Azərbaycanın inkişafı Türkiyənin inkişafı deməkdir

Bakı:

21 °C

88 %

8 m/s

Əlaqə

AZ RU EN

Ana səhifə / Gündəm / Azərbaycanın inkişafı Türkiyənin inkişafı deməkdir

Azərbaycanın inkişafı Türkiyənin inkişafı deməkdir

18.08.2010 [09:35]

Türkiyə Respublikasının Prezidenti Abdullah Gülün ölkəmizə ikigünlük rəsmi səfəri başa çatıb
Azərbaycanda rəsmi səfərdə olan Türkiyə Prezidenti Abdullah Gül dünən onun üçün ayrılmış iqamətgahda Baş nazir Artur Rasizadəni qəbul edib. Türkiyə Prezidenti Abdullah Gül qardaş ölkələrimiz arasında əlaqələrin ən yüksək səviyyədə olduğunu, Azərbaycanın sürətli inkişafından məmnunluğunu bildirərək, ikitərəfli münasibətlərin siyasi, təhlükəsizlik, iqtisadi və mədəni sahələrdə get-gedə inkişaf etdiyini söyləyib. Bu münasibətlərin bundan sonra da genişlənəcəyinə əminlik ifadə olunub. Görüşdə Qafqazın sabitliyi və təhlükəsizliyi üçün Türkiyənin həyata keçirdiyi tədbirlər yüksək qiymətləndirilib. Türkiyə Prezidenti Ermənistan-Azərbaycan, Dağlıq Qarabağ münaqişəsinin Azərbaycanın ərazi bütövlüyü çərçivəsində həllini dəstəklədiyini, ölkəsinin bu məsələdə daim Azərbaycanın yanında olduğunu vurğulayıb.
Baş nazir Artur Rasizadə əmin olduğunu bildirib ki, Türkiyə Prezidentinin bu səfəri hər iki ölkənin xalqlarının rifahı naminə qarşılıqlı faydalı işgüzar əlaqələrin genişləndirilməsinə xidmət edəcək. Qeyd olunub ki, səfər nəticəsində əldə edilmiş razılaşmalar Türkiyə ilə Azərbaycan arasındakı dostluq-qardaşlıq münasibətlərinin daha da inkişafı üçün çox mühüm rol oynayacaq.

* * *

Azərbaycanda rəsmi səfərdə olan Türkiyə Prezidenti Abdullah Gül “Azər-Türk Bank”ın Bakıda yeni baş inzibati binasının açılışında iştirak edib. “Azər-Türk Bank” Açıq Səhmdar Cəmiyyəti idarə heyətinin sədri Mehmet Sami Acarözmen, bankın müşahidə şurasının sədri, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev və Türkiyənin Ziraat Bankının müşahidə şurasının sədri Müharrem Karslı Ulu öndər Heydər Əliyevin xeyir-duası ilə 1995-ci ildə açılmış “Azər-Türk Bank”ın ölkələrimiz arasında iqtisadi münasibətlərin genişləndirilməsində mühüm rol oynadığını bildiriblər. “Azər-Türk Bank”ın respublikamızda dörd filialının fəaliyyət göstərməsi və yeni baş inzibati binasının açılışı Prezident İlham Əliyevin Azərbaycanda sahibkarlığın inkişafına hərtərəfli qayğısının əyani təzahürü kimi yüksək qiymətləndirilib. Prezident Abdullah Gül Azərbaycan ilə Türkiyə arasında dostluq, qardaşlıq və səmərəli əməkdaşlığın yüksək səviyyədə olduğunu, “Azər-Türk Bank” və digər iqtisadi qurumların timsalında iqtisadi əlaqələrin durmadan genişləndiyini vurğulayıb. Bankın fəaliyyətini xüsusi qeyd edən Abdullah Gül deyib: “Bu bank balığı tutub vermir, hər kəsə balıq tutmağı öyrədir. Yəni iş adamı, təşəbbüsçü, sahibkar formalaşdırır, onların sayını artırır”.
Sonra rəmzi açılışı bildirən lent kəsilib. Türkiyə dövlətinin başçısı yeni inzibati binada yaradılmış iş şəraiti ilə tanış olub. Türkiyə dövlətinin başçısı “Azər-Türk Bank”ın əməkdaşlarına yeni uğurlar arzulayıb. Sonda mərasim iştirakçıları Prezident Abdullah Gül ilə xatirə şəkli çəkdiriblər.

* * *

Türkiyə Prezidenti Abdullah Gül Azərbaycana rəsmi səfəri çərçivəsində Təzəpir məscid kompleksində olub. Ali qonağı Qafqaz Müsəlmanları İdarəsinin sədri şeyxülislam Allahşükür Paşazadə qarşılayıb. Prezident Abdullah Gül Təzəpir məscid kompleksi ilə tanış olub. Məlumat verilib ki, Prezident İlham Əliyevin göstərişi əsasında 2005-ci ildə məscidin bərpası və ətraf ərazilərin yenidən qurulması layihəsi hazırlanıb, burada onun ilkin görkəminə qaytarılması məqsədi ilə əzəli memarlığına xələl gətirməyən elementlərin əlavə edilməsi əksini tapıb. Məscidin bərpasında Azərbaycan nəqqaşlıq məktəbinin və Şərq oriyentalistikasının nadir nümunələrindən istifadə olunub.
Sonra Prezident Abdullah Gülə kompleksə daxil olan Bakı İslam Universitetinin tədris korpusu haqqında məlumat verilib. Bildirilib ki, korpusun hər mərtəbəsində 10 sinif otağı olmaqla 250 tələbənin təhsil alması üçün hər cür şərait yaradılıb. Türkiyə Prezidenti kompleksdə Qafqaz Müsəlmanları İdarəsinin kitabxanası ilə tanış olub. Kitabxanadakı 6 min nüsxə nadir əlyazma haqqında ali qonağa ətraflı məlumat verilib. Qeyd olunub ki, kitabxananın bir hissəsində dini verilişlərin hazırlanması üçün mini studiya yerləşir. Prezident Abdullah Gül burada nümayiş olunan qədim kitablara, Təzəpir məscidi haqqında CD-lərə baxıb, fəxri qonaqlar kitabına ürək sözlərini yazıb. Ali qonağa xatirə hədiyyələri təqdim olunub.

* * *

Türkiyə Prezidenti Abdullah Gül Azərbaycana rəsmi səfəri çərçivəsində respublikamızın şimal-qərb bölgəsində olub. Türkiyə dövlətinin başçısının Azərbaycanın bu bölgəsinə səfəri Zaqataladan başlayıb. Zaqatala Beynəlxalq hava limanında Prezident Abdullah Gülü böyük səmimiyyətlə qarşılayıblar.
Türkiyə Prezidenti Abdullah Gül Zaqataladan Şəkiyə gələrkən yolüstü Qax rayonunun Oncallı kəndindəki oğuz qəbiristanlığında şeyx Yunus Əmrə və onun mürşidi Hacı Tapdığın məzarlarını ziyarət edib. Prezident Abdullah Gül hər iki məzarın üzərinə gül dəstəsi qoyub. Sonra qəbiristanlığı gəzən ali qonağa məlumat verilib ki, sufi şeirinin görkəmli nümayəndəsi olan Yunus Əmrə böyük türk xalqının yetirdiyi ən parlaq simalardan biridir. XIII-XIV əsrlərdə yaşayan Yunus Əmrənin yaradıcılığı türk şeirinin inkişafına çox böyük təsir göstərib. Mənbələrdə göstərilir ki, övliyalıq məqamına yüksələrək həyatı əfsanələşən Yunus Əmrənin təkcə Anadoluda 10 müxtəlif ərazidə məzarı var. Belə ziyarət yerlərindən biri də Azərbaycanın Qax rayonu ərazisində, Oncallı kəndindəki oğuz qəbiristanlığıdır.
Sonra Türkiyə Prezidenti Abdullah Gül və onu müşayiət edən şəxslər Şəki şəhərinə gəliblər.
Türkiyə Prezidenti Abdullah Gül Şəki şəhər İcra Hakimiyyətinin binası qarşısında ümummilli lider Heydər Əliyevin abidəsi önünə gül dəstəsi qoyub, Ulu öndərin xatirəsini ehtiramla yad edib. Sonra ali qonaq Şəkinin Orta Zəyzid kəndi ərazisində türk əsgərinin abidə kompleksini ziyarət edib. Prezident Abdullah Gül abidənin önünə gül dəstəsi qoyub. Qardaş ölkənin dövlət başçısı Şəkinin mərkəzi parkında xalq şairi Bəxtiyar Vahabzadənin abidəsini ziyarət edərək önünə gül dəstəsi qoyub. Prezident Abdullah Gül parkda Şəki ictimaiyyətinin nümayəndələri ilə görüşüb, onlarla səmimi söhbət edib. Prezident Abdullah Gül XIX əsrin tarixi-memarlıq abidəsi olan Şəki Cümə məscidinə və burada fəaliyyət göstərən Şəki İslam Mədrəsəsinə də baş çəkib.
Şəki Xan sarayı ilə tanışlıq zamanı Türkiyə Prezidenti Abdullah Gülə məlumat verilib ki, XVIII əsrə aid olan bu nadir tarixi-memarlıq abidəsi şəhərin yuxarı hissəsində, “Yuxarı baş” Tarix-Memarlıq Qoruğunun ərazisində yerləşir. Şərq memarlığının nadir incisi hesab olunan bu saray Azərbaycanda ilk müstəqil xanlığın əsasını qoyan Hacı çələbi xanın nəvəsi, “Müştaq” təxəllüsü ilə şeirlər yazan Hüseyn xanın dövründə, təqribən 1762-ci ildə tikilib.
Prezident Abdullah Gülə Xan sarayının təsvir olunduğu rəsm əsəri hədiyyə edilib. Ali qonaq Xan sarayının xatirə kitabına ürək sözlərini yazıb.
Daha sonra Prezident Abdullah Gül XVIII əsrdə Şərq memarlığı üslubunda tikilmiş Yuxarı Karvansaray mehmanxana kompleksi ilə tanış olub, Şəkinin tanınmış ziyalıları ilə görüşüb söhbət edib.
Həmin gün Türkiyə Prezidenti Zaqatala şəhərinə qayıdıb.
Bununla da, Türkiyə Prezidenti Abdullah Gülün ölkəmizə ikigünlük rəsmi səfəri başa çatıb.

Paylaş:

Baxılıb: 1208 dəfə