasından ehtiyat edilir. Bu vəziyyətdən çıxış yolunu ermənilər xaricdə yaşayan həmvətənlərinin yardımında görürlər. Belədə xalqımızın bir atalar sözü yada düşür: Qonşusuna ümid olan şamsız qalar.
Xalqın vəziyyətini düşünmək əvəzinə öz varidatlarını artırmağa çalışan dövlət rəsmilərinin korrupsiyaya uğraması, hökumət tərəfindən təhlükəsizlikləri üçün təminatın olmaması xarici sərmayəçiləri Ermənistana vəsait qoymaqdan çəkindirir. Məhz bu səbəbdən ölkəyə birbaşa sərmayə qoyuluşu sürətlə azalıb, bu da öz növbəsində sənaye və tikinti sahələrinin tənəzzülə uğramasına güclü təsir göstərib. Məqalə ölkənin inkişafı barədə dəm vuran Ermənistan rəhbərliyinin əsl simasını açıb göstərməklə yanaşı, hakimiyyətin yalanlar üzərində qurulduğunu nümayiş etdirir. Şişirdilmiş hava şarını xatırladan hakimiyyətin nə vaxtsa bir gün partlayacağı heç kəsdə şübhə doğurmur.
Bu arada, baş verən proseslərə cəmiyyətin etirazları da genişlənməkdədir. Son olaraq, müxalifətçi “İrs” partiyası siyasi məhbuslarla bağlı bəyanat yayıb. Sənəddə bildirilir ki, Ermənistan rəhbərliyi şəxsi qisas almaqla məşğuldur və “Aykakan Jamanak” qəzetinin redaktoru Nikola Paşinyanın həbsi bunu bir daha sübut edir.
Bəyanatda deyilir ki, iyulun 1-də öz xoşu ilə hüquq-mühafizə orqanlarına təslim olan Nikola Paşinyanı həbsə almaqla hakimiyyət elan etdiyi amnistiyanı yaddan çıxardığını və ölkəni dar düşüncə ilə idarə etdiyini bir daha təsdiqləyir.
Müxalifət ölkədə siyasi məhbusların mövcudluğunu hakim rejim tərəfindən siyasi qan intiqamı və Ermənistanın Avropa Şurası qarşısında götürdüyü öhdəliklərin yerinə yetirilməməsi kimi qiymətləndirir.

Paylaş:

Baxılıb: 1377 dəfə