Arxangelsk vilayəti ilə aqrar sahədə əməkdaşlıq imkanlarının genişləndirilməsi məsələləri müzakirə olunub

Bakı:

10 °C

81 %

5 m/s

AZ RU EN

Ana səhifə / İqtisadiyyat / Arxangelsk vilayəti ilə aqrar sahədə əməkdaşlıq imkanlarının genişləndirilməsi məsələləri müzakirə olunub

Arxangelsk vilayəti ilə aqrar sahədə əməkdaşlıq imkanlarının genişləndirilməsi məsələləri müzakirə olunub

03.11.2016 [09:56]

Noyabrın 2-də kənd təsərrüfatı naziri Heydər Əsədov VII Azərbaycan-Rusiya Regionlararası Forumunda iştirak etmək üçün Bakıda səfərdə olan Rusiya Federasiyasının Arxangelsk vilayətinin qubernatoru İqor Orlov ilə görüşüb.
Kənd Təsərrüfatı Nazirliyindən AZƏRTAC-a bildiriblər ki, Azərbaycan Respublikası ilə Rusiya Federasiyasının Arxangelsk vilayəti arasında aqrar sahədə əməkdaşlıq imkanlarının genişləndirilməsi və kənd təsərrüfatı məhsullarının idxal və ixrac proseslərinin səmərəliliyinin artırılması görüşün əsas müzakirə mövzularından olub.
Ölkələrimiz arasında iqtisadi, siyasi, o cümlədən aqrar sahədə geniş əlaqələrin olduğunu deyən nazir Heydər Əsədov dövlətimizin başçısının iqtisadiyyatın prioritet sahəsi kimi kənd təsərrüfatının inkişafına daim diqqət və qayğı göstərdiyini vurğulayıb.
Qarşılıqlı əməkdaşlıq əlaqələrindən danışan Heydər Əsədov bildirib ki, noyabrın 1-də Bakıda keçirilən VII Azərbaycan-Rusiya Regionlararası Forumu çərçivəsində iş adamları arasında ikitərəfli görüşlər təşkil olunub. “Aqrar sahədə əməkdaşlığın genişləndirilməsinin başlıca istiqamətləri” adlı “dəyirmi masa”da hər iki ölkənin kənd təsərrüfatı sahəsində təcrübəsinə, bu sahədə tətbiq olunan qabaqcıl texnologiyalara və yeniliklərə, aqrar məhsulların keyfiyyətinin artırılmasına, ixracın genişləndirilməsinə, əməkdaşlığın inkişafına dair ətraflı fikir mübadiləsi aparılıb, logistikanın inkişafının hər iki tərəf üçün əhəmiyyəti vurğulanıb, kənd təsərrüfatının müxtəlif sahələri üzrə ixtisaslaşmış Azərbaycan regionlarının potensialına dair təqdimatlar keçirilib.
Sonra nazir Azərbaycanın iqlim şəraitinin aqrar sektorun müxtəlif sahələrinin inkişafı üçün əlverişli olduğunu, ölkəmizdə istehsal edilən kənd təsərrüfatı məhsullarının ekoloji baxımdan keyfiyyətliliyini qonağın nəzərinə çatdırıb.
Ölkəmizin ixrac potensialı barədə ətraflı məlumat verən Heydər Əsədov Azərbaycan ilə Rusiyanın Arxangelsk vilayəti arasında kənd təsərrüfatı məhsullarının ixracı sahəsində əməkdaşlıq üçün geniş imkanların olduğunu vurğulayıb. Vilayətin kənd təsərrüfatı məhsullarına olan tələbatının Azərbaycan məhsulları ilə vaxt və xərc itkisini azaltmaqla təmin olunmasının mümkünlüyü qubernatorun diqqətinə çatdırılıb. Heydər Əsədov Arxangelsk vilayətinin ehtiyac duyduğu kənd təsərrüfatı məhsullarının idxal və ixrac potensialı əsasında öncədən müəyyənləşdirilərək, vilayətin sahibkarlarının birbaşa sifarişi əsasında Azərbaycandan qarşı tərəfə ixrac olunmasını təklif edib.
Arxangelsk vilayətinin qubernatoru İqor Orlov nazir tərəfindən irəli sürülən təklifin təqdirəlayiq olduğunu bildirib.
Görüşün sonunda qeyd olunan məsələlərlə bağlı işçi qrupu səviyyəsində qarşılıqlı müzakirələrin aparılmasına dair ilkin razılıq əldə edilib.

Paylaş:

Baxılıb: 829 dəfə