Bakıda Heydər Əliyev və Ziya Bünyadov prospektlərinin kəsişməsində müxtəlif səviyyəli yol qovşağının ikinci kompleksi istifadəyə verilib

Bakı:

26 °C

54 %

3 m/s

AZ RU EN

Ana səhifə / Gündəm / Bakıda Heydər Əliyev və Ziya Bünyadov prospektlərinin kəsişməsində müxtəlif səviyyəli yol qovşağının ikinci kompleksi istifadəyə verilib

Bakıda Heydər Əliyev və Ziya Bünyadov prospektlərinin kəsişməsində müxtəlif səviyyəli yol qovşağının ikinci kompleksi istifadəyə verilib

03.07.2010 [10:26]

Azərbaycan Respublikasının Prezidenti İlham Əliyev mərasimdə iştirak edib
Azərbaycan Respublikasının Prezidenti İlham Əliyev dünən Bakının Heydər Əliyev və Ziya Bünyadov prospektlərinin kəsişməsindəki müxtəlif səviyyəli Böyükşor yol qovşağının ikinci kompleksinin açılışında iştirak edib. İnşaatçılar dövlətimizin başçısını hərarətlə qarşılayıblar.
Nəqliyyat naziri Ziya Məmmədov Prezident İlham Əliyevə yeni yol qovşağının texniki göstəriciləri haqqında məlumat verib.
Bildirilib ki, Böyükşor yol qovşağı respublikamızda yol-nəqliyyat sisteminin ən müasir standartlar səviyyəsində yenidən qurulmasının əyani nümunələrindəndir. Prezident İlham Əliyevin sərəncamları ilə təsdiq edilmiş “Bakı şəhərində nəqliyyat sisteminin təkmilləşdirilməsi üzrə 2006-2007-ci illər üçün Tədbirlər Planı”, eləcə də, “Bakı şəhərində nəqliyyat sisteminin təkmilləşdirilməsi üzrə 2008-2013-cü illər üçün əlavə Tədbirlər Planı” çərçivəsində paytaxtda çoxlu sayda yolötürücü, yeraltı və yerüstü piyada keçidləri inşa edilib, ən müasir standartlara cavab verən avtomobil yolları salınıb. Həyata keçirilən ardıcıl tədbirlər hesabına respublikamızın bütün bölgələrində olduğu kimi, Bakı şəhərinin yol-nəqliyyat kompleksi də əsaslı şəkildə yenilənir və tıxac probleminin aradan qaldırılması istiqamətində mühüm işlər görülür.
Qeyd olunub ki, Böyükşor yol qovşağı Azərbaycan Prezidentinin 2006-cı il 1 fevral tarixli Sərəncamı əsasında inşa olunur. Qovşaq 3 kompleksdən ibarətdir. Layihəyə əsasən həmin qurğu ümumi uzunluğu 3145 metr təşkil edəcək 9 körpü, körpü girişləri və qovşağın tərkib hissəsi olan avtomobil yollarından ibarət olacaq.
Kompleksin tikintisinə 2006-cı ilin martında başlanıb. Təməlqoyma mərasimində Prezident İlham Əliyevin iştirak etdiyi Böyükşor yol qovşağının Ziya Bünyadov prospektini Qara Qarayev küçəsi və hava limanı avtomobil yolu ilə birləşdirən birinci kompleksi 2008-ci ilin sentyabında istifadəyə verilib.
İndi isə yol qovşağının ikinci kompleksi istismara buraxılır. Nəqliyyat Nazirliyinin sifarişi ilə “Azərkörpü” ASC-nin inşa etdiyi bu kompleks Heydər Əliyev, Ziya Bünyadov və Qara Qarayev prospektlərini hava limanı və Bakıxanov qəsəbəsi istiqamətində yollarla birləşdirən, ümumi uzunluğu 1194 metrə çatan 5 xüsusi yolötürücüsü, onun yanaşmaları və bir sıra digər yollardan ibarətdir. Tikinti zamanı 650 min kubmetr torpaq və 61 min kubmetrdən çox dəmir-beton işi görülüb. 176 min kvadratmetr sahəyə yüksək keyfiyyətli asfalt örtük salınıb. Tikinti işləri zamanı əsasən yerli materiallardan istifadə edilib. Kompleksdəki yolötürücülərinin maksimum eni 27,5 metrdir. Yolötürücülərinin yerdən hündürlüyü isə 6,5 metrə bərabərdir.
Dövlətimizin başçısının diqqətinə çatdırılıb ki, aşırımının uzunluğu 56 metr olan tağlı yolötürücü əraziyə həm də əlavə gözəllik verir. Bu yolötürücünün tağları metaldandır. Onların radiusu 60, yerdən hündürlüyü isə 36 metrdir.
Kompleksin ətrafında əsaslı abadlıq və yaşıllaşdırma işləri görülüb.
Böyükşor yol qovşağının ikinci kompleksinin tikintisində 425 nəfər işləyib.
Prezident İlham Əliyev yol qovşağının layihəsinə və inşaat işlərinin gedişini əks etdirən fotoşəkillərə baxıb.
Məlumat verilib ki, hazırda bu yol qovşağının üçüncü kompleksinin inşası davam edir. 665 metr uzunluğunda yolötürücü və onun yanaşmalarından ibarət olacaq 3-cü kompleks hava limanı avtomobil yolunu Qara Qarayev prospekti ilə birləşdirəcək. Regionda ilk dəfə inşa olunan vant konstruksiyalı ikiaşırımlı bu yolötürücünün uzunluğu 360 metr, orta dayağın yer səviyyəsindən hündürlüyü isə 98 metr olacaq. Bu yolötürücü hava limanı istiqamətindən gələn nəqliyyat vasitələrinin 8-ci Kilometr, Əhmədli, Günəşli yaşayış massivləri və Zığ dairəsi-hava limanı magistral avtomobil yoluna birbaşa hərəkətini təmin etmək üçün inşa edilir. Həmin kompleksin 2011-ci ilin mayında istifadəyə verilməsi nəzərdə tutulur.
Prezident İlham Əliyev rəmzi açılışı bildirən lenti kəsib, inşaatçıları təbrik edərək onlara uğurlar arzulayıb.

Paylaş:

Baxılıb: 1163 dəfə