Zəfər zirvəsini fəth edən şanlı Ordu

Bakı:

25 °C

56 %

6 m/s

Əlaqə

AZ RU EN

Ana səhifə / Gündəm / Zəfər zirvəsini fəth edən şanlı Ordu

Zəfər zirvəsini fəth edən şanlı Ordu

26.06.2022 [13:21]

Artıq ikinci ildir ki, 26 İyun - Silahlı Qüvvələr Gününü Qələbə ovqatında qeyd edirik

Çoxəsrlik və zəngin dövlətçilik tarixinə malik Azərbaycan xalqı həm də şanlı, qüdrətli və qalib orduya sahib olması ilə qürur duyur - iftixar hissi keçirir. 104 il əvvəl yaradılan Azərbaycan Silahlı Qüvvələri bu gün dövlətimizin güc, xalqımızın isə güvən mənbəyi, inam və etibar ünvanıdır.

Artıq ikinci ildir ki, 26 İyun - Silahlı Qüvvələr Gününü Zəfər əhvalında - Qələbə ovqatında qeyd edirik. Çünki 44 günlük Vətən müharibəsində əzəmətli Zəfər yürüşü edərək möhtəşəm qələbə qazanan şanlı Azərbaycan Ordusu tarix yazıb, adını tarixə əbədi həkk etdirib.

Heç şübhəsiz, bu tarixi nailiyyət təsadüfən, yaxud əldə edilməyib. Qələbə zirvəsinin fəthini mümkün edən əsas amillərdən biri uğurlu ordu quruculuğudur. Müstəqillik tariximizdə nizami ordu quruculuğu ümummilli lider Heydər Əliyevin adı və fəaliyyəti ilə bağlıdır. Lakin xüsusi qeyd edilməlidir ki, Heydər Əliyev hələ SSRİ dövründə respublikamıza rəhbərlik edərkən peşəkar hərbi kadrların yetişdirilməsini diqqətdə saxlayır, bu istiqamətdə ardıcıl və məqsədyönlü addımlar atılırdı. 1971-ci il iyunun 20-də Cəmşid Naxçıvanski adına ixtisaslaşdırılmış hərbi məktəbin yaradılmasına nail olan Ulu Öndərimiz gənclərimizin Bakı Ali Birləşmiş Komandanlıq və Bakı Ali Hərbi Dənizçilik məktəblərinə, eləcə də SSRİ-nin digər hərbi məktəblərinə güzəştli şərtlərlə qəbul edilməsinə də müvəffəq olmuşdu. Bu gün Cəmşid Naxçıvanski adına Hərbi Liseyin milli zabit kadrlarımızın yetişdirilməsində və o dövrdə ali hərbi məktəbləri bitirmiş şəxslərin Silahlı Qüvvələrin formalaşmasında müstəsna rolu var. Bu məktəblərdə yetişən Azərbaycan hərbçiləri Birinci Qarabağ müharibəsində, Aprel döyüşlərində, Naxçıvan əməliyyatında 44 günlük Vətən müharibəsində yüksək peşəkarlıq, nümunəvi qəhrəmanlıq, rəşadət və cəsarət göstəriblər.

Prezident İlham Əliyevin bu sahəni xüsusi diqqətdə saxlaması - silahlı qüvvələrin inkişafı ilə əlaqədar müasir çağırışlara uyğun tədbirlərin həyata keçirilməsi nəticəsində Azərbaycan regionda ən güclü orduya malik dövlətə çevrilib. Və Azərbaycan Ordusu dünyanın ən güclü orduları sırasındadır.

Ordumuz döyüş meydanında öz sözünü deyib - gücünü düşmənə və bütün dünyaya göstərib. 2016-cı ildə Aprel döyüşləri, 2018-ci ildə Naxçıvan əməliyyatı hərb tariximizin parlaq səhifələrindəndir. Aprel qələbəsindən 4, Günnüt zəfərindən isə 2 il sonra - 44 günlük Vətən müharibəsində Azərbaycan Silahlı Qüvvələrinin düşmənə sarsıdıcı zərbə vuraraq 5 şəhər, 4 qəsəbə və 300-dək kəndi işğaldan azad etməsi isə hərbi-siyasi və dövlətçilik tariximizin bənzərsiz nailiyyətidir.

Ümumiyyətlə, İkinci Qarabağ müharibəsi bir çox cəhətləri ilə dünya hərb və siyasət tarixinə əbədi həkk olundu. Əsas məqamlardan biri odur ki, müharibə xalqın dəstəyini arxasına alaraq haqq mübarizəsi aparan - ədalət mücadiləsi verən Liderin siyasi portretinin cizgilərini aydın nümayiş etdirdi. Dünya ictimaiyyəti müharibə vəziyyətində xalqın və dövlətin liderinin hansı keyfiyyətlərin daşıyıcısı olmasının həlledici və zəruri olduğunu gördü. İlham Əliyev nümunəsi, sözün əsl mənasında, Liderlik obrazı idi. Azəbaycan Prezidentinin güclü strateq - cəsur və məğlubedilməz sərkərdə olduğu bir daha təsdiqləndi. İlham Əliyevin Ali Baş Komandan - cəsur və məğrur Sərkərdə kimi xalqın arasında, şəhid ailələrinin və qazilərin yanında olması da Azərbaycan əsgərinin, zabitinin döyüş ruhunu artırdı, onlara əlavə güc və inam bəxş etdi.
Ali Baş Komandan İlham Əliyevin rəhbərliyi ilə Azərbaycan Ordusu XXI əsrin müharibəsini aparmaqla mütərəqqi nümunə ortaya qoydu. Təsadüfi deyil ki, bu gün dünyanın aparıcı hərbi məktəblərində Azərbaycanın təcrübəsi geniş tədqiq olunur, öyrənilir. Bu, Cənubi Qafqazın lider dövlətinin hərbi-siyasi qüdrətinin ifadəsidir.

Xalqımız - dünya azərbaycanlıları haqlı olaraq, Müzəffər Ali Baş Komandanımızın təbiri ilə desək, öz əsgəri, zabiti və qalib Ordusu ilə fəxr edir. Ümummilli Liderimizin qeyd etdiyi kimi, Azərbaycan Ordusu ölkəmizin, millətimizin, dövlətimizin müstəqilliyinin dayağıdır!

Nurlan QƏLƏNDƏRLİ