Prezident İlham Əliyev Bakıdakı Səməd Vurğun və "Muğam" bağlarında aparılmış əsaslı bərpa və yenidənqurma işləri ilə tanış olub

Bakı:

21 °C

88 %

8 m/s

AZ RU EN

Ana səhifə / Gündəm / Prezident İlham Əliyev Bakıdakı Səməd Vurğun və "Muğam" bağlarında aparılmış əsaslı bərpa və yenidənqurma işləri ilə tanış olub

Prezident İlham Əliyev Bakıdakı Səməd Vurğun və "Muğam" bağlarında aparılmış əsaslı bərpa və yenidənqurma işləri ilə tanış olub

29.12.2009 [10:38]

Azərbaycan Respublikasının Prezidenti İlham Əliyev və xanımı Mehriban Əliyeva dünən Bakıdakı Səməd Vurğun və “Muğam” bağlarında aparılmış əsaslı bərpa və yenidənqurma işləri ilə tanış olublar.
Bakı Şəhər İcra Hakimiyyətinin başçısı Hacıbala Abutalıbov Prezident İlham Əliyevə bu istirahət guşələrində aparılan yenidənqurma tədbirləri barədə ətraflı məlumat verib.
Bildirilib ki, görkəmli şairin adını daşıyan bağ Azərbaycan Prezidentinin Bakı şəhərində parkların və xiyabanların əsaslı təmiri və yenidən qurulması ilə bağlı verdiyi tapşırıqlara əsasən abadlaşdırılıb. Burada əhalinin istirahəti üçün ən müasir şərait yaradılıb.
Qeyd olunub ki, Səməd Vurğun bağının ərazisi genişləndirilərək 26 min kvadratmetrə çatdırılıb. Bağın asfalt örtüyü sökülərək yerinə qranit və mərmər plitələr döşənib. Səməd Vurğun bağında şairin möhtəşəm abidəsi də təmirdən sonra yeni görkəm alıb.
Azərbaycan Prezidenti və xanımı bağın ərazisini gəziblər, yaradılan şəraitlə yaxından tanış olublar.
İtaliyalı mütəxəssislər tərəfindən tikilmiş fəvvarə bağa xüsusi yaraşıq verir.
Yenidən qurulan hər iki bağdakı işıqlandırma sistemi italiyalı mütəxəssislər tərəfindən quraşdırılıb və Venesiya üslubundadır. Səməd Vurğun bağında nəfis yaşıllıq guşələri yaradılıb, 24 mindən çox dekorativ gül və bəzək kolları əkilib. Burada milli və beynəlxalq təcrübə yüksək peşəkarlıqla uzlaşdırılıb. Bu istirahət guşələrində çox rahat və gözəl dizayna malik oturacaqlar quraşdırılıb.
Prezident İlham Əliyevə məlumat verilib ki, hər iki bağın ətrafında da əsaslı abadlıq və yaşıllaşdırma tədbirləri görülüb. Bunun nəticəsində bu bağlarla ətraf ərazi ümumi ansambl təşkil edir.
Sonra dövlətimizin başçısı və xanımı orijinal layihə əsasında yenidən qurulan “Muğam” bağı ilə tanış olublar. Qeyd edilib ki, gözəlliyi ilə ilk baxışdan diqqəti çəkən bu istirahət ocağının da ərazisi genişləndirilərək 21 min kvadratmetrə çatdırılıb. Bu bağda da asfalt örtüyü sökülərək yerinə qranit və mərmər plitələr döşənilib. Burada köhnə tikililər söküldükdən sonra ərazi tamamilə yeni görkəm alıb.
Bağda italiyalı mütəxəssislər tərəfindən gözoxşayan fəvvarə inşa olunub. Əsaslı yenidənqurmadan sonra həmin istirahət guşəsi də füsunkar görkəm alıb.
Hər iki bağın yaxınlığındakı 28 May və Puşkin küçələrinə yeni asfalt örtüyü döşənib.
Görülən işləri yüksək qiymətləndirən Prezident İlham Əliyev müvafiq tapşırıq və tövsiyələrini verib.

Paylaş:

Baxılıb: 1473 dəfə