Atasız böyüdü, övlad acısı çəkdi...

Bakı:

26 °C

44 %

7 m/s

Əlaqə

AZ RU EN

Ana səhifə / Mədəniyyət / Atasız böyüdü, övlad acısı çəkdi...

Atasız böyüdü, övlad acısı çəkdi...

16.08.2023 [15:10]

Əhsən Dadaşovun anadan olmasının 99 illiyi tamam olur. O, 1924-cü il avqustun 16-da Bakı şəhərində anadan olub, burada da boya-başa çatıb. Bu, elə bir dövr idi ki, Azərbaycanın ən böyük ziyalılarının sayəsində Bakı mühitində böyük bir canlanma vardı. Zaman keçəcək və həmin sənət adamlarının sırasında Əhsən Dadaşov da öz adını qızıl hərflərlə yazdıracaqdı.

Təsadüfən 1 saylı Azərbaycan Dövlət Musiqi Texnikumunun qarşından keçərkən giriş qapısında yazılmış elan diqqətini çəkir. Elanda tar sinfinə qəbulu gördükdən sonra bir andaca qəlbinin hökmünə tabe olur. Evdən xəbərsiz sənədlərini məktəbə verir. Hərçənd valideynləri onun həkim olmağını istəyirdilər. Dövrünün ən tanınıb seçilən tarzənləri, ustadları Mənsur Mənsurov və Ənvər Mənsurovdan dərs alır.

Hələ yeniyetmə yaşlarından həyatın sərt üzü ilə rastlaşır. 37-ci il fəlakəti çoxları kimi onların da qapısını döyür. Atası Əliabbas Dadaşov1937-ci ildə repressiya edilir, evi dağıdılır, kitabları aparılır, qalanları isə yandırılır. Bütün bu vəhşətin şahidi olan Əhsənin 12-i yaşı olardı. O vaxtdan atasının üzünü belə görmədi. Ata həsrətini, dərdini tarını sinəsinə basaraq keçirməyə çalışırdı. Hayqırtısını simlərə köçürürdü.

Gənc tarzənin qeyri-adi ifaçılıq məharəti görkəmli bəstəkar Səid Rüstəmovun diqqətindən yayınmır. Onu rəhbərlik etdiyi xalq çalğı alətləri orkestrinə qəbul edir. Orkestrda çalışdığı müddətdə zəngin sənət təcrübəsi qazanan Əhsən müəllimin "Rast", "Orta Mahur", "Şur", "Zabul-Segah", "Hümayun", "Vilayəti-Dilkeş", "Çahargah", "Bayatı-Şiraz" və s. muğamları Azərbaycan radio verilişləri şirkətinin qızıl fondunu təşkil edir.

Onu kino musiqisi də cəlb edirdi. Bunu duyan bəstəkarlar Əhsən müəllimin ifasından filmlərdə də yararlanırdılar. “Dəli Kür” filmindəki məşhur “Ana Kür” mahnısını məhz Əhsən Dadaşov udda ifa etmişdi.1960 - cı ildə xalq çalğı alətləri ansamblı yaradır və ömrünün sonuna kimi bu ansamblın bədii rəhbəri olur. Hazırda "Xatirə" xalq çalğı alətləri ansamblı Əhsən Dadaşovun adını daşıyır.

Atasız böyüdü, övlad acısı çəkdi...

Əhsən müəllimi yaxından tanıyanlar xatirələrində onun necə ailəsinə bağlı olduğunu xüsusilə vurğulayırlar. Övladları ilə nəfəs alırdı. Lakin haradan biləydi ki, amansız övlad itkisinin acısını o da yaşayacaq. Öz sevimli müəllimi - Ənvər Mansurovun şərəfinə adını qoyduğu ilk övladından əbədi ayrılacaq. Övladının xəstəliyi ilə heç cürə barışa bilmirdi. Ən bahalı həblər belə oğlunun dərdinə dərman olmadı. Övlad dərdi ilə yanan ürəyi sadəcə 52 il döyünə bildi. Erkən yaşda sənəti, xalqı ilə vidalaşdı.

İlahi fitri istedad və sehrli barmaqları ilə könülləri fəth etdi. Sözün əsl mənasında, qüdrətli sənətkar zirvəsinə yüksəldi. Bir çox tarzənlərin sənət müəllimi oldu. Bu gün onun günüdür.

MÜŞFİQƏ

Paylaş:

Baxılıb: 844 dəfə