AQEM-Azərbaycan platforması sahibkarlara yeni imkanlar qazandıracaq

Bakı:

10 °C

81 %

6 m/s

Əlaqə

AZ RU EN

Ana səhifə / İqtisadiyyat / AQEM-Azərbaycan platforması sahibkarlara yeni imkanlar qazandıracaq

AQEM-Azərbaycan platforması sahibkarlara yeni imkanlar qazandıracaq

22.05.2025 [09:56]

Təşkilatın 10-cu biznes-forumunda sahibkarlar yeni imkanları qiymətləndirib

Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Biznes Şurasının 8-ci iclası mühüm hadisələrlə yadda qalıb. Tədbirdə iştirak edən ölkələrin nüfuzlu iqtisadi qurumları, biznes icması və şirkətlərin nümayəndələri iqtisadi, ticari və investisiya məsələləri ilə bağlı əhəmiyyətli razılaşmalar əldə ediblər. Ən mühüm tədbirlərdən biri isə Azərbaycan Respublikasının Kiçik və Orta Biznesin İnkişafı Agentliyinin (KOBİA) və AQEM Katibliyinin təşkilatçılığı ilə 10-cu biznes-forumun keçirilməsi və iş adamları arasında yeni fürsətlər üzrə müsbət qərarların qəbul edilməsi hesab oluna bilər. Qeyd edək ki, AQEM Nazirlər Şurasının qərarına əsasən, 2024-2026-cı illərdə Müşavirəyə Azərbaycan sədrlik edir. Azərbaycanın təşkilata rəhbərliyi çərçivəsində isə Biznes Şurasına sədrlik KOBİA tərəfindən həyata keçirilir.

KOB-lar rəqəmsallaşma və “yaşıl transformasiya”da birləşir

Biznes-forumda AQEM-ə üzv dövlətlər arasında sənaye sahəsində əməkdaşlıq, KOB-ların qlobal dəyər zəncirində iştirakı, rəqəmsallaşma, qadın sahibkarlığının inkişafı, KOB-ların “yaşıl” keçidi, sərhədlərarası ticarət və e-ticarət, KOB-ların investisiyalarını dəstəkləyən institusional çərçivələr, biznes sahəsində çağırışlar və imkanlar müzakirə edilib. Müzakirələr zamanı AQEM-ə üzv dövlətlər arasında sahibkarlıq sahəsində əməkdaşlığı gücləndirmək, xüsusilə kiçik və orta biznesin (KOB) dəstəklənməsi, sərhədlərarası tərəfdaşlıqların qurulması, habelə regionda dayanıqlı, innovativ və inklüziv iqtisadi artımın təşviqinə yönəlmiş təşəbbüsləri inkişaf etdirmək niyyətləri ifadə olunub. Həmçinin tərəflər KOB-ların rəqəmsallaşdırılması, sənaye əməkdaşlığı, qadın sahibkarlığı, “ağıllı şəhər” təşəbbüsləri və “yaşıl transformasiya” kimi məsələlər ətrafında gələcək əməkdaşlıq yollarını müəyyənləşdirib.

Əməkdaşlığın yeni ekosisteminin yaradılması

Qazaxıstan, Rusiya, Tailand, Türkiyə, Çin, Hindistan, Qırğızıstan, Fələstin və Özbəkistanın sənaye və ticarət palatalarının, investisiyaların təşviqi agentliklərinin, sahibkarlıqla bağlı təşkilatlarının nümayəndələri tərəfindən sənaye əməkdaşlığı və KOB-ların qlobal dəyər zəncirində iştirakı, rəqəmsallaşma, AQEM-ə üzv dövlətlər arasında qadın sahibkarlığının inkişafı, KOB-ların yaşıl keçidi, sərhədlərarası ticarət və e-ticarət, KOB-ların investisiyalarını dəstəkləyən institusional çərçivələr mövzularında təqdimatlar keçirilib.

AQEM-in baş katib Kayrat Sarıbay çıxışında AQEM Biznes Şurasının üzv ölkələr arasında iqtisadi əməkdaşlıq, əlaqələrin genişləndirilməsi imkanları baxımından əhəmiyyətli platforma olduğunu vurğulayıb. Bildirib ki, AQEM ölkələri arasında əməkdaşlıq ekosisteminin yaradılması regional inkişafın yeni üfüqlərini açacaq və daha inklüziv, rəqəmsal və dayanıqlı iqtisadi gələcəyin formalaşmasına kömək edəcək.

AQEM-in Biznes Şurasının sədri və KOBİA-nın İdarə Heyətinin sədri Orxan Məmmədov isə bildirib ki, forum kiçik və orta bizneslərin iqtisadi artımını sürətləndirmək və AQEM regionu üzrə iqtisadi əlaqələri gücləndirmək üçün yeni qapılar açacaq. KOB-lar öz bilik və bacarıqların, rəqəmsal transformasiya və dayanıqlı inkişaf sahələrində təşəbbüslərini AQEM ölkələrinin biznes icması ilə əlaqələndirməkdə yeni nəticələr əldə etmək imkanı qazanacaq.

Kiçik və orta biznes üçün yeni fürsətlər

Biznes-forum çərçivəsində Azərbaycan KOB-larının istehsal etdiyi qida və qeyri-qida məhsullarından ibarət kiçik sərginin təşkili isə milli ixracın təşviqi baxımından yeni imkan kimi dəyərləndirilə bilər. Bu, həmçinin Azərbaycanın qeyri-neft məhsullarının Asiya bazarlarına çıxışı, KOB-ların yeni bazar müştəriləri tapması üçün təşviqedici və stimulyaradıcı alət deməkdir. Nəzərə alsaq ki, Asiya böyük imkanlara malik regiondur və iqtisadi bazar payı ildən-ilə artır, zəngin insan kapitalı, innovasiya potensialı və güclü iqtisadi bazası genişlənir, bu baxımdan Azərbaycanın regional iqtisadi əməkdaşlıq və dialoqda rolunun möhkəmlənəcəyi istisna deyil. Hazırda Azərbaycanın AQEM-ə üzv ölkələr ilə ixracının dəyəri 1,2 milyard dollar, ümumi ticarət dövriyyəsi isə 4,6 milyard dollar təşkil edib. Bu rəqəmlər iqtisadiyyatlarımız arasındakı əlaqələrin genişləndiyini göstərir. Ona görə də, AQEM-Azərbaycan platforması sahibkarlar, investorlar və innovatorlar arasında birgə iqtisadi mübadilələrin artması iqtisadi artımn və gələcək rifahın da yaxşılaşmasına öz töhəfəsni verəcək.

Biz sözlə, biznes-forum azərbaycanlı kiçik biznes icmasının üzvlərinin AQEM ölkələrinin sahibkarları ilə əlaqələrinin qurulması, koordinasiyalı fəaliyyətinin təmin edilməsi üçün əlavə fürsətlər yaradacaq.

E.CƏFƏRLİ

Paylaş:

Baxılıb: 387 dəfə