2018-ci ildə Naxçıvan öz mədəniyyəti ilə bütün müsəlman ölkələrini birləşdirəcək

Bakı:

25 °C

59 %

1 m/s

Əlaqə

AZ RU EN

Ana səhifə / Mədəniyyət / 2018-ci ildə Naxçıvan öz mədəniyyəti ilə bütün müsəlman ölkələrini birləşdirəcək

2018-ci ildə Naxçıvan öz mədəniyyəti ilə bütün müsəlman ölkələrini birləşdirəcək

10.11.2009 [09:32]

ölkəmizdə türk dünyasını, müsəlman ölkələrini və bütövlükdə beynəlxalq aləmi əhatə edən çoxsaylı ali, ən mötəbər məclislərin keçirilməsi dövlətimizin uğurlarından biridir. ötən ay Bakıda “Gülüstan” sarayında “Bakı-İslam Mədəniyyətinin Paytaxtı-2009” mədəniyyət ili çərçivəsində İslam Konfransı Təşkilatına (İKT) üzv dövlətlərin mədəniyyət nazirlərinin 6-cı konfransının keçirilməsi də bunu bir daha təsdiq etdi. 45-dən çox ölkədən, o cümlədən, İSESKO, İRSİKA, Avropa Şurası, TüRKSOY və digər təşkilatlardan 200-dən çox iştirakçının qatıldığı tədbir Azərbaycanla İKT arasında mövcud olan mədəni əlaqələri və ölkəmizin İslam mədəniyyətinin formalaşmasındakı rolunu bir daha təsdiqləyib. Həmin tədbirdə 2015-ci ildən 2024-cü ilədək İslam mədəniyyətinin paytaxt şəhərlərinin müəyyənləşdirilməsi üçün verilən təkliflərin müzakirəsindən sonra Naxçıvan şəhəri 2018-ci ildə İslam mədəniyyətinin paytaxtı seçilib.
Naxçıvanın 2018-ci ildə İslam mədəniyyətinin paytaxtı seçilməsi müxtəlif sivilizasiyaların qovşağında yerləşən ölkəmizin və onun ayrılmaz tərkib hissəsi olan Muxtar Respublikamızın zəngin tarixinə və mədəniyyətinə verilən yüksək qiymətin nəticəsidir. Naxçıvan dünyanın ən qədim mədəniyyətə malik olan şəhərlərindəndir. Yaşı min illərlə ölçülən Naxçıvan torpağı böyük tarixə, zəngin maddi və mədəni abidələrə, gözəl təbiətə, mehriban və qonaqpərvər insanlara malikdir. Bəşər sivilizasiyasının ilkin beşiklərindən sayılan bu qədim oğuz-türk yurdu Azərbaycanın mədəni mərkəzlərindən biridir.
Bu gün məsafə baxımından Azərbaycandan ayrı düşən Naxçıvan Qərblə Şərqi birləşdirən, tarixi ticarət yolları üzərində yerləşən ən qədim Azərbaycan torpağı və onun ayrılmaz parçasıdır. Məşhur “İpək yolu”nun üzərində yerləşən Naxçıvan Muxtar Respublikası işğalçı Ermənistan tərəfindən blokadaya alınmasına baxmayaraq inkişaf edir və müasirləşir.
ölkəmizin digər bölgələri ilə müqayisədə Naxçıvan bu gün daha sürətli inkişaf yolu keçir. Burada digər istiqamətlərdə olduğu kimi, mədəniyyət sahəsində də islahatlar, proqramlar həyata keçirilir. Muxtar Respublikada mövcud olan bütün mədəniyyət müəssisələrində yenidənqurma və bərpa işləri aparılır, köhnə binalar yeniləri ilə əvəz olunur, onlar ən müasir texnologiyalarla təmin edilir. Muxtar Respublikada İslam mədəniyyətinə dair abidələrin, tarixi irs nümunələrinin qorunması və mühafizəsi istiqamətində də ən yüksək səviyyədə tədbirlər görülür. Naxçıvanın İslam mədəniyyətinin paytaxtı seçilməsi təsadüfi xarakter daşımır. Muxtar Respublikada aparılan genişmiqyaslı quruculuq tədbirləri şəhərimizi tarixi görkəmini saxlamaqla dünyanın müasir və gözəl şəhərlərindən birinə çevirib. Buradakı məscidlər ən yüksək səviyyədə bərpa olunaraq dindarların istifadəsinə verilir, İslam adətlərinə yüksək ehtiram göstərilir, dini abidələr bərpa edilir və əhalinin ziyarət yerlərinə çevrilir.
çox uzağa getməyək. ötən ay türkdilli ölkələrin dövlət başçılarının IX zirvə görüşünün Naxçıvanda keçirilməsi onu göstərdi ki, bu gün Muxtar Respublika Ali Məclisi Sədrinin apardığı sosial-iqtisadi siyasət nəticəsində diyarımız ən ali qonaqları belə qarşılayıb yola salmaq iqtidarına malikdir.
Naxçıvanın İslam mədəniyyətinin paytaxtı elan olunması çox böyük əhəmiyyətə malikdir. Bir tərəfdən qardaş, dost ölkələrdən gəlmiş qonaqlar Muxtar Respublikanın tarixi, mədəniyyəti ilə daha yaxından tanış olacaqlar. Digər tərəfdən, Naxçıvan son dövrlərdə müxtəlif tədbirlərə ev sahibliyi etmək qüdrətinə malik bir bölgə olduğunu göstərsə də, bu çərçivədə həyata keçiriləcək tədbirlərlə bunu bir daha təsdiqləyəcək və öz mədəniyyətini qorumaq, İslam mədəniyyətini inkişaf etdirmək üçün böyük qüdrətə, imkanlara malik olduğunu sübut edəcək.
Bu, Muxtar Respublika tarixində baş verən qürurverici bir hadisədir.Əminik ki, Naxçıvan bu adı çox böyük qürur hissi ilə daşıyacaq və İKT ilə Azərbaycan arasında mövcud olan əlaqələrə öz töhfəsini verəcək, öz mədəniyyəti ilə bütün müsəlman ölkələrini birləşdirəcək.
Sara ƏZİMOVA,
Naxçıvan

Paylaş:

Baxılıb: 1443 dəfə