Ümid və gələcəyə inamın simvolu...

Bakı:

23 °C

59 %

4 m/s

Əlaqə

AZ RU EN

Ana səhifə / Maraqlı / Ümid və gələcəyə inamın simvolu...

Ümid və gələcəyə inamın simvolu...

25.12.2025 [09:18]

Milad nədir, harada və necə qeyd olunur?

Bu gün xristianlar Milad Bayramını qeyd edirlər. İsa Peyğəmbərin anadan olduğu gün kimi qəbul edilən 25 dekabr həmçinin Doğuş Bayramı, ya da Milad Ziyafəti kimi adlarla da məşhurdur. Xristian dünyası bu bayramı yeni ümidlərin başlanğıcı, gələcəyə inamın simvolu kimi qəbul edirlər. Bayram həm dini, həm də mədəni mənada böyük əhəmiyyətə malikdir. Məlumdur ki, İsa Peyğəmbər xristianlar üçün Tanrının oğlu olaraq qəbul edilir, onun doğumu dünyaya ümid və sevgi gətirmək məqsədi daşıyır.

Milad Bayramının rəsmi olaraq təyin edilməsi və qeyd olunması İsa Peyğəmbərin doğumundan uzun müddət sonra baş verib. Belə ki, Miladın ilk dəfə qeyd olunması 4-cü əsrdə (336-cı ildə) Roma İmperiyasının imperatoru I Konstantin tərəfindən Roma şəhərində təşkil olunan bir kilsə şurasında qəbul edilib. Bayramın ən məşhur simvollarından biri Milad ağacıdır. Bu, ənənəvi olaraq ya təbii, ya da süni olaraq bəzədilir. Ağacın üzərində müxtəlif rəngli işıqlar, oyuncaq və bəzəklər olur.

Hədiyyə vermək isə Miladın ən çox sevilən ənənələrindən biridir. Bu, insanlar arasında sevgi və əlaqələrin möhkəmlənməsinə xidmət edir. Hədiyyələr Milad səhərində, ya da 24 dekabr gecəsi verilir.

Milad bayramında xüsusi yeməklər hazırlanır. Bu yeməklər ölkəyə və ənənələrə görə dəyişə bilər, lakin ənənəvi olaraq, şirniyyatlar, xüsusilə Milad tortu, keklər, təzə bişirilmiş çörəklər və yemək süfrələri önə çıxır.

Ölkələrin maraqlı Milad adətləri

Milad bayramı dünyanın müxtəlif yerlərində fərqli yollarla qeyd olunur. Advent təqvimləri, hinduşka qızartması və Şaxta babanın bacadan gəlməsini gözləmək bir çox ölkələrdə bayramın əsas hissəsidir. Lakin bəzi bölgələrin daha unikal ənənələri də var. Gəlin, dünyanın ən maraqlı və fərqli Milad adətlərinə nəzər salaq:

Yaponiyada Milad süfrəsində hinduşka əvəzinə, Kentukki-qızardılmış toyuq üstünlük təşkil edir. Bu, kiçik ev sobalarının istifadəsi və KFC-nin uğurlu reklam kampaniyası nəticəsində ənənəyə çevrilib. Hətta Milad üçün KFC-də yemək sifarişi etmək lazımdır. Polkovnik Sandersin heykəlləri də Santa geyimində görünür.

Norveçdə insanlar Milad gecəsi süpürgələri gizlədirlər. Çünki inanclara görə, həmin gecə pis ruhlar və cadugərlər gəlir. Süpürgələri gizlətməmək bayram sevincini poza bilər.

Venesuelanın paytaxtı Karakas şəhərində insanlar kilsə ibadətinə konki ilə gedirlər. Milad həftəsi yollar bağlanır və bu adət təhlükəsiz şəkildə davam edir.

Avstriyada Krampus adlı iblis Miladdan əvvəl pis uşaqları qorxudur. İnsanlar şeytan paltarında küçələrdə gəzərək pis uşaqları cəzalandırmaq üçün onlara qorxu yaşadırlar.

Kataloniyada isə “Caga Tio” adlı maraqlı bir ənənə var. İnsanlar ağac kötüyünə üz çəkib papaq taxır və onu şirniyyatla qidalandırırlar. Milad ərəfəsində kötüyü çubuqla döyərək şirniyyatın ortaya çıxmasını gözləyirlər. Bu adət çox qəribə və əyləncəli görünür.

İsveçdə nəhəng Yule keçiləri düzəldilir. Ən məşhuru Gavle şəhərində olur və hər il bəzən yandırılmaq təhlükəsi ilə üzləşir.

Qvatemalada insanlar Miladdan əvvəl evlərini təmizləyir və bütün zibili toplayıb yandırırlar. Bu, şeytanı qovmaq və yeni ilə təmiz başlamaq üçün edilir.

Ukraynada ağaclar hörümçək torları ilə bəzədilir. Bu adət köhnə bir nağıldan ilhamlanıb və uğur gətirdiyinə inanılır.

Portuqaliyada “konsoda” zamanı masaya mərhum qohumlar üçün də yerlər hazırlanır. Bu adət ailəyə uğur gətirir və hər kəsi bir araya gətirir.

İtaliyada La Befana adlı qoca cadugər uşaqlara hədiyyələr gətirir. Əfsanəyə görə, o, vaxtilə İsa peyğəmbəri ziyarət etmək fürsətini qaçırıb.

Çexiyada subay qadınlar Milad ərəfəsində arxalarını qapıya çevirib ayaqqabılarını çiyinlərindən atırlar. Əgər ayaqqabının ucu qapıya tərəf düşərsə, həmin il evlənəcəklərinə inanırlar.

Almaniyada uşaqlar dekabrın 5-də qapılarının qarşısına çəkmə qoyurlar. Səhər çəkmələrdə şirniyyat tapsalar, yaxşı davrandıqlarını bilirlər. Əks halda, çəkmədə yalnız bir budaq görürlər.

Hər bir ənənə fərqli olsa da, hamısı Miladın sevincini və birlik ruhunu paylaşır.

Miladla Yeni il eyni bayramdır?

Bəzən Milad ilə Yeni ilin eyni bayram olduğunu düşünənlər var. Hətta bununla bağlı insanlarda müəyyən çaşqınlıqlar da yaranır. Lakin qeyd etdiyimiz kimi, Milad İsa peyğəmbərin anadan olması ilə bağlıdır və 25 dekabrda qeyd olunan xristianlara məxsus bir bayramdır.

Yeni il isə müəyyən bir dini bayram deyil və dünya miqyasında bir çox ölkədə bir ilin bitib digərinin başlamasının qeyd olunduğu gecəyə verilən addır. 31 dekabr gecəsi qeyd olunur və 1və 2 yanvar günləri bir çox ölkədə rəsmi tətil hesab olunur.

Yeganə BAYRAMOVA

Paylaş:

Baxılıb: 585 dəfə