Şahmar Ələkbərov: Kinomuzun şah damarı

Bakı:

27 °C

40 %

7 m/s

Əlaqə

AZ RU EN

Ana səhifə / Mədəniyyət / Şahmar Ələkbərov: Kinomuzun şah damarı

Şahmar Ələkbərov: Kinomuzun şah damarı

23.08.2023 [12:17]

M.BAYRAMLI

Bu gün Xalq artisti Şahmar Ələkbərovun anadan olmasından 80 il ötür. Onun ilk aktyor karyerası "Dağlarda döyüş" filmindən başlayıb. “Yeddi oğul istərəm” filmindəki Qəqənin "Ölmə, Qəzənfər dayı, ölmə!" deyə hayqırtısı izləyicilərin yaddaşına iz salıb. Ölüm anında belə tamaşaçını faciənin içərisindən qoparıb təbəssümə qovuşdurmağı bacarmışdı. Cəmi yarım əsr ömür yaşadı. Bir kinonu, bir də ailəsini canından çox sevdi. İzulət və Ləman adlı əkiz qızları oldu. Eyni gündə anadan olan iki balasına elə eyni gündə də toy çaldırdı.

Şahmar Zülfüqar oğlu Ələkbərov 1943-cü ildə Gəncədə anadan olub. Azərbaycan Dövlət Mədəniyyət və İncəsənət Universitetinin Aktyorluq fakültəsini bitirib. Bir müddət burada assistent işləyən Ş.Ələkbərov sonralar aktyor sənətindən dərs deyib. Azərbaycan Dövlət Akademik Milli Dram Teatrının aktyoru kimi fəaliyyət göstərən sənətkar burada da maraqlı obrazlar qalereyası yaradıb. Görkəmli aktyor kinoya 1967-ci ildən çəkilib, 30-a yaxın filmdə irili-xırdalı rollar ifa edib. Onun kinoda ilk rolu “Dağlarda döyüş” filmindəki Fərrux obrazıdır. Bundan sonra aktyor bir-birinin ardınca “Mən ki gözəl deyildim”, “İntizar”, “Yeddi oğul istərəm”, “Axırıncı aşırım”, “Həyat bizi sınayır”, “Skripkanın sərgüzəşti”, “Qatır Məmməd”, “Arxadan vurulan zərbə” və digər filmlərdə yaddaqalan obrazlar yaradıb. Onun yaratdığı obrazlar sırasında "Yeddi oğul istərəm" filmindəki Qəzənfər xüsusilə seçilir və sevilirdi. Deyilənə görə, bu rol məhz Şahmar Ələkbərov üçün hazırlanmışdı.

Artıq zaman yetişmişdi. Şahmar müəllim kinoda rejissor kimi də sözünü demək istəyirdi. Sərbəst film çəkmək arzusu onu rahat buraxmırdı. Bir az da xəstələnmişdi. Səhhətində baş verən problemlər ona aktyor kimi işləmək imkanı vermirdi. Bu məqsədlə də studiyanın direktoru Adil İsgəndərovun yanına bir ssenari apardı. Bacarıq və istedadını rejissorluq sahəsində də sınadı.

Eləcə də rejissor Gülbəniz Əzimzadə ilə birgə Anarın “Şəhərin yay günləri” pyesi əsasında “İmtahan” bədii televiziya filminə quruluş verdi. Daha sonra müstəqil olaraq “Sahilsiz gecə”ni çəkdi. O vaxt Şahmar müəllimə dəhşətli xəstəlik əzab versə də, işləyirdi. Cərrahiyyə əməliyyatı üçün Almaniyaya getdi. Çoxdan qəlbində gəzdirdiyi bir arzunu reallaşdırmaq istəyirdi. Bu məşhur qəzəlxan Vahidin ekran obrazını yaratmaqdan ibarət idi. Burada Bakı kəndlərinin adət-ənənələri, XX əsr ədəbi mühiti çox real əks olunmuşdu. Əfsus ki, Şahmar Ələkbərov filmin ekran taleyini izləyə bilmədi. Ömür vəfa etmədi. Görkəmli sənətkar 1992-ci il avqustun 12-də cəmi 49 yaşında dünyasını dəyişdi. Yaşasaydı bu gün 80 yaşı tamam olacaqdı. O tarixə çevrilməyi seçdi, bizə isə neçə-neçə miras, sərvət buraxdı.

Paylaş:

Baxılıb: 943 dəfə