Hacı Əliyev: Çalışıram ki, Azərbaycan güləşi daim zirvələrdə olsun

Bakı:

26 °C

44 %

6 m/s

Əlaqə

AZ RU EN

Ana səhifə / İdman / Hacı Əliyev: Çalışıram ki, Azərbaycan güləşi daim zirvələrdə olsun - AÇIQLAMA

Hacı Əliyev: Çalışıram ki, Azərbaycan güləşi daim zirvələrdə olsun - AÇIQLAMA

10.07.2025 [19:21]

Yarışlara və qələbələrə öyrəşmişəm. Düşünürəm ki, kifayət qədər güləşdim və böyük uğurlar əldə etdim. İndi isə yeni işimin başındayam.

Bu sözləri AZƏRTAC-a açıqlamasında "Paris-2024" Yay Olimpiya Oyunlarından sonra karyerasını başa vuran Azərbaycanın sərbəst güləşçisi Hacı Əliyev deyib.

Hazırda Azərbaycan Güləş Federasiyasında funksioner kimi fəaliyyət göstərən veteran idmançı yeni işindən bəhs edib: “Yaş qrupundan asılı olmayaraq, bütün milli komandaların koordinatoru vəzifəsində çalışıram. Bildiyim işdir. Məşqlərdə və yarışlarda yığmalarla birlikdə oluram. Misal üçün, bu yaxınlarda yeniyetmələr arasında dünya çempionatı keçiriləcək. Mən də güləşçilərimizlə birgə mundiala yollanacağam. Fikrimcə, bu gün idmançıların yanında olmaq onlar üçün də böyük stimuldur. Karyeramı yeni başa vurduğum üçün milli komandanın üzvləri ilə ünsiyyətimiz tamamilə fərqlidir. Onlarla dostluq münasibətimiz var. Sözsüz ki, hörmət də öz yerindədir. Onlarla rahat şəkildə məşq edir, öz bildiklərimi bölüşürəm. Çalışıram ki, Azərbaycan güləşi daima zirvələrdə olsun və uğurlarımızın sayı günü-gündən artsın. Bunun üçün əlimizdən gələni edirik”.

O, aşağı yaş qruplarında güləşin hazırkı durumundan da söz açıb: “Yeniyetmə və gənclərimiz bu yaxınlarda Avropa çempionatından medallarla döndülər. Təbii ki, mükafatsız qalanlar da oldu. Bu o demək deyil ki, həmin uşaqlar zəifdirlər. İdman elə bir şeydir ki, hər zaman qalib gəlmək olmur. Potensiallı yeniyetmələrimizin sayı çoxdur. Bəzən beynəlxalq yarışlarda yer tutan uşaqlar yuxarı yaş qruplarına cəlb olunduqdan sonra nəticə verə bilmirlər. Çalışacağam ki, belə gənclərimiz itməsinlər. Onları xüsusi nəzarətdə saxlayırıq. Başqa cür mümkün deyil. Belə güləşçilərimizi qoruyub saxlamaq lazımdır. Ümid edirəm ki, gələcəkdə də öz işimizlə gözəl nəticələrə imza ata biləcəyik”.

H.Əliyev qarşıdakı illərdə məşqçi ola bilmək ehtimalından da danışıb: “Əlbəttə ki, ola bilər. Koordinator elə bir vəzifədir ki, sadəcə, idmançılara deyil, məşqçilərin proqramlarına da nəzarət edilir. Əslində, onlara göstəriş verməyə heç ehtiyac yoxdur. Çünki məşqçilərimizin hər biri peşəkardır. Onlar da bir zamanların Avropa və dünya çempionları olublar. Hazırda sərbəst güləş üzrə milli komandanın baş məşqçisi Xetaq Qazyumovdur. Onun da 2028-ci ildə Los-Ancelesdə keçiriləcək Yay Olimpiya Oyunlarına qədər müqaviləsi var. Gələcəkdə hər şey ola bilər. Dəyişikliklər hər zaman gözləniləndir. Mən isə öz növbəmdə güləşimizin inkişafı üçün əlimdən gələni edəcəyəm. Sonuncu dəfə sərbəst güləş üzrə dünya çempionu 2017-ci ildə mən olmuşam. 8 ildir bu nəticəni təkrarlayan yoxdur. Təbii ki, xoş hal deyil. İstedadlı uşaqlarımız var. Ad çəkmək istəmirəm. İnanıram ki, onlar dünya çempionu adına sahib çıxacaqlar”.

Qeyd edək ki, Hacı Əliyev ikiqat olimpiya mükafatçısı, üçqat dünya və dördqat Avropa çempionudur.

Paylaş:

Baxılıb: 652 dəfə