“Qarabağ”dan futbol tariximizə yenilik

Bakı:

26 °C

51 %

4 m/s

Əlaqə

AZ RU EN

Ana səhifə / İdman / “Qarabağ”dan futbol tariximizə yenilik

“Qarabağ”dan futbol tariximizə yenilik

18.02.2023 [11:35]

Pley-off mərhələsində ilk qələbə!

Matç öncəsi Türkiyə dəstəyi

G.QABİLQIZI

Fevralın 16-da “Qarabağ” UEFA Konfrans Liqasının pley-off mərhələsində ilk oyununu keçirdi. Komanda Bakıda Belçikanın “Gent” klubu ilə üz-üzə gəldi.

Tofiq Bəhramov adına Respublika stadionundakı qarşılaşmanı Məhəmməd Al-Hakimin rəhbərlik etdiyi İsveçdən olan hakimlər briqadası idarə etdi. Matç Türkiyə və Suriyada baş vermiş zəlzələdə dünyasını dəyişənlərin xatirəsinə görə bir dəqiqəlik sükutla başladı.

“Qarabağ”dan əhəmiyyətli qələbə

Görüşün ilk dəqiqələri kəşfiyyat xarakteri daşıdı.

8-ci dəqiqədə rəqib hesabı açmağa yaxın olsa da, istəyinə nail ola bilmədi. Beləliklə, ilk hissə qolsuz bərabərliklə yekunlaşdı.

İkinci yarıya “köhlən atlar” daha fəal başlayan tərəf oldu. Komandamız sonlara yaxın “Gent”i öz cərimə meydançasında sıxmağa başladı. Bunun uğurlu nəticəsi kimi 78-ci dəqiqədə Leandro Andrade topu rəqib qapısından keçirdi. 89-cu dəqiqə Redon Cicanın zərbəsindən sonra top dirəyə dəyib.

Beləliklə, matç Azərbaycan təmsilçisinin 1:0 hesablı qələbəsi ilə başa çatdı. Qeyd edək ki, cavab görüşü fevralın 23-də Belçikada baş tutacaq.

Klub rəhbərlərinin qalibiyyət təəssüratları

“Qarabağ”ın prezidenti Tahir Gözəl oyunla bağlı təəssüratlarını media ilə bölüşüb. Bildirib ki, “Ağdam” klubu Azərbaycan futbolu tarixində ilkə imza atıb: “Əvvəlcə Türkiyə xalqına başsağlığı verirəm. “Qarabağ”ın qələbəsi bu kədərli günlərdə bizə təsəlli oldu. Qeyd etmək istərdim ki, bu, bizim Pley-off mərhələsində ilk qələbəmizdir. Çox uğurlu addımdır. Amma oyun hələ bitməyib. Bu qələbə heç nə demək deyil. Fevralın 23-dəki cavab oyununda mən də Belçikada olacağam. Həmin qarşılaşma bizim üçün çox önəmlidir. Tarixi görüşə çıxacağıq”.

O, oyundan razı qaldığını söyləyib: “Bilirsiniz ki, komandada çox dəyişikliklər baş verdi. Gedən, zədə səbəbindən oynaya bilməyən futbolçularımız oldu. Amma sevinirəm ki, “Qarabağ” bu gün heç bir oyunçudan asılı olmadığını sübut etdi. Biz artıq Avropa klubuyuq. Komandanın ənənəsinin olduğunu, Avropa futbolu sərgilədiyini, həmçinin Qurban Qurbanovun məharətini bir daha gördük. Fəxr edirəm. Qoy, bu qələbə xalqımıza təsəlli olsun”.

T.Gözəl “Qarabağ”ın 1/8 finala yüksəlmək şanslarını da dəyərləndirib: “Bugünkü oyuna baxanda insan ümidlənir. Rəqibin çox sürətli əks hücumları var. Dinamikalı komandadır. Səfər matçında diqqətli olmalıyıq. Yeni transferlərimiz komandaya yanvarda qoşulublar. Hesab edirəm ki, cavab oyunu öncəsi 1 addım öndəyik. Oradan yaxşı nəticə ilə qayıdacağımıza inanıram”.

Klub prezidenti bu qələbəni Türkiyə xalqına həsr edib: “Allah ölənlərə rəhmət eləsin, sağ qalanlara şəfa versin. Bu da bizim Türkiyəyə mənəvi hədiyyəmiz olsun”.

Yeni transferlərdən razıyıq

“Qarabağ”ın baş məşqçisi Qurban Qurbanov əvvəlcə mübarizə üçün futbolçularına təşəkkür edib. Bildirib ki, pley-offda ilk qalibiyyət oyunçuların böyüməsi üçün önəmlidir: “Dinamik rəqibə qarşı çıxış edirdik. Bu cür komandalara həmişə hörmətlə yanaşıram. Çox sürətli oynayırdılar. Onlara qarşı mübarizə aparmaq böyümək üçün şansdır”.

Qurbanov yeni transferlərdən razı qaldığını söyləyib: “Onlara bir az vaxt lazımdır. İşlər pis getmir. Hamısı məsuliyyətli futbolçulardır”.

Paylaş:

Baxılıb: 713 dəfə