Praqada Ermənistanın mina terrorunun qurbanlarına həsr olunmuş fotosərgilər açılıb

Bakı:

22 °C

75 %

4 m/s

Əlaqə

AZ RU EN

Ana səhifə / Mədəniyyət / Praqada Ermənistanın mina terrorunun qurbanlarına həsr olunmuş fotosərgilər açılıb

Praqada Ermənistanın mina terrorunun qurbanlarına həsr olunmuş fotosərgilər açılıb

14.10.2024 [18:09]

Oktyabrın 12-13-də Çexiyanın paytaxtı Praqada Ermənistanın Azərbaycana qarşı apardığı mina terrorunun qurbanlarına həsr olunmuş fotosərgilər açılıb. Fotosərgilər “Gilavar Foto Klubu” İctimai Birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə və Çexiyada fəaliyyət göstərən “Land of Fire” təşkilatının təşkilati dəstəyi ilə reallaşıb.

İctimai Birlikdən AZƏRTAC-a bildirilib ki, “Düyməni sıxan ayaqlar” adlı ilk fotosərgi şəhərin tarixi mərkəzində yerləşən Qədim Şəhər meydanında təşkil olunub. Həmin meydanın sahəsi təxminən 9 min kvadratmetrdir. 20 fotoşəkildən ibarət sərgi insanların daha çox hərəkət etdiyi ərazidə qurulub. Bununla da çoxlu sayda turist və yerli sakin fotosərgini ziyarət edə bilib.

Sərginin ikinci günü insanların ən çox ziyarət etdiyi məkanlardan sayılan Respublika meydanında baş tutub. Praqada və Avropanın digər şəhərlərində yaşayan azərbaycanlılar da sərgi ilə yaxından tanış olublar. Tədbirdə Azərbaycanın Çex Respublikasındakı səfirliyinin əməkdaşları da iştirak ediblər. Sərgidə Azərbaycan Bayrağı, eləcə də “Gilavar Foto Klubu”nun bayrağı dalğalandırılıb.

Layihə rəhbəri Rəşad Mehdiyev bildirib ki, iki gün davam edən sərgilər zamanı minlərlə ziyarətçi Ermənistanın Azərbaycana qarşı apardığı mina terroru ilə bağlı ətraflı məlumat əldə edib. Sərgidə nümayiş olunan fotoşəkillər peşəkar fotoqraf Famil Mahmudbəyli tərəfindən çəkilib və Azərbaycanda çap olunub. Hər bir fotonun yanında məlumat xarakterli lövhələrdə mina qurbanlarının hekayələri ingilis dilində əks olunub. Sərgini ziyarət edən şəxslərə bu günə qədər davam edən mina terroru haqqında şifahi olaraq da məlumatlar verilib.

Fotosərgilər “Təhlükənin kulminasiya nöqtəsi” adlı fotolayihənin tərkib hissəsidir. Layihənin əsas məqsədi mina qurbanlarının sayının artmasının qarşısının alınmasına dəstək vermək, müxtəlif dövrlərdə Azərbaycan Respublikasının ərazisində mina partlayışları nəticəsində zərərçəkmiş insanların düşdüyü vəziyyətlərini fotolar vasitəsilə göstərmək, onların acı həyat hekayələrini öz dillərindən eşitmək, cəmiyyətə və bütün dünyaya mesaj ötürməkdir. İnsanları mina və partlamamış hərbi sursatlar, minaların yaratdığı təhlükə və onlardan qorunma qaydaları barədə məlumatlandırmaqdır. Layihə çərçivəsində 30 ildən artıq müddətdə mina hadisəsi qurbanları olan insanlar ilə görüşlər keçirilib, bu insanların acı durumu fotolarda olduğu kimi əksini tapıb.

Qeyd edək ki, “Gilavar Foto Klubu” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin 2024-cü il üçün elan etdiyi böyük qrant müsabiqəsinin “İtkin düşmüş, əsir və girov götürülmüş şəxslərin hüquqlarının müdafiəsi, mina və partlamamış hərbi sursatların yaratdığı təhlükə və onunla mübarizə” mövzusu üzrə qaliblərindən biridir.

Paylaş:

Baxılıb: 663 dəfə