Formula-1 yarışı ilə əlaqədar regionlarda keçiriləcək çempionat və seminarlar 2500-dək məktəblini əhatə edəcək

Bakı:

31 °C

41 %

3 m/s

AZ RU EN

Ana səhifə / İdman / Formula-1 yarışı ilə əlaqədar regionlarda keçiriləcək çempionat və seminarlar 2500-dək məktəblini əhatə edəcək

Formula-1 yarışı ilə əlaqədar regionlarda keçiriləcək çempionat və seminarlar 2500-dək məktəblini əhatə edəcək

17.02.2018 [09:53]

“Bakı Şəhər Halqası” Əməliyyat Şirkəti (BŞH) Azərbaycan Avtomobil Federasiyası (AAF) ilə birlikdə regionlarda avtoidman üzrə maarifləndirmə ayı çərçivəsində “Sənin sürət formulan” şüarı altında simulyatorda Formula-1 (F1) çempionatı keçirəcək. Çempionat çərçivəsində, həmçinin yol hərəkəti təhlükəsizliyinə dair seminarlar da təşkil olunacaq.
AZƏRTAC xəbər verir ki, layihənin məqsədi Azərbaycanın regionlarında gənclər arasında F1 və yol hərəkəti təhlükəsizliyi haqqında məlumatlılığı artırmaqdır. Fevralın 19-dan martın 10-dək davam edəcək layihə çərçivəsində keçiriləcək çempionat və seminarlarda Lənkəran, Şirvan, Füzuli, Mingəçevir, Qax və Qubanın yuxarı sinif şagirdləri iştirak edəcəklər.
Çempionatın ilk mərhələsində hər regiondan bir qalib seçiləcək. Həmin qaliblər Novruz bayramı ərəfəsində Bakıda təşkil olunacaq final turunda yarışacaqlar. Yarışın sonunda qaliblərlə yanaşı, final mərhələsinin digər iştirakçılarına da sertifikat və qiymətli hədiyyələr təqdim olunacaq.
Bununla əlaqədar “Baku Crystal Hall”da keçirilən mətbuat konfransında BŞH-nin marketinq və kommunikasiya şöbəsinin rəhbəri Nigar Arpadarai layihənin region ictimaiyyəti arasında F1-ə böyük həvəs yaradacağına əminliyini bildirərək deyib: “Son illər ölkəmizdə keçirilən Formula-1 yarışları ölkə ictimaiyyəti arasında bu idmana böyük maraq oyadıb. Yarışlar Bakıda keçirildiyindən F1-in əyləncə və coşğusunu paytaxt sakinləri daha çox hiss edirlər. Ona görə də bu layihə vasitəsilə çalışırıq ki, region ictimaiyyəti də Bakıdakı yarış həyəcanını və coşğusunu yaşaya bilsin. İnanırıq ki, bu layihə region əhalisini F1 ilə daha yaxından tanış edərək ölkə ictimaiyyəti arasında avtoidmana maraq göstərən azarkeşlərin sıralarını əhəmiyyətli dərəcədə genişləndirəcək”.
Azərbaycan Avtomobil Federasiyasının mobillik üzrə koordinatoru Zafiq Xəlilov bildirib ki, layihə çərçivəsində yol hərəkəti təhlükəsizliyinə dair məktəblilər üçün seminarlar da keçiriləcək: “AAF yol hərəkəti təhlükəsizliyinə dair mütəmadi olaraq maarifləndirmə işləri, o cümlədən məktəblilər arasında “Yol hərəkəti qaydalarını öyrənək” adlı seminarlar keçirir. Seminarlarda məktəblilərə yol hərəkəti təhlükəsizliyi, o cümlədən yol nişanları, işıqfor, piyada keçidi, təhlükəsizlik kəmərindən istifadə və digər zəruri mövzular haqqında ətraflı məlumat veriləcək. Həmçinin seminar iştirakçılarına müvafiq videoçarxlar təqdim olunacaq, nəşrlər paylanacaq. İnanırıq ki, layihə region məktəblilərinin yol hərəkəti təhlükəsizliyi barəsində ətraflı maariflənməsinə töhfə verəcək”.
Sonra simulyatorların yerləşdirildiyi xüsusi konteyner jurnalistlərə nümayiş olunub. Hər rayonda üç gün ərzində keçiriləcək tədbirlərdə 2500-dək məktəbli iştirak edəcək. Rayon yarışlarının qalibləri Bakıda təşkil olunacaq xüsusi proqrama qatılacaqlar.

Paylaş:

Baxılıb: 1249 dəfə