Ermənistanda siyasi qarşıdurma səngimir

Bakı:

10 °C

87 %

8 m/s

Əlaqə

AZ RU EN

Ana səhifə / Dünya / Ermənistanda siyasi qarşıdurma səngimir

Ermənistanda siyasi qarşıdurma səngimir

13.08.2021 [08:59]

Məlum olduğu kimi, Ermənistan seçkilərdən sonra kütləvi vətəndaş itaətsizliyi aksiyalarından imtina edən müxalifət indi də parlamentdə qalmaqal yaratmaqla gündəmdə qalmağa çalışır. Erməni mediasının məlumatına görə, müxalifət nümayəndələri tribunaya çıxan kimi hər fürsətdə hakimiyyətin, o cümlədən baş nazir Nikol Paşinyanın əleyhinə kəskin ifadələr işlədirlər. Məsələn, parlamentin avqustun 11-də keçirilən iclasında müxalifətdən olan deputatın çıxışı spikeri qəzəbləndirib və onun zaldan çıxmasını tələb edib. Bundan sonra zalda baş verən qarşıdurmanın qarşısını almaq bir qədər çətin olub.
Qeyd edək ki, parlamentdəki qarşıdurmaya hərbi formada olan mühafizəçilərin müdaxiləsi isə siyasi gərginliyi daha da artırıb. Bununla da yeni parlamentdə tətbiq edilən məhdudiyyət və yeni qaydalarla bağlı narazılıqlara daha biri əlavə olunub. “Panorama.am”ın yazdığına görə, vəkil Yervand Varosyan parlamentdə təhlükəsizlik əməkdaşlarının geyim formasına toxunaraq qanunverici orqanın binasında mühafizəçilərin hərbi kamuflyaj formasında dolaşmalarına, onların deputatlara və iclas zalına müdaxilələrinə görə hakimiyyəti ciddi tənqid edib.
Onu da xatırladaq ki, parlamentdəki insidentdən sonra mühafizəçilərin sayı artırılıb, parlament binasının ətrafına əlavə polis qüvvələri cəmləşdirilib. Bəzi müxalifətçi deputatlar isə həmkarlarının iclas zalından qovulmasına kəskin etiraz bildirərək deyiblər ki, əgər kimsə “kapitulyant” və digər ifadələri təhqir hesab edirsə, məhkəməyə müraciət etsin.
Qeyd edək ki, parlamentdəki daimi komissiyaların iclasları da qalmaqalsız ötüşmür. Bu dəfə “Ermənistan” fraksiyasının iqtisadi məsələlər daimi komissiyasının rəhbəri vəzifəsinə namizəd Vahe Hakopyanla vitse-spiker Ruben Rubinyan arasında mübahisə baş verib.
Yeri gəlmişkən, “Joğovurd” qəzeti yazır ki, hökumət daxilində tam sabitlik mövcud deyil. Baş nazirin müavini təyin edilən Suren Papikyanın nəzarəti tam ələ almaq və müxtəlif nazirlikləri özünə tabe etmək cəhdləri narazılıq yaradır: “Hökumətə yaxın mənbələrimiz S.Papikyanın özünü baş nazir kimi apardığını və bütün məsələlər barədə ona məlumat verilməsini tələb etdiyini bildirirlər. Kadr məsələləri də Papikyanın nəzarətindədir, kimin komandada qalması və kimin hökuməti tərk etməsi ondan asılıdır”.
Nəşrin yazdığına görə, bundan əvvəl ərazi idarəetmə və infrastruktur naziri olan Papikyan əsas maliyyə mənbələrinə də şəxsən nəzarət edir.
Beləliklə, parlamentdəki qalmaqallar, hökumət daxilindəki problemlər, eləcə də sosial-iqtisadi böhran məğlub ölkədə vəziyyətin gərgin olduğunu göstərir.
Qaşqay ZİYƏDDİNOĞLU

Paylaş:

Baxılıb: 746 dəfə